VAFILIPIYA 3

1Ngu kugwitisa, vanathu, tsakani ngu ka Mkoma. Kha ti ni karati ku engeta ni mi bhalela toneto ta timweto, nguko eto ti vhuna ku mi tsanisa. 2Ti woneleni ka timbwa, ti woneleni ka vamahi va tobiha, ti woneleni ka va wukwera wa makuhu. 3Ava va nga ya wukwerani ngu ngathu, hi khozelako Txizimu ngu Moya wa txona; hi ti pfalisa ngu ka Kristu Jesu, hi si veki kuthemba kwathu ka nyama, 4hambiko ani ni ku ni fanelo ya kuthemba niyona nyama. Inkusa ngako wo kari a txi alakanya ku ti themba apune, ani ni fanela kupinda ene, 5ni yisilwe wukwerani ka ditshiku da wutxhanu ni mararu, ni wa lixaka la ka Israyeli, ni wa lihunzu la Bhenjamini, muhebheru, mwanana wa Vahebheru, ngu mu ka milayo ni mfarisi, 6ngu mu ka kukhutala, ni muxanisi wa Dibanza, ngu mu ka wululami wa Mlayo, ni maneka ni singa ni mnandu. 7Asi i nga ti dibhindu, kwangu, ni si woni si si vhuni txilo ngu kota ya Kristu. 8Ngu ditshuri, sotshe ni si wona si si vhuni txilo, ngako ni txi si dinganisa ni lisima la kuziva Kristu Jesu, Mkoma wangu. Ngu ndava yakwe, sotshe ni si tshotshile, futsi kambe ni si wona i di nzambwa, kasiku ni mana Kristu; 9kambe ni maneka ni di kwakwe, na i singa ngu mhaka ya kululama kwangu, ku tako ngu ka mlayo, aniko ngu ndava ya kululama ku ku humako ngu ka likholo ka Kristu; kululama kuwa ku tako ngu ka Txizimu akuwa ku tsaniswako ngu likholo. 10Ngu kota yeto, ni na si kota ku mu ziva, ene ni mtamo wa kuwuka kwakwe, ni txi sengela nayo kuxanisekani kwakwe, ni txi dinganiswa nayo kufani kwakwe, 11na ni txi rinzela tito mwendo nani ni nga mana kuwuka ka vafi. 12Hi nga ti to ni hetile mthumo, mwendo kumana wusawuleki, aniko na khutala ni txi ya masoni ka nzila yangu, kasiku mwendo ni nga mana kuhetiseka, nga ti nani ni nga manwa ngu Kristu Jesu. 13Vanathu, kha ni pimisi ti to ni hokile magwito, aniko njilo tximwetxo ni txi mahako. Ngu kudivala ati ti ku msana, ni tutuma ngu kukarateka ni londeta asi si ku masoni, 14ni longoloka nzila yangu ngu kulava kuhoka magwito, kala kuya mana txhatxhazelo ya kuxula ayi ni dhanelwako yona nzumani ngu Txizimu, ditinani ka Kristu Jesu. 15Ngu konaho, athu hi ku vahetiseki he zumbeni hi txi alakanya toneto; se ngako mi di ni mialakanyo yimwane, Txizimu txi na mi tuletela txona. 16Hambi i di keto, ka ti hi nga hoka ka txona, he simamiseni hi tsimbila ngu nzila yimweyo. 17Vanathu, ti maheni vaeteteli vangu, mi txi wonisisa khakwati avale va hanyisako ti mi ti wonako kwathu. 18Nguko va ho vavangi, ava va hanyako kota nga valala va txihambano txa Kristu. Ni bhulisanile ni nanu sikhati sa singi ngu vona, se konakuwa ni wombawomba ni txi dila. 19Magwito awe ngu kulova, nguko Txizimu txawe ngu mrumbu wawe. Va ti kukumukisa ngu sile si va thelako tingana, va khutalela tsena tithomba ta mafu. 20Aniko athu mwani kwathu ngu nzumani, ahawa hi rinzelako ti to a na ta ngu kona muhanyisi Mkoma Jesu Kristu. 21Ene a na phindula mmidi wathu wa wusiwana, a txi wu maha wu txi fana ni mmidi wakwe wa wudhumo, a txi wu ninga mtamo wo fana ni wule ene a fumako ngu wona sotshe simaha.


Copyright
Learn More

will be added

X\