MATEWU 14

1Ka yoneyo mbimo, mfumeli Herodha, a di engisile nduma ya Jesu, 2a to gela malanda akwe, a txi khene: “Awuwa i Johane Mubhabhatisi a nga wuka ngu ka vafi; ngu konaho mtamo wu wa kumaha sidiwukiso wu thumako kwakwe.” 3Nguko Herodha a ti ñote Johane a txi mu sunga e mu khotela mkorani, ngu mhaka ya Herodhiya, msikati wa Filipi, mnanda wakwe. 4Nguko Johane a titi khene kwakwe: “Kha ti tumeleki ku m'teka e maha msikati wako.” 5Se a ti lava nzila ya ku mu daya, aniko e thava vathu, nguko vona va titi khona i mprofeti. 6Ngu ditshiku da kutshanganisa malembe a kuvelekwa ka Herodha, mwanana wa muhorana wa Herodhiya a sinyile hagari ka vathu, e tsakisa Herodha. 7Ngu toneto ene a to mu thembisa, ngu kuxambanya, ti to a na mu ninga ni txihi txi a no kombela. 8Se ene, ngu kukujetelwa ngu mame wakwe, a to khene: “Ni ninge konahawa, amu ka mbiya, msungo wa Johane Mubhabhatisi.” 9Se mfumeli a to pandiseka, aniko ngu mhaka ya kuxambanya kwakwe, ni mhaka ya vale a nga ti navo ha mezani, a to ruma ti to ve mu ninga. 10Ngu toneto, a to ruma vathu ve ya wila msungo wa Johane, mkorani. 11Vona va to neha msungo wakwe mu ka mbiya, ve wu ningela ka wule wa txihoranana, se ene e wu heleketa ka mame wakwe. 12Vagondiswa va Johane va tile va ta teka txirumbi txakwe va txi ya kelela, se ve tsula va txi ya zivisa Jesu. 13Ngako Jesu a di engisile tiya, a to khukha konaho ngu ngalava e tsula ka wukhalo wa txiwula ene ekhalela; aniko vathu, mbimo yi va nga ti engisa, va to khukha ve mu londeta ngu minenge, va txi khukhela mitini kwawe. 14Se a di humile ngu ngalavani, Jesu a to wona dibutho da hombe da vathu, se e va pfela wusiwana, a txi hanyisa valwali vawe. 15Se ni minova, vagondiswa va to tshuketa hafuhi kwakwe, va txi mu gela tiya: “Awuwa wukhalo njiwula, ditambo nidona se di swite, tshumeta vathu vava, ve ya mitini va txi ya ti xavela sakudya.” 16Aniko Jesu a to va gela a txi khene: “Ahim-him, kha ku laveki va txi tsula; va ningeni anu sakudya.” 17Vona va to xamula va txi khona: “Ahawa kha hi nga ni txilo, hahanze ka mtxhanu wa mapawu ni sihaka simbidi.” 18Ene a to womba a txi khene: “Si wuyiseni kheno kwangu.” 19Ngu msana keto, a to gela vathu ti to ve khalahatshela ha mwasini. Se e teka mapawu yale a mtxhanu ni sihaka sa simbidi, e guleta maso a txi wona nzumani, e si katekisa, a txi si bhandelela, ngu msana e si ningela ka vagondiswa, se vagondiswa ve si avela ka vathu. 20Votshe va dyite ve khura; ngu sikhwemu si si nga sala va to tata digumi da sirundu ni simbidi! 21Kambe avava va nga dya i ti mtxhanu va makumi a mazana, ku si balwi vavasikati ni vanana. 22Se kunukunuko Jesu a to kurumeta vagondiswa ti to ve bela ngalavani, ve thangela kuya mtxhatuko, na ene a di ngadi a txi salisana ni dibutho. 23Ngako a di gwitile kusalisana ni vathu, a to kwela mmangoni Ene ekhalela, kasi kuya maha mkombelo. Se di swa ditambo, ene a di ekhalela konaho. 24Se ngalava yi ti tsimbite mnava wa kuya kule ni mafu mametro a mangi, yi txi pengapengiswa ngu mavimbi, nguko diphuho di ti va lambela. 25Ngu txikhati txa wumune txa kupilela, Jesu a to va yela, na a txi tsimbila ngu txitimwi ka mati. 26Mbimo yi va nga mu wona a txi tsimbila txitimwi ka mati, vagondiswa va to dhuka, va txi khona: “Txigono!” Va txi peka tihuwa ngu kuthava. 27Ka txonetxo txikhati, Jesu a to va angula a txi khene: “Tsanani misana, ngani, mi nga thaveni txilo!” 28Pedro a to xamula a txi khene: “I di awe, Mkoma, ni dhane ni txi ta kwako ngu txitimwi ka mati.” 29Jesu a nje khene: “Ngono!” Pedro a di txhikile ngu ngalavani, a to tsimbila txitimwi ka mati a txi ya ka Jesu. 30Aniko txikhati txi a nga pfa diphuho kuvhukuka, a to telwa ngu dizowa, e khata kubhwabhwamela, e peka huwa, a txi khene: “Mkoma, ni huluse!” 31Jesu kunukunuko a to nawuluta diwoko dakwe, e mu ñola, na a txi mu gela tiya: “Mthu wa kukholwa ka kudotho, nji txani u txi kanakana?” 32Se va di wulete ngalavani, diphuho di to renga. 33Se ava va nga ti ngalavani, va to tshuketa ve mu khizamela, va txi khona: “Kha ditshuri u Mwanana wa Txizimu!” 34Ngako va di txhatukile va to hoka ka ditiko da Genezareta. 35Se ngako vathu va kona va di mu zivile ti to ngene, va to rurutela ka totshe tiphuho ta ditiko dile ti to ve neha kwakwe votshe va va nga ti ni malwati. 36Se va txi mu kombela ti to e va tumelela kugwesa hambi tshoka ya nguwo yakwe dwe; se votshe va va nga mu gwesa, va to hanyiswa.

will be added

X\