MATEWU 7

1“Mi nga lamuleni kasiku mi si lamulwi nanu. 2Ngukuva mi na lamulwa nga ti mi lamulisako tona vamwane; ni mpimo wu mi pimako ngu wona vamwane, mi na pimwa ngu wona nanu. 3Ngu kutxani u txi wona txizokoro txi txi ku disoni ka mkwanu, u si woni mtanda wu wu ku disoni kwako kani? 4Mwendo u nga wombawombisa ku txani ka mkwanu u txi: ‘Thutha ni thavisa txizokoro disoni kwako,’ kasi mtanda wu ho disoni kwako nawe, kani? 5Mxengeteli, thanga ngu kuthavisa mtanda wu, wu ku disoni kwako, ngu kona u no wonisisa tatinene kuthavisa txizokoro txi txi ku disoni ka mkwanu. 6“Mi nga thukeni mi ninga timbwa silo si si nga sawulwa, hambi kutshotsha tidhayimana tanu ka tikhumba, kasiku ti si ti kandeteli ngu mikondo, ti mi wukela, ti txi mi vhandamulela ngu makwasa. 7“Kombelani, mi na ningwa; lavani, mi na si mana; gogotani, mi na tulelwa. 8Nguko mmwane ni mmwane a kombelako, wa ningwa; awu a lavako, wa si mana; ni wule a gogotako, a na tulelwa. 9Ngu wuhi mthu hagari kwanu, a ningako mwanana wakwe dirigwi, ngako a txi mu kombela dipawu kani? 10Mwendo ngako a txi kombela txihaka, a nga mu ninga mnyoka, kani? 11Ngu konaho, hambi anu mi ku vathu va tshofu mi zivako kuninga sasinene ka vanana vanu, ngutungutu Tate wanu wa nzumani kha na mbi pindisa ku va ninga sasinene ava va mu kombelako kani? 12Ngu toneto koko, totshe ti mi ti lavako ku ve mi mahela vathu, va maheleni nanu. Awuwa ngu wona Mlayo ni gondo ya vaprofeti. 13“Wulelani ngu txike txo songa, nguko txike txa kuanama ni nzila ya kuanama si yisa kulovani; se mbavangi va wulelako ngu sona. 14Ngukuva txi nga songa txike ni nzila ya kona yi nga khwela, ayi yi yisako wutomini, mbadotho va yi manako. 15“Ti woneleni ka vaprofeti va makuhu, va tako kwanu va di ambate madhowo a tinvuta, kasi timbiluni kwawe ma xolwa ma vhandamulako. 16Mi na va ziva ngu mihando yawe. Ina mi nga hapha mauvha amu ka tikwakwati, mwendo maxanvu amu ka sihaha kani? 17Ngu toneto, wotshe mndonga wa wunene wu veleka mihando ya yinene, ani mndonga wo biha wu veleka mihando yo biha. 18Mndonga wa wunene kha wu si koti kuveleka mihando yo biha, ni mndonga wo biha kha wu si koti kuveleka mihando ya yinene. 19Mndonga wuhi ni wuhi wu si velekiko mihando ya yinene, wu na gangwa wu vinzwa ha mndiloni. 20Ngu konaho, mi na va ziva ngu mihando yawe. 21“Hi nga votshe vale va wombako kwangu va txi ‘Mkoma, Mkoma,’ ava va no wulela Mfumoni ka nzumani, aniko ngu wule a mahako kuranda ka Tate wangu a ku nzumani. 22“Ka edo ditshiku vavangi va na ta womba kwangu va txi: ‘Mkoma, Mkoma, ina athu kha ha profeta ngu ditina dako kani? Ina kha ha tovela madhimoni ngu ditina dako kani?’ 23Konaho, ani ni na ta va gela ha kubasani ni txi khani: ‘Txima kha na mi ziva; hambukani kule ni nani, anu vamahi va siwonho.’ ” 24“Ngu toneto, awu a engisako mapswi angu e ma veketa, a fanana ni mthu wo txhariha, a nga aka nyumba yakwe txitimwi ka dirigwi. 25Nzuma yi nite, minambo yi nje kutala ndambi, txingulu txi txi peka ngu mtamo txitimwi ka nyumba yile, aniko kha ya wa, nguko yi aketwe txitimwi ka dirigwi. 26“Kasi awule a engisako mapswi angu, a txi lamba ku ma maha, a fanana ni mthu wa dibhemba a nga aka nyumba yakwe ha divhunyeni. 27Se nzuma yi nite, minambo yi tala ndambi, txingulu txi peka mgu mtamo txitimwi ka nyumba yile, se yona yi khundumuka yi txi wa. Kuwa ka yona yi wisa manyala.” 28Mbimo yi Jesu a nga gwita kuwombawomba timhaka tiya, mabutho ma to xamala ngutu ngu kugondisa kwakwe. 29Ngukuva a titi va gondisa kufana ni mthu wu a ku ni wukoma, a si fani ni vabhali.

will be added

X\