MATEWU 17

1Senikoko, ku di pindile mtxhanu wa masiku ni dimwedo, Jesu a to teka Pedro ni Jakobe ni Johane, mwanawe Jakobe, e tsula navo, vona vokha, ka mmango wo lapha. 2Se konaho a to phinduka masoni kwawe: Khohe yakwe yi phatima kufana ni ditambo, ni tinguwo takwe ti hinduka ti txi basa kufana ni liwoningo. 3Koneko va to woneka Mosi ni Elija, va nga ti bhula nayo. 4Pedro a to womba ka Jesu a txi khene: “Mkoma, ndinene ku hi zumba konahawa. Ngako u txi ti lava, hi na aka konahawa midhute yiraru, wumwewo mbwako, wumwane mbwa Mosi ni wumwane mbwa Elija.” 5Ene a di ngadi a txi womba tiya, ku to humelela direfu do woninga, di nga va fenengeta, se direfuni mule ku to pfala dipswi, di di nga womba tiya: “Awuwa i Mwanana wangu wo randeka ngutu, awu ni tsakiswako ngutu ngu ngene. Mu engiseni!” 6Mbimo yi va nga engisa mapswi awa, vagondiswa va to wa hahatshi ngu timbanza, va txi telwa ngu dizowa da hombe ngutu. 7Senikoko, Jesu a to va tshuketela, e va wusa, a txi khene: “Khukhani mi txi ema, mi nga thaveni txilo!” 8Mbimo yi va nga gula maso, kha va wona mmwane, hahanze kwakwe ene Jesu. 9Se mbimo yi va nga ti relela ngu mmangoni niya, Jesu a va layile, a txi khene: “Mi nga wombeni ni ka wammweyo txidiwukiso txi mi nga txi wona, kala mbimo yi Mwanana wa Mthu a no wuka ngu ka vafi.” 10Vagondiswa vakwe va mu wotisile va txi khona: “Ngu ku txani vabhali va wombako ti to Elija a fanela kuthanga ene a txi ta, kani?” 11Se ene a txi angula, a to khene kwawe: “Kha ditshuri, Elija a fanela kuta, a ta lungisela sotshe. 12Aniko ani na mi gela ku khani: Elija a tile, kambe kha va mu ziva; va mu mahile totshe ti va nga ti lava. Ngu toneto, Mwanana wa Mthu nene a na xaniswa ngu vona.” 13Konaho, vagondiswa vakwe va ti mani ti to a wombawomba ngu Johane Mubhabhatisi. 14Ngako va di hokile ka dibutho, mmweyo wa mwamna a to mu tshuketela hafuhi kwakwe, a txi mu khizamela, a txi khene kwakwe: 15“Mkoma, pfela wuxinji mwanana wangu, a lwalako ngu txitshanuka; wa xaniseka ngutu. Sikhati so tala a wela ha mndiloni ni matini. 16Ni mu nehile ka vagondiswa vako, aniko va mu tandi ku mu hanyisa.” 17Jesu a to xamula a txi khene: “Lihunzu la vathu va ku ambi kholwa ni vo soholoka, ni na va ni nanu kala txikhati muni kani? Ni na timisela ngu nganu kala ditshiku muni kani? Mu tiseni hawa kwangu.” 18Jesu a to dhusa didhimoni, se didhimoni di huma ngu ka mfana wule, se ene a txi hanyiswa ka yoneyo mbimo. 19Senikoko, vagondiswa va to tshuketela Jesu, va txi mu gela ngu phuho va txi khona: “Hi tandekisile ku txani athu kutovela didhimoni diya kani.” 20Jesu a va xamute a txi khene: “Ngu mhaka ya ku tumela kwanu kakudotho, nguko kha ditshuri ni khani kwanu: Ngako mi di ni kukholwa ko fana ni mbewu ya sinapi, mi na womba ka mmango wuwa, mi txi khanu: ‘Khukha hawa u txi ya haleya’, wona wu na khukha. Txi walo ni tximwetxo mi no txi tanda. 21[Aniko lixaka liya la madhimoni kha li tovelwi, hahanze ka kukombela ni ku ti tona sakudya.”] 22Ngako va di sengeletanile Galileya, Jesu a to va gela vagondiswa vakwe a txi khene: “Mwanana wa Mthu a na ningelwa manzani ka vathu; 23vona va na mu daya, aniko ngu ditshiku da wuraru a na wuka.” Konako, vona va to telwa ngu dikhodho ngutu. 24Ngako va di hokile Kapernawume, vasengisi va mkhupo wa Dithepele va to ta ka Pedro, va txi ta khona: “Mgondisi wanu kha humisi mkhupo wa Dithepele kani?” 25Ene a va xamute a txi khene: “Inna, wa humisa.” Mbimo yi a nga wulela nyumbani, Jesu a to thanga ene a txi khene ka Pedro: “U wona txani ngu mhaka yiya, awe Simoni? Vakoma va ha mafuni va sengisa ni kukhupisa vamani kani? Va khupisa vanana vawe, mwendo va khupisa vamatiko kani?” 26Ene a xamute a txi khene: “Va khupisa vamatiko.” Jesu a nje khene kwakwe: “Ngu toneto, vanana vawe va va leka. 27Aniko, kasiku hi si va khuvekisi, tsula lineneni u txi ya dota, teka txihaka txo khata txi no ñolwa ngu ndowo. Txi tule txisofu, u na mana male ya txitateri; yi teke u txi dihela ngu ngani ni nawe.”

will be added

X\