MTULETELO 11

1Msana keto va to ni ninga litshava lo fana ni ndonga, va txi ni gela va txi: “Khukha u txi pima Dithepele da Txizimu, ni txiluvelo kumweko ni va va khozelako kona. 2Se mtendela wa hahanze ka Dithepele, wu leke u nga wu pime, nguko wona wu ningetwe ka vamatiko, ava va no kandetela ngu mikondo didhoropa do sawuleka txipimo txa mune wa makumi a mitxima ni yimbidi. 3Aniko ni na ninga mtamo ka tifakazi tangu ta timbidi kasiku ti txi profeta, ti di ambate masaka, mndani ka digumi da mazana ni mazana mambidi ni mtxhanu wa makumi ni dimwedo da masiku (1.260).” 4Ayiya ngu yona miolivha ya yimbidi ni sipande sa simbidi sa malambu, si ku masoni ka mkoma wa mafu. 5Ngako mthu a txi lava ku ti mahela wubihi tifakazi tile, ku na huma mndilo ngu txisofuni ka tona, awu wu no pfunulela valala va tona; inna, ngako mthu a txi duketa ku ti mahela wubihi ngu tona ti a nga txi fanela kufisa tona. 6Tona ti ni mtamo wa kuseka nzuma ti to ma si wi mati ka masiku a wuprofeti wa txona. Tina ni mtamo kambe wo hindula mati otshe me maha mnoha; tina ni mtamo wo peka mafu ngu mitungu yihi ni yihi, sotshe sikhati, ngako ti txi ti lava. 7Mbimo yi ti no heta kufakaza ka tona, txikalana txi txi humako ngu diphalani ko hokoma txi na lwa nato, txi ti xula, txi ti daya. 8Sirumbi sa tona si na vekwa ha mtendelani ka didhoropa da hombe adi, ngu kufananiswa, di dhanwako ku i Sodhoma ni Egipta, ahawa Mkoma wa tona nene a nga bethelwa ha txihambanoni. 9Vathu va otshe matiko, ni totshe tixaka, ni totshe tidimi ni yotshe mifumo va na wona sirumbi sa tona mndani ka masiku mararu ni hafu,ve tsimbisa ti to si si kelelwi sirumbi sile. 10Vaaki va ditikonimo va na tsaka ngu toneto, va na giya ve ningana siningo, nguko vaprofeti vava vavambidi va titi xanisile vaaki va ditikodo. 11Kambe msana ka masiku ale a mararu ni hafu, moya wa wutomi, wa kuta ngu ka Txizimu, wu to wulela mndani ka sirumbi, se sona si khukha si ema. Se avale va nga txi si woneleta va to dhuka ni kuthava. 12Konako va to engisa dipswi da mtamo di nga txi va gela, di txi: “Kwelani kheno.” Se va to kwela ve ya nzumani, va di mndani ka direfu, va txi wonwa ngu valala vawe. 13Ka txona txile txikhati ku to humelela kutsekatseka ka hombe ka mafu: Ditshelo da wugumi da Didhoropa di to khundumuka, se ve fa kona ha ngumbeniho vathu va mtxhanu wa makumi ni makumi mambidi a mazana (7.000). Ava va nga huluka va to tala ngu kuthava, ve dhumisa Txizimu txa nzumani. 14Dikhombo da wumbidi di pindile. Aniko, wonani, dikhombo da wuraru da ta ngu kukuluveta. 15Se ngelozi ya wutxhanu ni timbidi yi to veta mpundu wa yona. Konako ku to pfala mapswi a mtamo nzumani, ma txi: “Mfumo wa mafu konkuwa wu lumba Mkoma wathu ni Kristu wakwe, se ene a na fuma ngu ha ku si gumiko.” 16Madhota a makumambidi ni mune ma nga khalahatsha ka sikhalo sa ona sa wukoma masoni ka Txizimu ma to khizama me khozela Txizimu, ma txi: 17“Athu ha ku bonga, Mkoma Txizimu txa mtamo wotshe, awe u ku awule a ku ho, ni awule a nga ti ho, nguko u amukete mtamo wako wa hombe, u khata kufuma. 18Mifumo yi titi kwatile, aniko kuhenya kwako ku hokile, i mbimo yo lamula vafi,I mbimo yo ninga hakelo ka vaprofeti sithumi sako, ni ka vasawuleki vako va va thavako ditina dako, vavadotho ni vahombe,I mbimo kambe ya kufuvisa avava va nga wonhisa mafu.” 19Dithepele da Txizimu di ku nzumani di to tuleka, se wu txi woneka mtundu wa txitumelelano Dithepeleni ka txona. Se ku to woneka kukeluka ka nzuma, mapswi, singwalangwanda, kutsekatseka ka mafu ni txingulu txa hombe txa maralala.

will be added

X\