MATEWU 21

1Ngako va di hafuhi ni Jerusalema, na se va di hokile Bhetfage, mmangoni ka Olivheti, Jesu a to ruma vambidi ka vagondiswa vakwe. 2A txi va gela ku khene: “Tsulani ka m'ti wule wu ku masoni kwanu; konaho mi na ya mana mbongola ya makati, yi nga sungwa, na yi di ni tximbongolana. Yi thukunyuleni mi txi wuya nayo. 3Ngako mthu a txi mi angula, mi na khanu: ‘Mkoma ngene a ti lavako’, kambe a na kuluveta ku ti tshumeta.” 4Totsheleleto ti mahekile kasi kutatiseka ati ti nga wombwa ngu mprofeti, a nga khene: 5“Gelani dihorana da Siyoni, mi txi khanu:Ndiyo wa ta Mkoma wako wa kuthutha, a di gadhile mbongola, yi ku ni tximbongolana txi i ku mwanana wa yona.” 6Se vagondiswa va to tsula, ve ya mahisa tonati Jesu a nga va gelisa tona. 7Va to wuyisa mbongola ni tximbongolana, ve kapeka tinguwo txitimwi ka txona, se ve mu gadhisa. 8Se dibutho da vathu vo tala, va txi ateta tinguwo tawe ha nzila, vamwane va txi ganga matshanzu a mindonga, ve ma atetela ha nzila. 9Dibutho dile da vathu va nga ti thangela masoni kwakwe, ni vale va nga ti londetela ngu msana, va titi embelela va txi khona: “Hozana ka Mwanana wa Dhavhidha!A na dhumiswe awu a tako ngu ditina da Mkoma!Hozana txitimwi nzumani!” 10Se mbimo yi Jesu a nga wulela Jerusalema, didhoropa dotshelele di to dhuka, vathu va txi khona: “I mani wuwa kani?” 11Dibutho di txi angula, di txi: “Awuwa i Jesu, mprofeti wa Nazareta ka Galileya.” 12Seni Jesu a to wulela Dithepeleni e tovela votshe va va nga txi xavisa ni votshe va va nga ti xava, a txi hangalasa timeza ta vatxitxi va timale ni madhando a vale va nga ti xavisa situvane. 13A txi khene kwawe: “Ti bhatwe ku khona: ‘Nyumba yangu yi na dhanwa ku i nyumba ya kukhongelela ka yona.’Kambe anu mi yi maha wubaramelo wa makhamba!” 14Va to tshuketela kwakwe, kona Dithepeleni mule, mabhofu ni silema sa minenge, se ene a txi va hanyisa. 15Ngu mhaka ya sixamaliso si a nga ti si maha, ni vanana va nga ti embelela Dithepeleni va txi: “Hozana ka Mwanana wa Dhavhidha,” vaphaxeli va hombe ni vabhali va to henya, 16va txi mu gela ku khona: “Ina wa ti pfa ti va wombako kani?” Jesu a to xamula a txi khene: “Inna! Kasi kha mi nzi kugonda ti ta ku: ‘Ka mapswi a txisofu txa vanana va vadhoto ni txa va titxetxere u ti lulamisete wudhumo?’ ” 17Msana keto, a to khukha a txi va siya, e huma didhoropani e tsula Bhetaniya, ahawa a nga ya otela kona. 18Mbimo yi a nga txi wuya didhoropani, ni mixo ngutu, a to pfa nzala. 19Se a to wona mxanvu hafuhi ni nzila, a txi wu tshuketela, aniko kha mana txilo ka wona, hahanze ka mazokoro. Konaho, a to womba, a txi khene: “Yi nge ngadi yi velekwa mihando kwako!” Se kunukunuko mxanvu wu so woma. 20Vagondiswa, ngu kuwona tiya, va to diwuka va txi khona: “Ti mahisile ku txani mxanvu kukuluveta wu txi woma, kani?” 21Jesu a xamute a txi khene: “Kha ditshuri na mi gela ku khani: Ngako mi di ni likholo, mi si kanakani, kha mi na mbi maha basi ati ni nga maha ani ka mxanvu wuwa, hambi idiku mi khanu ka mmango wuwa: ‘Khunuka eho u txi ti tshotsha lineneni’, ti na maheka. 22Se sotshe si mi no kombela ngu kukholwa, na mi txi khongela, mi na si amukela.” 23Msana keto, a to wulela Dithepeleni. Mbimo yi ene a nga txi gondisa, vaphaxeli va hombe ni madhota a ditiko va to mu yela va txi ya khona kwakwe: “U wu mana hani mtamo wa kumaha tiya kani? I mani a nga ku ninga mtamo wo ngeto kani?” 24Jesu a va angute a txi khene: “Nanani ni lava ku mi mahela txiwotiso, se ngako mi txi ni xamula ka txona, anani ni na mi gela ti to ni maha tiya ngu mtamo muni. 25Mtamo wa kubhabhatisa ka Johane wu ta ngu hani kani? Wu ta ngu nzumani mwendo wu ta ngu ka vathu kani?” Aniko vona va to khata kualakanya timbiluni kwawe va txi “Ngako hi txi angula ti to: ‘Wu ta ngu nzumani’, a na hi wotisa ti to: ‘Njani hi nga mbi kholwa kani?’ 26Se hi txi angula ti to: ‘Wu ta ngu ka vathu,’ hi thava kuwukelwa ngu dibutho, nguko votshe va kholwa ti to Johane i mprofeti.” 