MATEWU 3

1Ka ale masiku, ku humelete Johane Mubhabhatisi e txhumayela txiwulani ka Judheya, 2a txi khene: “Hundulukani, nguko wu hafuhi Mfumo wa nzumani.” 3Johane ngene wuwa a nga wombwa ngu mprofeti Isaya, ngako a txi khene: “Dipswi da wu a huwelelako txiwulani di kha dona:Lungiselani nzila ya Mkoma, lulamiselani magondo akwe.” 4Ene Johane a ti ambate tinguwo to mahwa ngu madhowo a makamelu, e sunga libhande la didhowo txiwununi. Sakudya sakwe i ti humbi ni wulombe wa txitinga. 5Se va txi huma ve ya kwakwe vathu va Jerusalema ni va dotshe ditiko da Judheya ni va wotshe wukhalo wa Jordhani. 6Va txi bhabhatiswa ngu ngene mnamboni ka Jordhani, va txi ti tshanza siwonho sawe. 7Mbimo yi a nga wona vafarisi ni vasadhusi va txi lava kuta bhabhatiswa ngu ngene, a txi khene kwawe: “Lixaka la timamba i mani a nga mi laya, ti to mi thava txiviti txi txi tako kani? 8Humisani mihando yi yi dinganako kuhunduluka kwanu; 9mi nga ti kanganyiseni mi txi khanu: ‘Hi ni tate wathu Abrahamu’, nguko na mi gela ti to Txizimu txa si kota kuhindula marigwi awa ma txi maha vanana va Abrahamu. 10Kambe ditxhapu di vekilwe ha mikulutini ka mindonga. Ngu toneto, mndonga wuhi ni wuhi wu si velekiko mihando ya yinene, wu na gangwa wu tshotshwa ha mndiloni. 11Ani ni bhabhatisa ngu mati kasiku mi si kota ku ti laya, kambe awule a tako msana kwangu, ana ni mtamo kupinda ani, se ani kha ni nga ni fanelo yo ñola hambi tikathula takwe. Ene a na mi bhabhatisa ngu Moya wo Sawuleka ni mndilo. 12Manzani kwakwe, ana ni txiselo txo hehera, a na hiyela txithathe txakwe, e sengeleta timbewu takwe mu txisangalani: aniko makamba a na ma hisa ngu mndilo wo mbi timeka.” 13Ka yoneyo mbimo, Jesu a tile ngu Galileya a ta manana ni Johane Mubhabhatisi, mnamboni ka Jordhani, kasi kuta bhabhatiswa ngu ngene. 14Aniko Johane a to lamba a txi khene: “Ani ngani ni fanelako kubhabhatiswa ngu ngawe, se awe u ta kwangu kani?” 15Kambe Jesu a to mu xamula a txi khene: “Konakuwa ti leke eto, ku laveka hi txi londetela totshe ti hi fanelako ku ti maha.” Se Johane e mu tumelela. 16Jesu msana ka kuva a di bhabhatisilwe a to huma ngu matini. Konako, nzuma yi to tuleka, se Jesu e wona Moya wa Txizimu, wu nga ti relela nga dituva txitimwi kwakwe. 17Senikoko, ku pfala dipswi da kuta ngu nzumani, di txi: “Awuwa i Mwanana wangu wo randeka, awu ni tsakiswako ngutu ngu ngene.”

will be added

X\