MTULETELO 15

1Ni to wona kambe nzumani tximwane txikombiso txa hombe txa kuxamalisa: Mtxhanu wa tingelozi ni timbidi kumweko ni mtxhanu wa mitungu ni yimbidi, yo gwitisa, inkusa ngu yona ku na hetiseka kuhenya ka Txizimu. 2Ni woni kambe txo nga linene la ngilazi yo pataniswa ni mndilo ni va va nga xula Txikalana, ni txithombe ni txibalo txa ditina da txona: va ti emile txitimwi ka linene la ngilazi na va di ñote tiharpa ta Txizimu, 3na va txi embelela lindando la Mosi, txithumi txa Txizimu, ni lindando la Txinvutana, va txi: “Mithumo yako nja hombe, kambe ya xamalisa,awe MkomaTxizimu txa mtamo wotshe.tinzila tako ndo lulama ni ta ditshuri,awe mfumeli wa otshe matiko. 4Mkoma, i mani a no mbi thava ni kupfalisa ditina dako, kani?Inna! ngawe tsena u ku msawuleki! Yotshe mifumo yi na ta khizama masoni kwako,nguko mithumo yako ya kululama yi ha kubasani.” 5Msana ka tiya ni to wona ku di tutwe dithepele nzumani, amuwa ku nga ti ni ditenda da mtshangano. 6Se ku txi huma mndani ka dona mtxhanu wa tingelozi ni timbidi ti nga ti ni mtxhanu wa mitungu ni yimbidi. Ti ti ambate tinguwo ta linya ya lisima, yo khetima, ti di sungile tibhande ta nzalama ha khana ka txona. 7Tximwetxo ka sivangwa sa mune si hanyako txi to ningela ka tingelozi ta mtxhanu ni timbidi, mtxhanu wa magombe ni mambidi a nzalama, ma di tate ngu kuhenya ka Txizimu, txi txi hanyako ngu hawa ku si gumiko. 8Dithepele di to tala ngu wutshi, ngu mhaka ya wudhumo wa Txizimu ni mtamo wa txona, ahawa ko za ni wammweyo a si si koti kuwulela Dithepeleni, kala kuza ku hetiseka mitungu yile ya mtxhanu ni yimbidi ya tingelozi ta mtxhanu ni timbidi.

will be added

X\