MATEWU 2

1Ngako Jesu a di velekilwe Bhetlehema ka Judheya, ka mbimo ya mfumeli Herodha, konaho titxhari ta wutxani ti to bwaka Jerusalema, 2ti txi: “A hani mfumeli wa Vajudha awu a nga velekwa? Nguko hi woni nyeleti yakwe wutxani, se hi tile kuta mu khozela.” 3Se a txi engisa tiya Herodha, a to dhuka ngutu, ene ni dotshe didhoropa da Jerusalema. 4Se a to dhana vaphaxeli va hombe ni vabhali va ditiko, a txi va wotisa ahawa a nga ti fanela kuvelekelwa kona Mesiya. 5Se vona va mu gete va txi: “I Bhetlehema ka Judheya ngukusa ti bhatwe toneto ngu mprofeti a txi khene: 6‘Awe Bhetlehema, ditiko da Judheya, khu nga didhoropa da didotho hagari ka madhoropa a hombe a Judha, nguko mthangeli wu a no xayisa ngamu yangu Israyeli a na velekelwa kwako.’ ” 7Senikoko Herodha, a di dhani phuho titxhari tile, a to ti wotisisa kwati mbimo yi nyeleti yi nga va humela ngu yona. 8Se a txi va rumela Bhetlehema, a to va gela a txi khene: “Tsulani mi txi ya wotisela tatinene mhaka ya mwananeyo; kambe ngako mi txi mu mana, ni ziviseni, kasiku nanani ni tsula ni ya mu khozela.” 9Se ngako vona va di engisile mapswi a mfumeli, va to tsula, se nyeleti yi va nga ti yi woni wutxani yi to thangela masoni kwawe, yi za yi txi ya ema txitimwi ka wukhalo wu mwanana a nga ti ka wona. 10Ngako va di yi woni kambe nyeleti yileya, va to tala ngu litsako la hombe. 11Se va di wulete nyumbani, va mani mwanana ni mame wakwe Maria, se va txi khizama, va to mu khozela. Va di tute mikwama yawe va to mu luva ngu nzalama ni dibaselo ni mira. 12Ngako va di zivisilwe ngu mu ka miloro, ti to va si pindi ngu ka Herodha, va to tshumela ngu yimwane nzila ve tsula ditikoni kwawe. 13Msana ka kuva ti di khukhile titxhari, ngelozi ya Mkoma yi to woneka ngu miloro ka Josefa, yi txi mu gela tiya: “Khukha, teka mwanana ni mame wakwe, thava u txi ya Egipta. Inda ya zumba konakheyo kala nita ku zivisa, nguko Herodha a na lava mwanana wu kasiku e mu daya.” 14Josefa a to khukha ni wusiku, e teka mwanana ni mame wakwe, e tsula Egipta. 15A ti ya zumba koneyo kala a txi fa Herodha, kasi kutatiseka ati Mkoma a nga womba ngu txisofu txa mprofeti, a nga khene: “Ni dhani Mwanana wangu e huma ngu Egipta.” 16Ngako Herodha a di woni ti to a kanganyisilwe ngu titxhari, a to henya ngutu, se e rumela kuya dayela votshe vanana va sizambiana va Bhetlehema ni va dotshe ditiko da kona, va tanga ya malembe mambidi ni kuya hahatshi, madingano ni mbimo yi a nga wotisisa ngu yona ka titxhari. 17Konaho ku tatisekile ati ti nga wombwa ngu mprofeti Jeremiya, a nga khene: 18“Huwa yi pfate Rama, kudila ni kupandiseka ka hombe: I Rakeli a dilako vanana vakwe a si tumeli ni kuthavelelwa, nguko vanana kha va nga ngadi ho.” 19Mbimo yi Herodha a nga fa, ngelozi ya Mkoma yi to woneka ngu miloro ka Josefa, kona ditikoni ka Egipta, yi txi mu gela tiya: 20“Khukha u txi teka mwanana ni mame wakwe, u txi tsula ditikoni ka Israyeli, nguko avale va nga ti bheja kudaya mwanana se va fite.” 21Josefa a to khukha e teka mwanana ni mame wakwe, e wuya ditikoni ka Israyeli. 22Aniko mbimo yi a nga engisa ti to Arkelawu ngene a fumako Judheya, kutsiveta tate wakwe Herodha, Josefa a to kanakana kuwuya. Se a di zivisilwe ngu miloro, a to khukha a txi ya ditikoni ka Galileya; 23e ya aka ka didhoropa di di dhanwako ku i Nazareta ahawa a nga ya zumba kona, kasi kutatiseka ati ti nga wombwa ngu vaprofeti va txi: “A na dhanwa ku i Munazareta.”

will be added

X\