MARKU 8

1Ka masikuyo ku to engeta ku tshangana dibutho da hombe, kambe va ti singa ni sakudya. Se Jesu a to dhana vagondiswa vakwe a txi khene kwawe: 2“Ni pfela wusiwana dibutho diya, nguko masiku mararu va di zumbile ni nani, va si na sakudya. 3Ni txo va tshumetela timwayani kwawe va di ni nzala, va na jiyela ni nzila, ngukusa vamwane kwawe va tile ngu kule.” 4Vagondiswa vakwe va to mu xamula va txi: “Va nga lavelwa hani mapawu a ku va khurisa kona txiwulani muwa kani?” 5Ene a to va wotisa a txi khene: “Mina ni mapawu mangahi kani?” Vona va nje kha vona: “Mtxhanu ni mambidi.” 6A to gela dibutho da vathu ve khalahatshela hahatshi, se e teka mapawu a mtxhanu ni mambidi, e bonga, e ma bhandela e ma ningela ka vagondiswa vakwe, kasiku vona va txi avela vathu. 7Se vona va ti ni sihakanyana kambe so mbi nyawula. Se a di si katekisile, a to leleta ti to nisona si avelwa kwawe. 8Se va dyite ve khura; se ngu sikhwemu si si nga sala va to tata mtxhanu wa sirundu ni simbidi. 9Kasi ava va nga dya va ti hafuhi ka mtengo wa mune wa makumi a mazana a vathu. Se e va tsulisa. 10Se kunukunuko a to wulela ngalavani ni vagondiswa vakwe, e tsula ka diphambo da Dalmanuta. 11Se vafarisi va to huma ve khata kukanetisana nayo, ve kombela txikombiso txi txi humako nzumani, ngu ku mu duka. 12Se e hefemuteka moyani kwakwe, a txi khene: “lixaka liya li kombelela txani txikombiso? Kha ditshuri na mi gela ku khani: Lixaka liya kha li na mbi ningwa txikombiso!” 13Se e va leka, a txi engeta e wulela ngalavani, a txi ya mtxhatuko. 14Kambe vagondiswa va ti divate kuteka mapawu, va ti ko va ni dipawu dimwedo ngalavani dwe. 15Se e va laya a txi khene: “Ti woneleni, mi thava mtshumbelo wa vafarisi ni mtshumbelo wa Herodha!” 16Se vona va txi alakanyisana va txi kha vona: “Ene a womba tiya mwendo ngu kuwa hi ku singa ni mapawu.” 17Kutingako Jesu a txi ti pfa, a ti khene kwawe: “Nji txani mi txi wombawombisana ngu kuwa mi ku singa ni mapawu kani? Kha mi nzi ku ti mana ni ku ti pfisisa kani? Timbilu tanu ni konkuwa ti ngadi bangisile tiya? 18Mina ni maso, kasi kha mi woni; mina ni tinzeve kasi kha mi engisi, kani? Kha mi alakanyi, 19mbimo yile ni nga bhandela mtxhanu wa mapawu ni avela ka mtxhanu wa makumi a mazana a vathu, ti to nzirundu singani mi nga tata ngu sikhwemu si mi nga rolela kani?” Vona va to angula va txi khona kwakwe: “Digumi ni simbidi.” 20“Ni mbimo yi ni nga avela mtxhanu wa mapawu ni mambidi ka mune wa makumi a mazana a vathu, nzirundu singani mi nga tata ngu sikhwemu si mi nga rolela kani?” Va txi kha vona: “Ntxhanu ni simbidi.” 21Se ene a txi khene kwawe: “Ina kha mi nzi ku ti pfisisa kani?” 22Se va to hoka Bhetsayidha . Se va to mu tisela dibhofu ve mu kombela ti to e di gwesa. 23Ene a to mu ñola wu wa dibhofu ngu diwoko e mu yisa hahanze ka mkhokhola, e mu thurela lure ka maso akwe e mu sanzeka manza, a txi mu wotisa a txi khene: “Wa wona txilo kani?” 24Kutingako a txi khata kuwona a to khene: “Na wona vathu, no va wona va txi nga mindonga yi tsimbilatsimbilako.” 25Se a to engeta e sanzeka manza ka maso a dibhofu, se dona di to wona tatinene, se di hanyiswa, di si kota kuwona sotshe kwati. 26Se ene a to mu tshumeta e tsula mtini kwakwe, a txi khene: “U nga wulele mkhokholani.” 27Se Jesu a to khuka ni vagondiswa vakwe, va txi ya ka mikhokhola ya Khezareya wa Filipi. Hanzila a va mahete txiwotiso txiya: “Vathu va khona ngani mani kani?” 28Se vona va to angula va txi khona: “Va khona u Johane Mubhabhatisi, vamwane va u Elija, vamwane kambe va khona u mmweyo wa vaprofeti.” Se ene a txi engeta a txi va wotisa a txi khene: 29“Anu-ko, mi khanu ngani mani?” Pedro a to xamula a txi khene: “Awe u Mesiya.” 30Ti di mahile eto, ene a to va gela ngu kutsanisa ti to va si thuki ve wombawomba ngu ngene ka vathu. 31Se a to khata ku va gondisa ti to: “Mwanana wa Mthu a fanete kuxaniseka, a txi nyenywa ngu madhota a ditiko ni vaphaxeli va hombe ni vabhali, e dawa, e tshumela a txi wuka ngu ditshiku da wuraru.” 32Mhaka yiya a to yi wombisisa ha kubasani. Pedro a to mu teka e tsula nayo phuho, a txi khata ku mu kawuka. 33Aniko Jesu a to tshembereka a txi wonetela vagondiswa a txi kawuka Pedro a txi khene: “Khukha masoni kwangu, Sathane! Khu khatali ngu timhaka ta Txizimu, u khatala ngu timhaka ta vathu.” 34Se a di dhani dibutho kumweko ni vagondiswa a to va gela a txi khene: “Ngako mthu a txi lava ku ni londisa, a na ti leke apune, a txi rwala txihambano txakwe, a txi ni londisa. 35Awu a lavako kuhulukisa wutomi wakwe a na luzekelwa ngu wona ani wu a luzekelwako ngu wutomi wakwe ngu mhaka yangu ni Evhangeli, a na wu hulukisa. 36Nguko ti na vhuna txani ka mthu kumana dibhindu da mafu otshe e mwalalelwa ngu moya wakwe kani? 37Xana mthu a na humisa txani kasi kutekisa moya wakwe kani? 38Ngukusa awu a ku ni tingana ngu ngani ni mapswi angu masoni ka lixaka liya lo mbi thembeka masoni ka Txizimu ni la vawonhi, nene Mwanana wa Mthu a na va ni tingana ngu ngene ditshiku di a no wuya ni wudhumo wa Tate wakwe, kumweko ni tingelozi to sawuleka.”

will be added

X\