27Se va to angula ka Jesu va txi: “Kha hi ti zivi.” Senikoko, nene a nje khene: “Nanani kha ni na mbi mi gela ti to ni maha tiya ngu mtamo muni. 28“Mi yi wonisa ku txani mhaka yiya kani? Mthu wo kari a ti ni vanana vambidi. A txi gela mkoma wa kona, a txi khene: ‘Mwanangu, tsula nyamsi u ya thuma thembweni ka mivhinya’. 29Aniko ene a to angula a txi khene: ‘Kha ni ti lavi’. Kambe ngu msana a to ti laya se e tsula. 30A di yite ka mnanda wa kona, a to mu gela nene toneto, se ene e xamula a txi khene: ‘Inna, ni na tsula, tata’. Kambe kha tsula. 31Se i mani ka vona va vavambidi, awu a nga maha kuranda ka tate wakwe, kani?” Se vona va txi khona: “Ngu wule wo khata.” Jesu a to va gela a txi khene: “Ngu ditshuri nanani na mi gela: Vakhupisi ni magelegele va na mi thangela kuwulela Mfumoni ka Txizimu. 32Nguko Johane a tile kwanu a ta mi gondisa nzila ya kululama, kambe kha ma kholwa ngu ngene, kasi vakhupisi ni magelelegele va khotwe ngu ngene; kasi anu, hambiko mi nga wona tiya, kha ma si kota kuhunduluka mi txi kholwa ngu ngene. 33“Engisani txidinganiso tximwane: A titi ho mthu, i ngadi nyamne wa m'ti, awu a nga phaya mivhinya e yi bhiyela ngu libhiyo la mindonga, a txi kelela nzeka ya kukamela ka yona mihando yakwe, e aka txitezi, ngu msana a txi ningela thembwe yiya ka vadimi, se ene a txi teka dipfhumba da kuendela ditikoni ka kule. 34Mbimo yi ku nga hoka nyango ya kuelula, a to ruma sithumi sakwe ka vadimi kasi kuya amukela mitxelo yakwe. 35Aniko vadimi va to ñola sithumi, ve peka mmweyo, ve daya mmwane, se wa wuraru ve mu balisela ngu marigwi. 36Se ene a to engeta e ruma simwane sithumi, sa singi ngutu kupinda so khata, aniko ka vonavo nivona, va to va mahela tonati va nga maha ka va vo khata. 37Se nyamne wa m'ti e za e ruma mwanana wakwe apune, a txi khene: ‘Va na va ni txithavo ngu ngene.’ 38Aniko vadimi, mbimo yi va nga wona mwanana wakwe, va to langana va txi khona: ‘Awuwa ngene i ku m'dyi wa thomba. He mu dayeni, hi na sala ni thomba yakwe.’ 39Se va to mu ñola, ve mu ruruvisa ve mu yisa hahanze ka thembwe ya mivhinya, ve mu daya. 40Ngako a txi ta nyamne wa mivhinya yile a na ta maha txani ngu vathu vale va vadimi kani?” 41Vona va to angula va txi khona: “A na va fuvisa vathuvo vo biha, senikoko a na ningela thembwe ya mivhinya ka vamwane vadimi, ava va na ku mu wuyisela mihando yakwe ngu nyango yi yi lavekako.” 42Jesu a to va gela a txi khene: “Kasi kha ma gonda ka Mibhalo ti ta ku: ‘Dirigwi dile di nga lambwa ngu vaaki di tshumete di maha dirigwi da hombe do tsanisa. Atiya ti mahilwe ngu Mkoma, kambe ta xamalisa masoni kwathu.’ 43Ngu toneto, na mi gela ku khani: Mfumo wa Txizimu wu na thaviswa kwanu, wu ningelwa ka dimwane ditiko, adi di no si kota kuhumisa mihando ya wona. 44[Awule a no wela txitimwi ka dirigwi diya a na bhandekela e khatukela; awule a no welelwa ngu dona, a na phwaraselwa.”] 45Vaphaxeli va hombe ni vafarisi, ngako va txi engisa sidinganiso sakwe, va to ti mana ti to a wombawomba ngu vona. 46Se va ti lava ku mu ñola, aniko va to thava dibutho da vathu, nguko vona va titi mu ziva nga mprofeti.


Copyright
Learn More

will be added

X\