MATEWU 9

1Kutingako Jesu a txi bela ngalavani a to tshumela e txhatuka mnambo, a txi wuya didhoropani kwawe. 2Se va to mu nehela mthu wa kuwoma sihango, a di otete ha didhandoni. Jesu a txi wona kutumela kwawe, a to khene ka mthu wule wa kuwoma sihango: “Mwanangu, tsanisa mbilu! Siwonho sako si divaletwe.” 3Konaho, vamwane vabhali va to alakanya timbiluni kwawe va txi: “Awu mthu wa ruka.” 4Se ngako Jesu a di woni mialakanyo yawe, a to khene: “Njani mi pimisa kubiha timbiluni kwanu? 5Kasi ngu tihi ti nga hehuka: Kuwomba ku ‘siwonho sako si divaletwe’ mwendo ku ‘khukha u txi tsula?’ 6Senikoko, ani ni na mi kombisa ti to Mwanana wa Mthu ana ni mtamo ha mafuni wa kudivalela siwonho." Se a to gela wu wa kuwoma sihango, a txi khene: “Khukha u txi teka didhando dako, u txi tsula mtini kwako.” 7Ene a to khukha e tsula mtini kwakwe. 8Mabutho a vathu, ngako ma txi wona tiya ma to telwa ngu kuthava, me dhumisa Txizimu atxiya txi nga ninga vathu mtamo wo maha eto. 9Ngako Jesu a txi ya masoni, a to wona mthu a nga ti dhanwa ku i Matewu, awu a nga ti khalahatshile ha wukhaloni ka kukhupisa, se a txi khene kwakwe: “Ni londise!” Se ene a to khukha e mu londisa. 10Ahawa Jesu a nga maneka a di khalahatshile ha mezani ka sakudya, nyumbani ka Matewu, vakhupisi va vangi ni vawonhi va tile va ta khalahatsha kumweko ni Jesu ni vagondiswa vakwe. 11Vafarisi va di woni toneto, va to womba ka vagondiswa, atxi: “Ti mahisa ku txani Mgondisi wanu e dya ni vakhupisi ni vawonhi kani?” 12Jesu a to va engisa, se e va xamula a txi khene: “Hi nga vale va ku ni wutomi ava va lavako ñanga, aniko ngu vale va lwalako. 13Tsulani mi ya gonda ti to ti txhamusa txani ati ta ku: ‘Ni dhunda ngutu wumbilu kupinda timhamba!’ Nguko kha na tela kuta dhana valulami, aniko ni tete vawonhi.” 14Ka yoneyo mbimo, vagondiswa va Johane va to tshuketela Jesu va txi: “Ngu ku txani athu ni vafarisi hi ti txonako sakudya masiku o tala, na kasiko vagondiswa vako kha va ti toni, kani?” 15Jesu a ti khene kwawe: “Tipheleketi ta wu a tekako, ina ti nga si kota kudila, na awu e tekako a di ngadi nato? Kambe ku na ta masiku, aawa va na ku ta tekelwa mteki, se ngu kona va no ta ti tona sakudya. 16Kha ku nga ni mthu awu a rungako txiziva txa txiphya ka nguwo ya kale, nguko txiziva txiya txi nga namula nguwo, se nguwo yi txi engeteleka kuvharuka. 17Hambi vathu kha va theli vhinya ya yiphya ka misava ya kale, nguko misava yi nga vharuka, ni vhinya yi txi thekela, misava niyona yi txi luza. Aniko vhinya ya yiphya yi thelwa misavani ka kuphya; se sona ngu wumbidi wa sona si na xayiseka.” 18Ngako Jesu a txi txhumayela tiya, nganakana yo kari, yi to tshuketa yi txi mu khizamela, yi txi: “Mkoma, mwanana wangu wa txihoranana i ngadi kwakwe kufa kunukunuku, kambe ngono u ta sanzeka dianza txitimwi kwakwe, kasiku ene a na hanya.” 19Seni Jesu a di khukhile, a to mu londisa ni vagondiswa vakwe. 20Senikoko, mmweyo wamsikati a nga ti xupheka ngu malwati a lingolengole, ngu txipimo txa digumi da malembe ni mambidi, a to mu tshuketela ngu msana, e gwesa wuziva wa nguwo yakwe. 21Ngukuva a txi pimisa tiya mbiluni kwakwe: “Ni txi nga za ni gwesa hambi nguwo yakwe dwe, ni na hanyiswa.” 22Jesu a txi tshembereka e mu wona, a to khene kwakwe: “Tsanisa mbilu, mwanangu, likholo lako li ku hanyisile.” Se wamsikati a to hanyiswa ka malwati akwe ka yona yile mbimo. 23Ngako Jesu a di hokile mtini ka nganakana yile, a di woni vaveti va titshudi ni vathu vo tala, va nga ti vanga diguwa da hombe ngutu, a to khene: 24“Khukhani mi tsula, inkusa awu wa txihoranana kha fa, a to otela.” Se vona va nje ku mu seka. 25Ngako a di humile, ene a to wulela e ñola mwanana wule ngu diwoko. Se awule wa txihoranana a to wuka. 26Konako, nduma ya tiya ti nga maheka, yi to hangalaka ni dotshe ditiko dile. 27Ngako Jesu a di khukhile konaho, mabhofu mambidi ma to mu londisa, ma txi kwangula ma txi: “Mwanana wa Dhavhidha, hi pfele wusiwana!” 28Ngako a di hokile nyumbani, mabhofu ma to mu tshuketela. Se Jesu a txi khene kwawe: “Ma tumela ti to ni nga si kota kumaha eto kani?” Vona va txi khona kwakwe: “Inna, Mkoma!” 29Konaho a to gwesa maso awe, a txi khene: “Ti na maheke kwanu, nga ti mi kholwisako tona.” 30Seni maso awe me tuleka. Jesu a to va laya ngutu a txi khene: “Ti woneleni ti to mhaka yiya yi si ziwi ngu mthu ni wammweyo.” 31Aniko vona, va txi huma, va to nuwela nduma yakwe ka dotshe ditiko dile. 32Na a di humile, va to mu tisela mthu wa txiduma, a nga ti ni didhimoni. 33Ngako didhimoni di di tovetwe, txiduma txi to wombawomba, se dibutho di to xamala, di txi: “Txima kha ti zivi kanga wonwa to nga tiya ka Israyeli.” 34Aniko vafarisi va txi khona: “Ene a tovela madhimoni ngu mtamo wa mkoma wa madhimoni.” 35Jesu a txi tsimbilatsimbila sidhoropanani ni mikhokholani, a txi gondisa masinagogani, a txi txhumayela Evhangeli ya Mfumo, ni kuhanyisa vathu ka otshe malwati ni ka totshe tixaka ta mipando. 36Ngako Jesu a di woni dibutho da vathu, a to va pfela wusiwana, nguko va titi karate ni kurereka, nga tinvuta to mbi na mdyisi. 37Senikoko a to womba ka vagondiswa vakwe, a txi khene: “Kuelula nga hombe, aniko sithumi nzidotho. 38Ngu kota yeto, kombelani ka Nyamne wa kuelula, ti to e rumela sithumi kuelulani kwakwe.”


Copyright
Learn More

will be added

X\