VAFILIPIYA 1

1Paulo ni Timoti, sithumi sa Kristu Jesu, hi bhalela va va nga sawuleka ngu ka Kristu Jesu, va ku Filipiya, kumweko ni vabhixopo ni vadhiyakoni vawe. 2Kateko ni kudikha si na ve ni nanu si txi huma ngu ka Txizimu, Tate wathu, ni ka Mkoma wathu Jesu Kristu. 3Na bonga ka Txizimu txangu ka txikhati txihi ni txihi ni mi alakanyako. 4Yotshe mbimo, ka mikombelo yangu, na mi khongelela motshenu ngu kutsaka, 5ni txi khumbula txivhuno txi mi nga txi maha ka mhaka ya kuhangalasa Evhangeli, kukhukhela ka ditshiku do khata kala nyamsi. 6Na themba ti to awule a nga khata mthumo wa wunene kwanu, a na wu hetisa kala kuhoka ka ditshiku da Kristu Jesu. 7Ti lulamile ngako ni txi alakanya toneto ngu kota yanu motshe, nguko nina ni nanu mbiluni kwangu, ngukusa mi patani ni nani ka kateko yangu, amu kusungwani kwangu, kumweko ni mu ka kulwela ni kutsanisa Evhangeli. 8Txizimu i fakazi yangu ka ti to ani na xuva ku mi wona motshe, ngu lirando la Kristu Jesu. 9Ni kombela ti to lirando lanu li na kule ditshiku ni ditshiku, amu ka wuzivi ni wutxhari, 10kasiku mi si kota kusawula ati i ku ta tinene ngutu, mi va mi di ni ditshuri ni wululami ka ditshiku da Kristu, 11mi txi pfunelwa ngu mihando yo lulama, yi tako ngu ka Jesu Kristu, kasiku Txizimu txi pfaliswa ni kudhumiswa. 12Vanathu, ni lava ku mi ti ziva ku ati ti nga ni humelela ti vhuni ngutu kutsimbitisa evangeli yi ya masoni: 13Ngukusa ka yotshe nyumba ya wukoma ni ka otshe mamwane makhalo, mhaka ya kusungwa kwangu ngu kota ya Kristu ya ziwa tatinene. 14Wungi wa vanathu, va nga tsaniswa ka Mkoma ngu mhaka ya kusungwa kwangu, va engetetwe kutsana ngutu ve huwelela Dipswi, na va si thavi txilo. 15Kha ditshuri, vamwane va huwelela Kristu ngu mabava ni mibango, aniko vamwane va huwelela ngu mbilu ya yinene. 16Avava va huwelela ngu lirando, na va txi ziva ti to ani ni vekilwe kasiku ni lwela evangeli, 17kambe avale vamwane va huwelela Kristu ngu kota ya mibango, i singa ngu mbilu ya yinene, va txi pimisa ti to va ni engetela kuxaniseka amu kusungwani kwangu. 18Ti vhuna txani kani? Ati i ku tona - mwendo ti mahwa ngu mibango mwendo ti mahwa ngu mbilu ya yinene - Kristu wa huwelelwa: Eto ngu ti ti ni tsakisako. Kambe ti ngadi ti txi na ni tsakisa, 19Ngu kuziva ti to, totshelele eto ti na gwita ngu ku ni hanyisa, ngu mhaka ya mikombelo yanu ni kuvhunwa ngu Moya wa Jesu Kristu. 20Madingano ni kuxuva ni kuthemba konako, ni pimisa ti to ni na mbi wiswa tingana ni ka kudotho, aniko ngu kota ya kotshe kutsana kwangu, konkuwa ni yotshe mbimo, Kristu a na dhumiswa ha mmidi kwangu, mwendo na hanya mwendo na fa. 21Nguko ani ni khani: kuhanya i Kristu, kufa i dibhindu. 22Aniko, kota nga ti kuhanya kwangu ka nyama ku velekako mihando ya yinene, se kha ni ti zivi ati ni fanelako kukhedha txona. 23Na ti wona ti to ni fumwa ngu minavelo yimbidi: Ni navela kutsula ni ya zumba ni Kristu, ati i ku tatinene ngutu; 24aniko kuhanya kwangu ka nyama ha mafuni, njivhuno txa hombe kwanu. 25Kambe na ni singa ni kukanakana ka mhaka yiya, na ti ziva ti to ni na fungala ni zumba ni nanu motshenu, kasiku mi ya masoni ngu kutsaka likholoni kwanu, 26ni ti to kutsaka ku mi ku nako ngu ngani ku txi anda ngu ka Kristu, mbimo yi ni no tshumela ni mi tela. 27Kambe khutalani tsena ngu kuhanya ngu tifanelo ta Evhangeli ya Kristu, kasiku, mwendo na ta ni ta mi wona, mwendo ni maneka kule ni nanu, ni na engisa ti to mi ngadi tsanisilwe ngu moya wumwewo, mi lwa kumweko mi di tshanganisilwe ngu moya wumwewo, kulwela likholo la Evhangeli, 28mi si thavi kudhukiselwa ngu valala, kasi eto, kha ditshuri ti kombisa ti to vona va ya kulovani, ani anu mi ya kuhanyiswani. Atiya ti ta ngu ka Txizimu, 29nguko txona txi mi ningile kateko, masoni ka Kristu, kateko yo kholwa kwakwe, ni yo xaniseka ngu ngene, 30mi lwa yimbi yi mi nga ni wona ni txi lwa nani, yimbi yi ni konkuwa mi ti zivako ti to ni ngadi ni txi lwa yona nani.

will be added

X\