MATEWU 1

1Txhatxhameto ya lihunzu la Jesu Kristu, Mwanana wa Dhavhidha, Mwanana wa Abrahamu: 2Abrahamu a to veleka Isaake, Isaake a to veleka Jakobe, Jakobe a to veleka Judha ni vananda vakwe, 3Judha ni Tamari va to veleka Faresi ni Zara, Faresi a to veleka Esroni, Esroni a to veleka Aramu, 4Aramu a to veleka Aminadhabhe, Aminadhabhe a to veleka Naasoni, Naasoni a to veleka Salmoni, 5Salmoni ni Rahabi, va to veleka Bhowazi, Bhowazi ni Rute va to veleka Obhedhi, Obhedhi a to veleka Jese. 6Jese a to veleka mfumeli Dhavhidha, Dhavhidha ni msikati wa Uriya va to veleka Salomoni, 7Salomoni a to veleka Robhowamu, Robhowamu a to veleka Abhiya, Abhiya a to veleka Aza. 8Aza a to veleka Josafati, Josafati a to veleka Joramu, Joramu a to veleka Oziya, 9Oziya a to veleka Jothamu, Jothamu a to veleka Akazi, Akazi a to veleka Ezekhiya, 10Ezekhiya a to veleka Manase, Manase a to veleka Amoni, Amoni a to veleka Josiya, 11Josiya a to veleka Jekoniya ni vananda vakwe, mbimo yi va ka Israyeli va nga payulwa ve yiswa Bhabhilona. 12Msana ka kupayulwa ve yiswa Bhabhilona, Jekoniya a to veleka Salatiyeli, Salatiyeli a to veleka Zorobhabheli, 13Zorobhabheli a to veleka Abhiyudhe a to veleka Eliyakimi, Eliyakimi a to veleka Azori, 14Azori a to veleka Sadhoki, Sadhoki a to veleka Akimi, Akimi a to veleka Eliyudhe, 15Eliyudhe a to veleka Eliyazari, Eliyazari a to veleka Matani, Matani a to veleka Jakobe, 16Jakobe a to veleka Josefa, mwamna wa Maria, awu a nga veleka Jesu, a dhanwako ku i Kristu. 17Ngu toneto, kukhukhela ka Abrahamu kala ka Dhavhidha, ndigumi da tiveleko ni mune. Se kukhukhela ka Dhavhidha kala ka mbimo ya kupayulwa ve yiswa Bhabhilona, ndigumi da tiveleko ni mune. Kukhukhela kupayulwani ka kuyiswa Bhabhilona kala ka Kristu, ndigumi da tiveleko ni mune. 18Kuvelekwa ka Jesu Kristu ku mahisile tiya: Maria, Mame wakwe, a manekile a di thembisilwe ngu Josefa; se va si nzi kutekana, a manekile a di ni txirumbu ngu mtamo wa Moya wo Sawuleka. 19Aniko Josefa, mwamna wakwe, ngaku i nga ti mthu wo lulama, a si ti lavi ku mu bhumisa phungo yo biha, a to alakanya ku mu leka, na ti si ziwi. 20Na a di pimisile toneto, ha wukoheni a to lora a txi wona ngelozi ya Mkoma yi nga mu gela tiya: “Josefa, mwanana wa Dhavhidha, u nga thave kutekana ni Maria, kasi kuva msikati wako, nguko txirumbu txi a ku natxo, txi ta ngu ka Moya wo Sawuleka; 21a na veleka mwanana wa mzambi, awu u no mu raya ditina da ku i Jesu, nguko Ene a na hanyisa ngamu yakwe ka siwonho sawe.” 22Totshe tiya ti mahekile kasi kutatiseka atile Mkoma a nga womba ngu mprofeti, a txi khene: 23“Wotuma a na mana txirumbu e veleka mwanana wa mzambi, awu a no raywa ditina da ku i Emanuweli, ati ti wombako ku ‘Txizimu txi na ni nathu.’ ” 24Mbimo yi Josefa a nga wuka ngu wukoheni a to maha nga ti ngelozi ya Mkoma yi nga mu gelisa tona; a to mu teka msikati wakwe kasiku e zumba nayo. 25Kambe kha nga za e zivana nayo, kala mbimo yi ene a nga veleka mwanana, awu a nga mu raya ditina da ku i Jesu.

will be added

X\