MTULETELO 14

1Se ni to wona tiya: Txinvutana txi ti emile txitimwi ka mmango wa Siyoni, kumweko ni digumi da mazana a mazana ni mune wa mazana a mazana ni mune wa makumi a mazana a vathu (144.000), avava va nga ti bhatwe ha mbanza ditina da Txinvutana ni da Tate wa txona. 2Ni to engisa dipswi da kuta ngu nzumani, do fana ni kudhuma ka mati ni kudhinda ka txingwalangwanda txa hombe; dipswi di ni nga di engisa di ti fana ni kutuma ka tiharpa ti txi vetwa ngu vaveti va tona. 3Va ti embelela lindando la liphya masoni ka txikhalo txa wukoma, ni masoni ka sihari sa mune ni ka madhota. A walo wu a nga ti si kota ku gonda lindandolo, hahanze ka va va digumi da mazana a mazana, ni mune wa mazana a mazana ni mune wa makumi a mazana (144.000), va nga poniswa ha mafuni. 4Avava ngu va va nga mbi ti nyeta ngu vavasikati: Mbotuma. Avava ngu vona va londetelako Txinvutana, hani ni hani txi yako kona. Avava va ponisilwe hagari ka vathu, ti to ve maha mihando yo khata ka Txizimu ni ka Txinvutana. 5Txima kha ku zivi kumanwa makuhu sisofuni kwawe. Kha va nga ni txisolo. 6Ni to wona yimwane ngelozi yi nga ti puruma hagari ka mpfhuka, yi di ni evangeli yo mbi na makhato ni magwito, kasiku yi huwelela ka vaaki va ha mafuni, ni yotshe mifumo, totshe tixaka, totshe tidimi ni votshe vathu. 7Yona yi ti wombawomba ngu dipswi da hombe, yi txi: “Thavani Txizimu mi txi pfalisa,nguko txi hokile txikhati txa ku lamula ka txona;khozelani awule a nga maha nzuma ni mafu, linene ni sisima.” 8Yimwane ngelozi, ayi ya wumbidi, yi to ya masoni ngu kuwomba, yi txi: “A wite, a wite, Bhabhilona wa hombe, awu a nga levisa yotshe mifumo ngu vhinya ya txiviti txa wugelegele wakwe.” 9Yimwane ngelozi kambe, ayi ya wuraru, yi to ya masoni ngu ku ti tekeleta, ngu dipswi da hombe, yi txi: “Ngako mthu a txi khozela txikalana ni txithombe txa txona, e amukela txixambanyo ha mbanza mwendo mu manzani, 10eyo nene a na sela vhinya ya kuhenya ka Txizimu, yo mbi timulwa ayi yi nga thelwa mu ka digombe da kuhenya ka txona; a na xaniswa ngu mndilo ni txivavula, masoni ka tingelozi to sawuleka, ni masoni ka Txinvutana. 11Wutshi wa kuxaniseka kwakwe wu na tuvika ngu hawa ku si gumiko: Ava va khozelako Txikalana ni txithombe txa txona, ni wuhi ni wuhi a amukelako txixambanyo txa ditina da txona, txima kha nga ni kuhumula, wusiku ni mtshikari.” 12Atiya ngu tona ti tsanisako kuhunisela ka vasawuleki, ava va veketako sirumo sa Txizimu ni likholo la Jesu. 13Konako ni to engisa dipswi da kuta ngu nzumani, di txi: “Bhala u txi khawe:Va katekile vafi vava, kukhukhela konkuwa va felako ka Mkoma. Inna, ku womba Moya, va na humula ka mikaralo yawe, nguko mithumo yawe ya va heleketa.” 14Msana keto ni to wona tiya: Ku ti ni direfu do basa, se txitimwi ka direfu ku ti khalahatshile mthu wo kari, wo fana ni Mwanana wa Mthu, a di ni m'bhoti wa nzalama ha msungo, se manzani kwakwe, a ti ni sikela yo lotwa. 15Konako yimwane ngelozi yi to huma ngu Dithepeleni, yi txi kwangula ngu dipswi da hombe ka wule a nga ti khalahatshile ha direfuni, yi txi: “Teka sikela yako u txi elula. Yi hokile mbimo ya kuelula, nguko thembwe ya mihando ya ha mafuni yi vitute.” 16Awu a nga ti khalahatshile ha direfuni a to rumela sikela yakwe ha mafuni se mafu me elulwa. 17Konako yi to huma yimwane ngelozi ngu ka Dithepele di di ku nzumani, niyona yi di ni sikela yo lotwa. 18Se yimwane ngelozi yi ku ni mtamo ka mndilo, yi to huma ngu ka txiluvelo, yi kwangula ngu dipswi da hombe ka yile yi nga ti ni sikela yo lotwa, yi txi: “Teka sikela yako yo lotwa, u txi wilela sizangwe sa mvhinya wa ha mafuni, nguko mauvha a wona ma vitute.” 19Konako ngelozi yi to ruma sikela ya yona ha mafuni yi elula mihando ya mvhinya wa ha mafuni, msana keto yi yi rinza nzekani ka kuhenya ka Txizimu. 20Mauvha ma to ya sukwa nzekani yi nga ti hahanze ka didhoropa, se ngu ka yona nzeka yile ku to huma mnoha, awu ngu kutala ka wona wu nga hokela matomu a mahanxi, wu txi hangalakisa toneto ka mnava wa mazana mararu a makilometro.


Copyright
Learn More

will be added

X\