MTULETELO 13

1Konako ni to wona txikalana txi nga pfukula ngu mu lineneni, txi di ni digumi da titxheho ni mtxhanu wa misungo ni mimbidi. Txitimwi ka titxheho ku ti ni digumi da mibhoti, se txitimwi ka misungo, ku ti ni ditina do ruketela Txizimu. 2Txikalana txi ni nga txi wona txi ti fana ni yingwe, kambe minenge ya txona yi ti fana ni ya txingwingwi; mdhonvu wa kona wu txi nga didomu da ngonyamo. Mwamilambo a to txi ninga mtamo wakwe, txikhalo txakwe txa wukoma, ni wukoma wa hombe. 3Wumwewo ka misungo ya txona wu to woneka nga wo bhaywa wu txi nga wo lava kufa, kambe txilonda txile txa lifo txi to holiswa. Otshe mafu ma to londetela txikalana, ma di tate ngu kuxamala, 4vathu ve khozela mwamilambo, nguko a nga ningela wukoma ka txikalana, ngu msana ve khozela txikalana, va txi: “I mani a fanako ni txikalana kani, i mani a si kotako kulwa natxo kani?” 5Txi to ningwa txisofu kasi kuwomba mapswi o eyisa ni o ruka Txizimu, ni mtamo wo thuma mbimo ya kudingana mune wa makumi a mitxima ni mitxima yimbidi (42). 6Txona txi to tula txisofu txi ruketela Txizimu, txi ruketela ditina da txona, ni ditenda da txona, ni va va zumbako nzumani. 7Txi ningilwe mtamo kambe wo lwa ni vasawuleki, txi va xula; txi ningilwe wukoma wotshe txitimwi ka totshe tixaka, matiko, tidimi ni mifumo. 8Votshe vaaki va ha mafuni va na txi khozela, avava matina awe ma nga mbi bhalwa, kukhukhela makhatoni ka ditiko, amu ka dibhuku da wutomi da Txinvutana, atxi txi nga bhaywa. 9Awu a ku ni tinzeve a na engise. 10Awu a nga sikelwa kukhotelwani,a na ya kukhotelwani;awu a nga sikelwa kudawa ngu ditxhari,a na fa ngu dona ditxhari.Atiya ngu tona ti tsanisako kuhonisela ni kukholwa ka vasawuleki. 11Msana keto ni to wona tximwane txikalana txi txi huma ngu mafuni: Txi ti ni titxheho timbidi nga txinvutana, kambe txi ti wombawomba nga mwamilambo. 12Txona txi thumisa wotshe mtamo wa txikalana txo khata, madingano ni kuruma ka txona, txi txi kurumeta mafu ni votshe va va nga aka kona ti to ve khozela txikalana txo khata, atxiya txilonda txa txona txa lifo, txi nga ti holisitwe. 13Txona txa maha sixamaliso sa hombe: Ahawa ko za txi si kota kumaha ti to mndilo wu txhika ngu nzumani, wu txi wa ha mafuni, wu txi wonwa ngu vathu. 14Txona txa kanganyisa vaaki va ha mafuni ngu mhaka ya sixamaliso si txi nga ningwa kumaha, madingano ni kuruma ka txikalana txo khata. Txona txi va kurumeta kumaha txithombe txo dhumisa txikalana txile, txi nga ti bhayilwe ngu ditxhari, aniko txi nga tshumela txi hanya. 15Txi ningilwe kambe ku wuleta moya mndani ka txithombe txa txikalana txo khata, ahawa ko za txithombe txi si kota kuwombawomba ni kumaha ti to ve fa votshe vale va lambako ku khizamela txithombe txa txikalana. 16Txi maha kambe ti to votshe vathu, vavadotho ni vahombe, vanyatithombe ni sisiwana, vathuseki ni tikhumbi ve vekwa txixambanyo amu ka dianza da txinene mwendo ha mbanza. 17Kasiku ni mmweyo a si si koti kuxava mwendo kuxavisa, ngako a singa ni txixambanyo, ditina da txikalana mwendo txibalo txa ditina da txona. 18Ahawa ku laveka wutxhari! Awu a ku ni kupfisisa a na tumbule txibalo txiya txa txikalana, nguko txibalo txiya txi womba ditina da mthu: Txibalo txa kona i mtxhanu wa mazana ni dimwedo, ni mtxhanu wa makumi ni dimwedo ni mtxhanu wa sibalo ni tximwetxo (666).


Copyright
Learn More

will be added

X\