MTULETELO 12

1Se ku to woneka nzumani txidiwukiso txa hombe: Wamsikati wa kuambala ditambo, ku di ni mtxima hahatshi ka mikondo yakwe; na a di ni m'bhoti wa digumi da tinyeleti ni timbidi ha msungo kwakwe. 2Wamsikati a ti ni txirumbu a txi lumwa, a txi xaniseka, nguko a ti lava kuhefemula. 3Ngu msana ku to woneka tximwane txidiwukiso nzumani: Mwamilambo wa hombe ngutu, wo bhilivila a di ni mtxhanu wa misungo ni mimbidi, ni digumi da titxheho, se misungo yi ti ni mibhoti yotshelele. 4Mkila wakwe wu txi wungeleta mpimo wa wuraru wa tinyeleti ta nzumani wu txi ti rinza ha mafuni. Mwamilambo a txi khalahatsha masoni ka wule wa msikati, a nga ti hafuhi ni kuveleka, kufela kukhadamula mwanana wule a nga ti lava kuvelekwa. 5Se wamsikati a to veleka mwanana wa mzambi, awu a no fumela otshe matiko ngu ndonga ya simbi ya wukoma. Mwanana wule a tekilwe e yiswa ka Txizimu, masoni ka txikhalo txa wukoma. 6Se wamsikati e thava e tsula txiwulani, ahawa a nga ti lulamisetwe wukhalo ngu Txizimu, kasiku ve zumba ve m'phamela sakudya mndani ka txipimo txa digumi da mazana ni mazana mambidi ni mtxhanu wa makumi ni dimwedo da masiku (1.260). 7Se ku to wuka yimbi nzumani: Migeli ni tingelozi takwe va lwite ni mwamilambo. Mwamilambo a lwite a di ni tingwelozi takwe, 8hambiketo a xutwe, se ku singa ngadi ku maneka wukhalo wawe nzumani. 9Ngukonaho a to vinzwa hahatshi mwamilambo wa hombe, mnyoka wa kale, awule wu dhanwako ku i Dhiabhulosi mwendo Sathane, mxengeteli wa dotshe ditiko; a vinzilwe ha mafuni, ene ni tingelozi takwe. 10Ngu msana ni engisile dipswi da hombe da kuta ngu nzumani, di txi: “Ndiye mbimo ya kuhanyiswa, ya mtamo ni mfumo wa Txizimu txathu, ni wukoma wa Mesiya wa txona; nguko a rinzilwe hahatshi mmangaleli wa vanathu, awule a nga ti va mangalela masoni ka Txizimu wusiku ni mtshikari. 11Kambe vona va mu xute ngu mhaka ya mnoha wa Txinvutana ni ngu mhaka ya dipswi di va nga di fakazela, ngukusa kha va khatala ngu wutomi wawe kala kufani. 12Ngu konaho, tsaka, awe nzuma, ni motshenu mi zumbako ka yona.Aniko mina ni dikhombo, awe mafu ni nawe linene,nguko Dhiabhulosi a txhikile kwanu, a di ni txiviti ngutu, ngu kuziva ti to mbimo yakwe nja yidotho.” 13Mbimo yi a nga wona ti to a tovetwe, mwamilambo a to khata kulondisela awule wamsikati a nga ti velekile mwanana wa m'zambi. 14Kambe ene a to amukela mabhapi a mambidi a ngungwa ya hombe kasiku e purumela txiwulani, e ya ka wukhalo wu wu nga ti lulamisetwe ene, kasi kuzumba a txi phamelwa kona sakudya, kule ni mnyoka, mbimo yimweyo, timbimo timbidi ni hafu ya mbimo. 15Mnyoka wu to kosa mati o nga mnambo msana ka wamsikati, kasiku e ndindwa ngu mswinga wa ona. 16Kambe mafu ma to lamulela wamsikati, nguko ma asamile me mita mnambo wu mwamilambo a nga ti wu kosile. 17Mwamilambo a di tate ngu txiviti ngu mhaka ya wamsikati, a to tsula a txi ya lwa ni va va nga ti sate va liveleko lakwe, ava va veketako sirumo sa Txizimu, ve xayisa wufakazi wa Jesu. 18Ene a to ya ema mabambe ka linene.

will be added

X\