MATEWU 13

1Ka dile ditshiku, Jesu a to huma ngu nyumbani e ya khalahatsha hafuhi ni linene. 2Se ku to tshangana masoni kwakwe dibutho da hombe ngutu da vathu, ahawa a nga za e wulela ngalavani e ya khalahatsha ka yona, na dotshe dibutho di di emile mabambe. 3Seni a to va gela timhaka ta tingi ngu sidinganiso, a txi khene: “Mphayi a humile a txi ya phaya. 4Mbimo yi a nga ti phaya, yimwane mbewu yi to wela ha nzila, se si ta sinyana si ta yi jokotela. 5Yimwane mbewu yi to wela ha wukhaloni ka marigwi, ahawa ku nga ti singa ni mafu a mangi; se yi mila ngu txikuluveta, nguko mafu ma ti sa tshima. 6Aniko mbimo yi ditambo di nga huma, mbewu yi to hya ngu lisani, yi woma ngukuva yi singa ni mikuluti. 7Yimwane mbewu yi to wela hagari ka mipa, se mipa yi txi kula kumweko nayo, yi so yi kura. 8Yimwane, ngu kugwitisa, yi to wela ka mafu a manene yi veleka mihando: Nyingi yimweyo yi veleka dizana, yimwane mtxhanu wa makumi ni dimwedo, yimwane makumi mararu. 9Awule a ku ni tinzeve to engisa a na engise!” 10Vagondiswa va to mu tshuketela hafuhi, va txi khona: “Nji txani u txi va wombawombela ngu sidinganiso?” 11Se ene a to va xamula a txi khene. “Nguko anu mi ningilwe kuziva misisalo ya Mfumo wa nzumani, aniko vona kha va ningwa txilo. 12Nguko awule a ku naso, a na ningwa kasiku e tatiselwa; aniko awule a singa naso, a na tekelwa hambi ni sile a ku naso. 13Ngu toneto ni wombako navo ngu sidinganiso; nguko va wona, aniko kha va wonisisi; va engisa aniko kha va engisisi ni kupimisa. 14Ti na tatiseka atiya ti nga wombwa ngu mprofeti Isaya, akuwa a nga khene: ‘Mi na engisa walo ngu tinzeve, aniko kha mi na mbi ti mana; mi na wona ngu maso, aniko kha mi na mbi ti wonisisa.’ 15Nguko timbilu ta vathu vava ti bangile, futsi kambe tinzeve tawe ti tsivekile, maso awe ma vhalekile, kasiku va si woni ngu maso, va si engisi ngu tinzeve, va si pimisi ngu timbilu tawe, va nga thuka ve hunduluka ve mana kuhanyiswa.” 16“Kasi i di anu, maso anu ma katekile nguko ma wona, tinzeve tanu nitxona ti katekile nguko ta engisa. 17Ngu ditshuri na mi gela ku khani: vaprofeti va vangi ni valulami va navete kuwona ati mi ti wonako, aniko kha va ti wona; va navete kuengisa ati mi ti engisako, aniko kha va engisa. 18“Ngu konaho engisani khakwati txidinganiso txa mphayi. 19Ngako mthu a txi engisa dipswi da Mfumo, a si di engisisi, ku ta m'bihi a ta fukula asile si nga ti phayilwe mbiluni kwakwe. Awuwa njifananiso txa mbewu ya kuwela ha nzila. 20Awule a nga amukela mbewu ha wukhaloni ka marigwi, ngu wule a engisako dipswi ngu txikuluveta ni kutsaka, aniko wo ziva ku di amukela ka txonetxo txikhati, 21kambe ene apune kha na mikuluti, kha tsana: ngako ku txi ta kupandiseka mwendo kuxaniseka ngu mhaka ya dipswi, wa kuluveta e rereka. 22Awule a nga amukela mbewu hagari ka mipa, ngu wule a engisako dipswi, aniko sithikamezo sa ditiko ni kuxengwa ngu tithomba, sa kama dipswi kasi di si veleki mihando. 23Ani wule a nga amukela mbewu ka mafu a manene, ngu wule a engisako dipswi, e di veketa; eyo ngene a velekako mihando, ahawa a txi veleka dizana, ahawa mtxhanu wa makumi ni dimwedo, ahawa makumi mararu.” 24Jesu a to va mahela tximwane txidinganiso, a txi khene: “Mfumo wa nzumani wu fanana ni mthu a nga phaya mbewu ya yinene thembweni kwakwe. 25Aniko, hagari ka wusiku, vathu, va di otete, a tile mlala wakwe a ta phaya nyasavari hagari ka fulaho, se ngu msana e huma. 26Mbimo yi fulaho yi nga mila yi txi veleka, ku to humelela nyasavari nene. 27Se sithumi si to ya gela nyamne wa m'ti si txi: ‘Mkoma, ina txima hi nga mbewu ya yinene u nga phaya thembweni kwako kani? Se a humela hani nyasavari, kani?’ 28Ene a to xamula a txi khene: ‘I mlala a nga maha eto.’ Se sithumi si nje kwakwe: ‘Wa ti lava kani hi tsula hi ya dulela nyasavari?’ 29Ene e va xamula a txi khene: ‘Ahim-him, nguko mi nga, ma thavisa nyasavari, mi thuka mi pata ni fulako mi dula.’ 30Si lekeni si txi kula ngu wumbidi wa sona kala kuelulani. Se ngu txikhati txa kuelula, na ta gela vaeluli ni txi khani: ‘Dulelani nyasavari, kuthanga, mi mu sungelela ngu tinyanda, kasi e hiswa; ani fulaho yi theleleni txisangalani kwangu.’ ” 31Se a to va mahela kambe tximwane txidinganiso a txi khene: “Mfumo wa nzumani wu fanana ni mbewu ya sinapi, ayi mthu wo kari a nga yi teka, e yi phaya thembweni kwakwe. 32I mbewu ya yidotho ngutu ka totshe timbewu, aniko msana ka kuva yi di kute, yi maha tximilwa txa hombe kupinda sotshe similwa sa thembweni, yi txi kula yi maha mndonga, ahawa ko za hambi sinyana sa nzuma si ta zumba madhavini ka wona.” 33Se a to engeta e va gela tximwane txidinganiso a txi khene: “Mfumo wa nzumani wu fanana ni mtshumbelo, awu wamsikati wo kari a wu tekako e wu pata mu ka mipimo miraru ya mpupu, kala kuza sotshe si vila.” 34Totshe timhaka tiya Jesu a ti wombile ngu sifananiso ka dibutho; a ti si va geli txilo, na i singa ngu sifananiso; 35kasi kutatiseka ati ti nga wombwa ngu mprofeti, a nga khene: “Ni na tula txisofu txangu ni wombawomba ngu sidinganiso; ni txi nuwela timhaka ti ti nga ti sisilwe kukhukhela kumahwani ka ditiko.” 36Se ngako a di lekile mabutho, Jesu a to wulela nyumbani. Se vagondiswa vakwe ve tshuketela hafuhi kwakwe, va txi khona. “Hi txhamusele txidinganiso txa nyasafari wa thembweni.” 37Ene a to xamula a txi khene: “Awule a phayako mbewu ya yinene ngu Mwanana wa Mthu; 38thembwe ngu ditiko; mbewu ya yinene ngu vanana va Mfumo; nyasavari ngu vanana va m'bihi. 39Mlala wu a nga phaya nyasavari ngu sathane; kuelula ngu kugumani ka ditiko; ani vaeluli ngu tingelozi. 40Kufana ni kuleya nyasavari a wungeletelwako e hiswa ngu mndilo, ngu toneto ti no mahwa kugumani ka ditiko. 41Mwanana wa Mthu a na rumela tingelozi takwe, ati ti no thavisa ka Mfumo wakwe votshe va i ku vakhuvekisi ni votshe va va mahako to biha, 42ti na va tshotsha mu mdhikilani ka mndilo, ahawa ku no va i di ka kudila ni kugegeresela ka makwasa. 43Se valulami va na phatima nga ditambo Mfumoni ka Tate wawe. Awu a ku ni tinzeve a na engise!” 44“Mfumo wa nzumani wu fana ni txuma txi txi nga siswa thembweni ko kari, txuma txi mthu a nga txi tumbula, se e engeta e txi sisa. Kambe kutsakani kwakwe, a to tsula e ya xavisa sotshe si a ku naso e xava thembwe yile. 45Mfumo wa nzumani kambe wu fanana ni wule a thumelako dibhindu, awu a tsimbilako a txi hodha tidhayimana to tshura. 46Se a di mani dhayimana yimweyo ya dibhindu da hombe, a to tsula e ya xavisa sotshe si a ku naso, kasi kuta yi xava.” 47“Mfumo wa nzumani wu fanana kambe ni likoka, li nga nawulutwa lineneni, li sengeletako totshe tixaka ta sihaka. 48Se ngako li di tate, vakoki va ndinda ve li yisa mabambe, ve khalahatsha ve tshatela sasinene, ve si sengeleta amu siyani kwawe; se asi i ku so biha, ve si tshotsha kule. 49Ngu toneto ti no maheka kugumani ka ditiko: Tingelozi ti na huma ti tekela ava vo biha hagari ka va vo lulama. 50Ti na va tshotsha mdhikilani ka hombe ka mndilo wo tura, koneyo ku na va i di ka kudila ni kugegeresela ka makwasa.” 51“Mi ti mani totshe timhaka tiya kani?” Se va nje khona: “Inna!” 52Se a to va gela kambe a txi khene: “Ngu toneto, m'bhali wuhi ni wuhi a nga gondiswa timhaka ta Mfumo wa nzumani, a fana ni wu i ku nyamne wa m'ti, awuwa, ka txuma txakwe, a humisako sasiphya ni sakale.” 53Ngako Jesu a di gwitile kuwomba sidinganiso siya, a to khukha konaho. 54Se a di hokile ditikoni kwawe, a ti gondisa masinagogani kwawe, ahawa ko za ve xamala, va txi khona: “Ene a ku mana hani kuziva kuwa ni sidiwukiso siya kani? 55Kasi hi nga ene mwanana wa muvati kani? Mame wakwe hi nga ene wu a dhanwako ku i Maria kani? Ni vanawe hi nga vona va Jakobe, ni Josefa, ni Simoni, ni Judhasi, kani? 56Ni tindiyakwe kha ti nga ho totshelele konahawa kani? Se totshe tiya a ku nato ti ta ngu hanini?” 57Se vona ve khuveka ngu ngene. Aniko Jesu a to khene kwawe: “Mprofeti, ditikoni kwawe ni nyumbani kwawe, kha ningwi txithavo.” 58Se kha maha sidiwukiso so tala aho, ngu mhaka ya ku ambi tumela kwawe.

will be added

X\