VAFILIPIYA 2

1Ngu toneto, ngako ku di ho kuthavelelana ngu ka Kristu, ni kumalatelana ngu lirando, ni mpatano wa moya, ngako ku di ho wuxinji ni kuxanisekelana, 2tatisani kutsana kwangu, motshenu mi va mi di ni kualakanya ko fana, lirando limwelo, mbilu yimweyo ni moya wumwewo. 3Mi nga maheni to maha ngu kukanetana kumbe ku ti kulisa, aniko thumani ngu ku ti veka hahatshi, mi si alakanyi ti to ma pala vamwane ngu wunene. 4Kha ku laveki ti to mmwane ni mmwane a txi khatalela simaha sakwe basi, aniko mmwane ni mmwane a na khatalele simaha sa nkwawe. 5Hagari kwanu, ku laveka mi zumba mi di ni mapimo a Jesu Kristu: 6Ene, hambiko i ku Txizimu ngu wutumbu wakwe,kha lava kuhumelelisa wuzimu wakwe, 7aniko ene ngu kuranda kwakwe,a tekile txiemo txa txithumi,e ti fananisa ni vathu,a txi ti wonekisa kota nga mthu. 8A txi ti veka hahatshi ene apune,e ti maha muengisi wa mlayo kala kufa ngu lifo la txihambano. 9Ngu toneto, Txizimu txi mu guletile ngutu,txi mu ninga ditina di di ku txitimwi ka otshe matina; 10kufela ku, ha ditinani ka Jesu,otshe mazolo ya vale va ku txitimwi nzumani ni ya vale va ku ha mafuni, ni ya vale va ku hahatshi ka mafu, me mu khizamela; 11se totshe tidimi ti fanela kuhuwelela ti to Jesu Kristu ngene i ku Mkoma kasi ku na dhumiswa Txizimu Tate. 12Ngu konaho vo randeka ngutu kwangu, anu mi engisisako yotshe mbimo, thumani ngu txithavo ni kudhudhumela mi thumela kuhanyiswa kwanu, i singa kumaha eto tsena, ngako ni di kumweko ni nanu, aniko ngutungutu konkuwa ni ku kule ni nanu. 13Kha ditshuri Txizimu ngu txona txi mahako ti to mi xuva ni kuthuma kuranda ka txona. 14Thumani totshe mi si nguranguri ni kuphikizana, 15kasiku mi va mi singa ni txisolo na mi di basile, mi va vanana va Txizimu vo mbina nzambwa, hagari ka liveleko lo soholoka, na li di xangile; mi fanete kuphatima hagari kwawe, nga malambu ha mafuni; 16mi humelelisa Dipswi da wutomi, eto ti na va i di kupfaliswa kwangu ka Ditshiku da Kristu, nguko ni na va ni sa tutuma ni ku thuma mahala. 17Aniko, hambi idiku mnoha wangu wo theketwa ngu mphaxo wa mhamba, ni kuthumela likholo lanu, na nengela ni va ni tsaka kumweko ni nanu motshe; 18se nananu nengelani mi va mi tsaka kumweko ni nani, ngu kota ya toneto. 19Na themba ngu ka Mkoma Jesu ti to ni na mi rumela Timoti, kasiku nani ni mana kutsaniswa ngu kuamukela mahungu a wutomi wanu. 20Nguko kha ni nga ni mmwane mthu wa mbilu ya kufana ni yangu, awu a si kotako ku mi khatalela. 21Votshe va khatalela wutomi wawe, i singa timhaka ta Jesu Kristu. 22Kasi i di ene, anu ma yi ziva mithumo yakwe: ene, nga mwanana wu a thumisanako ni tate wakwe, a thumile kamweko ni nani ka mthumo wa Evhangeli. 23Ngu toneto, ngene ni verelako ku mi rumela, kunukunuko ni no ti ziva ti ti no ni humelela. 24Na themba ngu ka Mkoma ti to nanani mbayimbayi ni na ta kheyo kwanu. 25Konkuwa ni woni ku ta laveka ni txi mi rumela Epafrodhito, mwanathu, txithumi kulothu ni disotxhwa kulothu, awu i ku txirumwa txanu txa kuta ni vhuna ka si ni si pwatako. 26Ene wa vilela ku mi wona motshe, kambe wa karateka ngu ku mi nga engisa ti to a ti lwala. 27Kha ditshuri a ti lwala, futsi a ti hafuhi ni kufa. Aniko Txizimu txi mu pfete wusiwana, txi ni pfela wusiwana ni nani, kasiku ni si pfi kupandiseka txitimwi ka kupandiseka. 28Ngu toneto, ni kuluvetile ni m'rumela kwanu, kasiku mi tshumela ni tsaka ngu ku mu wona; nanani ni na renga kupandisekani kwangu. 29Ngu toneto, mu amukeleni, ngu ditina da Mkoma, na mi txi tsaka ngu yotshe mbilu, mi vekela txithavo vathu vo fana ni nene, 30nguko a zite e lava kufa ngu mhaka ya mthumo wa Kristu, a si khatali ngu kufa, kasiku e mi tsiveta ka tile mi si si kotiko ku ni vhuna ngu tona.

will be added

X\