MATEWU 4

1Senikoko Jesu a to yiswa txiwulani ngu Moya wo Sawuleka, kasi a txi ya dukwa ngu Sathane. 2A zumbile mune wa magumi a masiku a si dyi txilo wusiku ni mtshikari, se ngu msana a to pfa nzala. 3Senikoko m'duki a to tshuketa hafuhi kwakwe a txi khene: “Ngako u di Mwanana wa Txizimu, gela marigwi awa ti to me phinduka me maha mapawu.” 4Aniko Jesu a mu xamute a txi khene: “Ti bhatwe ti to: ‘Mthu kha na kuhanya ngu dipawu basi, kambe a hanya ngu otshe mapswi awa ma wombwako ngu Txizimu.’ ” 5Sathane a mu tekile e tsula nayo didhoropani ko sawuleka, a txi ya mu veka txiroroni ka Dithepele; 6e mu gela tiya: “U di Mwanana wa Txizimu, ndaka u txi jatama hahatshi. Nguko ti bhatwe ti to: ‘Txizimu txi na ruma tingelozi ta txona, ti txi ku wonelela, kasiku ti na ku khamukela manzani ka tona, ti to u si ti dayisi mikondo ha ka dirigwi.’ ” 7Jesu a m'xamute a txi: “Ti bhatwe kambe va txi: Khu nambi duka Mkoma Txizimu txako.” 8Sathane a to engeta kambe e mu teka a txi kwela nayo ka mmango wo lapha ngutu, e mu komba yotshe mifumo ya ditiko, ni tithomba ta yona; 9a txi mu gela tiya: “Ni na ku ninga sotshe siya, ngako u txi khizama u txi ni khozela.” 10Se Jesu a to khene: “Suka, Sathane! Ti bhatwe ti to: ‘U na khizamela Mkoma, Txizimu txako, ngene ekha u na ku mu khozela.’ ” 11Ti di mahile eto, Sathane a to khukha e mu leka. Konako tingelozi ti to tshuketela ti ta thumela Jesu. 12Ngako Jesu a di engisile ti to Johane a khotetwe, a to khukha e tsula Galileya. 13Se ngu msana, a txi khukha Nazareta, a to ya zumba Kapernawume, didhoropa di di ku hafuhi ni linene, ka ditiko da Zabhuloni ni Neftali, 14Kasi ti txi tatiseka ati ti nga wombwa ngu mprofeti a txi khene: 15“Ditiko da Zabhuloni ni da Neftali, nzila ya linene, mtxhatuko ka Jordhani, Galileya ka vamatiko; 16vathu va va nga ti zumbile ditikoni ka kuphuma, va woni liwoningo la hombe; ni ka va va nga ti zumbile ditikoni ka mtsudi wa lifo, ku humelete liwoningo txitimwi kwawe.” 17Kukhukhela ka txonetxo txikhati, Jesu a to khata kutxhumayela a txi khene: “Hundulukani, nguko Mfumo wa nzumani wu hokile.” 18Na a txi tsimbila ngu mabambe ka linene la Galileya, a to wona vathu vambidi va mkoma ni mnanda, Simoni, a dhanwako ku i Pedro, ni Andrewu mnanda wakwe, va nga ti beta tikoka lineneni, nguko i ti vakoki va sihaka. 19A to va gela a txi khene: “Ni londiseni, ni na mi maha vakoki va vathu.” 20Konako va to leka tikoka tawe, ve mu londisa. 21Se a txi pinda a txi ya masoni, a to wona vamwane va mkoma ni mnanda kambe, Jakobe, mwanana wa Zebhedhewu, ni Johane mnanda wake, mu ka ngalava, va nga ti rungetela tikoka tawe, kumweko ni tate wawe Zebhedhewu. Se e va dhana. 22Vona kunukunuko, va to leka ngalava ni tate wawe, ve mu londisa. 23Msana keto, a to khata kutsimbila ka dotshe ditiko da Galileya, a txi gondisa masinagogani, e txhumayela mahungu a maphya a Mfumo, na a txi hanyisa vathu ka otshe malwati ni ka yotshe mipando. 24Senikoko nduma yakwe yi to pfala kotshelele Siriya. Ve va tisa kwakwe votshe va va nga ti lwala ngu mipando yihi ni yihi, ava va nga txi xaniswa ngu malwati ni simwane sikarato, va madhimoni ni va vo tshanuka, ni silema; se ene a txi va hanyisa votshe. 25Se dibutho da vathu vo tala di to mu londisela, na va txi humela Galileya ni Dhekapoli ni Jerusalema ni Judheya ni mtxhatuko ka Jordhani.


Copyright
Learn More

will be added

X\