MATEWU 28

1Msana ka ditshiku da Sabbata, se i di mabimbikutxa ka ditshiku do khata ka divhiki, Maria wa Magdhala ni mmwane Maria, va tsute ve ya wona dithuna. 2Se ku txi khata kuzinginikela ka hombe ka mafu, nguko ngelozi ya Mkoma yi ti txhikile ngu nzumani yi ta wumbuluta dirigwi, yi khalahatsha txitimwi ka dona. 3Khohe ya yona yi ti khetima nga kukeluka ka nzuma, se tinguwo ta yona ti ti basile kufana ni hunguva. 4Se vawoneleti, ngu ku yi thava va to dhuka va txi tsotsowolo nga va to fa. 5Aniko ngelozi yi to womba ka vavasikati yi txi: “Mi nga thaveni txilo, na ti ziva ti to mi lava Jesu, awuwa a nga ti bethetwe ha txihambanoni. 6Ene kha nga ho hawa, nguko a wukile nga ti a nga wombisa tona. Ngonani mi ta wona wukhalo wu a nga ti vekilwe ka wona. 7Kambe tsulani ngu kukuluveta mi ya gela vagondiswa vakwe, mi txi khanu: ‘Ene a wukile ngu ka vofa, kambe a na mi thangela kuya Galileya. Mi na ya mu wonela kona.’ Ngu toneto ni nga txi lava ku mi gela.” 8Se vona va di khukhile ha diyivani ngu kukuluveta, na va di tate ngu kuthava ni litsako la hombe, va to tutuma ve ya zivisa vagondiswa vakwe. 9Konako Jesu a to huma e va txingameta, a txi khene kwawe: “Xeweni!” Vona va to tshuketa hafuhi kwakwe, ve mu demberela milenge yakwe, ve mu khizamela. 10Jesu a to va gela a txi khene: “Mi nga thaveni txilo, tsulani mi ya gela vanathu ti to ve tsula Galileya, va na ya ni wonela kona.” 11Ngako vona va txi tsula, vamwane vawoneleti va to ya didhoropani, va txi ya zivisa vaphaxeli va hombe totshe ti ti nga humelela. 12Se ngako vaphaxeli va hombe va di sengeletani ni madhota a ditiko, ve maha navo txikungo, va to xavelela masotxhwa ngu male ya yingi ngutu, 13va txi va gela ku khona: “Wombani ku khanu vagondiswa vakwe va to ta ni wusiku, anu mi di otete, va ta mu pa. 14Ngako ti txi hoka tiya tinzeveni ka mfumeli, hi na ya m'kholwisa, hi txi mi vhikela.” 15Vona va to teka male ve mahisa tonti va nga leletiswa tona. Se mawombelo awa ma to hangalaka hagari ka Vajudha, ti wombiswa toneto kala ni nyamsi. 16Vagondiswa va digumi ni mmweyo va to tsula Galileya, va txi ya mmangoni hawa Jesu a nga va leleta kona. 17Mbimo yi va nga mu wona, va to mu khizamela, aniko vamwane ve khata kukanakana. 18Jesu a to tshuketa hafuhi, a txi khene kwawe: “Ni ningilwe mtamo wotshe nzumani ni ha mafuni: 19Ngu toneto tsulani mi txi ya phindula vamatiko votshe ve maha vagondiswa vangu, mi va bhabhatisa ngu ditina da Tate ni da Mwanana ni da Moya wo Sawuleka, 20mi txi va gondisa kuvekisa totshe tiya ni nga mi leleta tona. Se wonani, ni ni nanu yotshe mbimo kala kugumani ka mafu.”

will be added

X\