VAFILIPIYA 4

1Ngu kota yeto, vanathu vo randeka ngutu ni kunaveleka, anu mi ku litsako ni m'bhoti wangu, zumbani mi di tsani ka Mkoma, wo randeka ngutu. 2Na kombela ka Evhodhiya, na khongota ka Sintike, ti to ve engisana ka Mkoma. 3Na ku kombela nawe Siziku, mngana wangu wo thembeka ti to u txi va vhuna vamame va va nga lwa kumweko ni nani ka mhaka ya Evhangeli, va di ni Klemente ni vamwane vathumi kulothu, ava matina awe ma nga bhalwa dibhukuni ka wutomi. 4Tsakani ka Mkoma yotshe mbimo! Na engeta ni mi gela: Tsakani! 5Wunene wanu wu na ziwe ngu votshe vathu. Mkoma a hafuhi! 6Mi nga karatekeni ngu txilo, vanathu, aniko mikombelo yanu yi na kombe minavelo yanu ni kubonga kwanu ka Txizimu. 7Senikoko kurula ka Txizimu, ku pindako wotshe wuzivi, ku na veketa timbilu tanu ni mialakanyo yanu ngu Kristu Jesu. 8Vanathu, ngu kugwitisa, ni khani: Totshe ti i ku ta ditshuri, totshe ti i ku ta lisima, totshe ti i ku ta kululama, totshe ti ti dhundekako, totshe ti ti ku ni nduma ya yinene, totshe ti i ku ta mahanyelo a manene ni kudhumiseka, ngu toneto mi fanelako kuzumba mi txi ti alakanya. 9Ati mi nga gonda ni ti mi nga ti amukela, ati mi nga ti engisa, ni ti mi nga ti wona kwangu, ngu ti mi fanelako ku ti maha. Txizimu txa kudikha txi na ve ni nanu. 10Ni tsakile ngutu ka Mkoma, ngu kuwa mi nga tshumela mi wuseta kukhatala kwanu ngu ngani; kha ditshuri mi ti ni khatalela, aniko mi ti singa ni nzila yo komba kukhatala kwanu. 11Kha ni wombi tiya ngu mhaka ya kukwata, nguko ni gondile kutsaka ngu tihi ni tihi ni manekako ni di ka tona. 12Na ti ziva kuhanya ngu wusiwana, na ti ziva kambe kuhanya ngu kuenelelwa. Ka yotshe mbimo ni ka otshe mahanyelo, ni gondile kudya ni txi khura, ni kuzumba ni si dyi txilo, kuhanya ngu kutalelwa kumbe kuxaniseka ngu kupwata. 13Totshe na ti kota, ngu kutsaniswa ngu wule a ni ningako mtamo. 14Hambi ti di halo, mi mahile ta tinene mi nga patana ni nani kuxanisekani kwangu. 15Ma ti ziva tatinene, anu vaFilipiya, ti to, kukhatani ka Evhangeli, mbimo yi ni nga khukha Makhedhoniya, ku walo dibanza ni dadimwedo di nga ti vhunana ni nani, amu ka kuninga ni mu ko amukela, hahanze kwanu kugwita. 16Ngukuva hambi ku ni nga ti Tesalonika, mi ni rumete so ni vhuna ka si ni nga txi si pwata, i singa kumweko dwe. 17Hi nga ti to no vilela kuhiwa, aniko ni vilela ni m'hwando wu wu no mi ninga dibhindu. 18Ngu toneto, sotshe ni naso, so tala si sala. Ni taletwe ngu ku ni nga amukela manzani ka Epafrodhito asi mi nga ni rumela, matolo o bhumula tatinene, mhamba yo amukeleka ni kutsakisa Txizimu. 19Txizimu txangu, txi na mi ninga, ngu kutatiseka, sotshe si mi si vilelako, mayelano ni kutala ka thomba ya txona ya kuphatima, ngu Kristu Jesu. 20Txi na dhumiswe Txizimu, Tate wathu, ngu malembe ni malembe, Amen. 21Ni dinguleleni vasawuleki votshe ngu ka Kristu Jesu. Vanathu va ku ni nani va mi dingula. 22Vasawuleki votshe va mi dingula, ngutungutu ava i ku va nyumba ya Khezari. 23Kateko ya Mkoma wathu Jesu Kristu yi na ve ni mimoya yanu.


Copyright
Learn More

will be added

X\