MATEWU 19

1Jesu, a di gwitile kutxhumayela timhaka tiya, a to khukha Galileya e tsula madhawani ka Judheya, mtxhatuko ka Jordhani. 2Se mabutho o tala ma to mu londisa, se ene a txi va hanyisa konaho. 3Vafarisi ngu kulava ku mu duka, va to ta kwakwe, va txi ta khona: “Ina ta tumeleka ka wamwamna kutovela msikati wakwe ngu mhaka yihi ni yihi kani?” 4Ene a to xamula, a txi khene: “Ina kha ma gonda ti to: ‘Muvangi, kukhatani, a va mahile mwamna ni msikati.’ 5Se, a txi khene: ‘Ngu konaho wamwamna a na siya tate wakwe, a txi namarela ka msikati wakwe, se vona ngu wumbidi wawe va na va nga mthu mmweyo dwe.’ 6Ngu toneto, se hi nga ngadi vambidi, yo va mmweyo dwe. Ngu konaho, asiya Txizimu txi nga si patanisa, mthu a nga thuke a txi si abanisa.” 7Vona va to wotisa va txi khona: “Ngu ku txani Mosi a nga veka mlayo wa ku mu ninga dipapilo da kudaya wukati ni ku mu tovela kani?” 8Ene a xamute a txi khene: “Mosi, ngu mhaka ya kubanga ka timbilu tanu, a mi tumelete kutovela vasikati vanu, aniko kukhatani i ti singa toneto. 9Senikoko, ani na mi gela ku khani: Awule a tovelako msikati wakwe, hahanze ka kuva a sa tekana nayo ngu mlayo, ngu msana a txi teka mmwane, a maha txiwonho txa wugango.” 10Vagondiswa va to khona kwakwe: “Ngako timhaka ta kutekana ka wamwamna ni wamsikati ti di zumbisile eto, kha ti tshuri kutekana.” 11Ene a to khene kwawe: “Hi nga votshe va di manako dipswi diya, tsena avale va nga ningwa. 12Ngukusa ya ho mithenwa yi nga velekiswa toneto ngu mndani ka vamame vawe; ya ho kambe mithenwa yi nga mahwa ngu vathu; se ya ho yimwane mithenwa kambe yi nga ti thena yipune ngu kufela Mfumo wa nzumani. Awu a si kotako ku ti pfisisa a na ti pfisise.” 13Senikoko, va to tiswa kwakwe vanana kasiku e va sanzeka manza ni ku va kombelela; se vagondiswa va txi va tsimbisela. 14Aniko Jesu a wombile kwawe, a txi khene: “Lekani sivananana, mi nga si tsimbiseleni kuta kwangu, nguko Mfumo wa nzumani wu lumba vo nga sona.” 15Ngako a di va sanzekile manza, a to khukha a txi tsula. 16Konaho, mmweyo a to mu tshuketela, a txi khene kwakwe: “Mgondisi wa mnene, nji txani txa txinene ni fanelako ku txi maha, kasiku ni mana wutomi wo mbi guma kani?” 17Jesu a to mu wotisa a txi khene: “U wotisela txani ngu mhaka ya tiya i ku ta tinene kani? Wamnene i mmweyo basi. Aniko, u txi lava kuwulela wutomini ko mbi guma, veketa milayo.” 18Ene a to wotisa, a txi khene: “Ngu yihi kani?” Jesu a mu xamute, a txi khene: “U nga daye, u nga mahe wugango, u nga pe, u nga ve fakazi ya makuhu, 19thava tate wako ni mame wako; randa muakelani wako nga ti nawe u ti randisako tona.” 20Awule wa dijaha, a to angula, a txi khene: “Totsheleleto ni ti veketile kukhukhela ha wananani kwangu. Nji txani kambe txi nga sala kani?” 21Jesu a to xamula, a txi khene: “Ngako u txi lava kumaha mthu wo hetiseka, tsula u txi ya xavisa sotshe si u ku naso, u txi ninga sisiwana, u na ya mana thomba nzumani; se ngono u txi ni londisa.” 22Ngako a txi engisa tiya, awule wa dijaha a to tsukula e khukha, nguko a ti ni tithomba. 23Se konaho, Jesu a to gela vagondiswa vakwe a txi khene: “Kha ditshuri na mi gela ku khani: Ta karata kuwulela Mfumoni ka nzumani awule a ku ni tithomba. 24Na engeta ni txi mi gela ku khani: Ta hehuka ngutu kuwulela dikamelu ha ditshokoni ka txhingane, kupinda kuwulela nyatithombe Mfumoni ka Txizimu.” 25Vagondiswa, ngako va txi engisa tiya, va to xamala ngutu, va txi khona: “Se i di to, ku na huluka mani?” 26Jesu a to va wonisisa, a txi khene kwawe: “Ka vathu eto kha ti koteki, aniko ka Txizimu totshe ta koteka.” 27Pedro a to womba kwakwe a txi khene: “Athu hi lekile sotshe, hi txi ku londisa, se hi na dihelwa ngu txani kani?” 28Jesu a to xamula a txi khene: “Kha ditshuri na mi gela ku khani: Ka mbimo ya kuwusetwa ka wuphya wa sotshe, ditshiku diya Mwanana wa Mthu a no ta khalahatsha ha txikhaloni kwakwe ka wukoma wa kupfaliswa, nananu, mi nga ni londisa, mi na ta khalahatsha ka digumi da sikhalo sa wukoma ni simbidi, mi txi lamula tihunzu ta digumi ni timbidi ta ka Israyeli. 29Se wuhi ni wuhi, a nga leka tinyumba, vanawe, tindiyakwe, tate, mame, msikati, vanana mwendo tithembwe ngu mhaka ya ditina dangu, a na amukela sa kupinda ngutu asile, se ngu msana a na mana thomba ya wutomi wo mbi guma. 30Vavangi vo thanga va na va i di vo gwitisa, ani vavangi vo gwitisa va na i di vo thanga.

will be added

X\