MARKU 7

1Vafarisi ni vabhali vo kari va nga ti tile ngu Jerusalema, va to ya sengeletana ka Jesu. 2Se ngako va txi wona vagondiswa vo kari va Jesu, na va txi dya sakudya ngu manza a nzambwa, ti ti wombako ku va sa thanga ngu kusamba manza, va to sola. 3Kha ditshuri vafarisi ni Vajudha votshe kha va dyi, va sa thanga ngu kusamba manza, nga tolovelo ya vakale vawe; 4kha va dyi txilo, mbimo yi va wuyako ngu kutsimbilani, va sa thanga ngu kusamba; ya ho yimwane kambe mikhuwo va yi mahako ngu kulondeteta txikale: Kukuwula siya so sela ngu sona, ni timbiya, ni siya sa txikete. 5Vafarisi ni vabhali va to mu wotisa va txi khona: “Nji txani vagondiswa vako va si londeteli siheno sa vakale, eko va dyako sakudya va si thangi ngu kusamba manza kani?” 6Se ene a nje khene kwawe: “Mprofeti Isaya a wombile kwati ngu nganu, vaxengeteli, akuwa a nga bhala to khene: ‘Avava vathu vo ni dhumisa basi ngu sisofu sawe, kambe timbilu tawe ti kule ni nani. 7Kukhozela kwawe nga mahala, nguko tigondo ti va gondisako nzileleto sa vathu basi.’ 8Anu mi leka Mlayo wa Txizimu mi txi namarela ka siheno sa vathu.” 9Se a txi engeta a txi khene kwawe: “Mi eyisa mlayo wa Txizimu, kambe mi xayisa siheno sanu. 10Ngukuva Mosi a ti khene: ‘Thava tate wako ni mame wako’, ni ku khene: ‘Awu a rukako tate wakwe ni mame wakwe, a na dawe e fa.’ 11Kasi anu mi khanu: ‘Kha ku na mnandu hambi mthu a txi khene ka tate wakwe mwendo mame wakwe: Sotshe si ni nga ti fanete ku kuvhuna ngu sona i korbani’, ati ti wombako mhamba ya kusawulelwaTxizimu; 12kha mi ngadi mi mu tumelela kumaha txilo txo vhuna tate wakwe mwendo mame wakwe. 13Ma eyisa dipswi da Txizimu ngu siheno sanu, si mi ninganako. Se mi maha simwane so tala so nga soneso.” 14Ngu msana a to engeta a txi ramba dibutho da vathu a txi va gela a txi khene: “Ni engiseni motshenu, mi txi engisisa. 15Ku walo txilo txi tako ngu hahanze ka mthu, txi wulelako mndani kwakwe, txi si kotako ku mu bihisa; aniko asi si humako ngu mndani kwakwe ngu sona si mu bihisako. [ 16Awu a ku ni tinzeve ta kuengisa a na engise.”] 17Kutingako a di wulete nyumbani, e siya dibutho, vagondiswa vakwe va to mu wotisa ngu txifaniso txiya. 18Se a txi khene kwawe: “Kasi nananu mi ngadi mi txi pwata kupfisisa kani? Kha mi ti zivi ti ta ku sotshe si si ku hahanze, ngako si txi wulela ka mthu, kha si si koti ku mu bihisa. 19Ngukusa kha si wuleli mbiluni kwakwe, kambe si ya mndani, se si ya humiswa txitingani?” (Mapswi awa ma txhamusa ti to sotshe sakudya si basile). 20Se a txi engeta a txi khene: “Asi si humako ka mthu ngu sona si mu bihisako. 21Kha ditshuri, mndani timbiluni ka vathu, ku huma mialakanyo yo biha: Kugelegele, wukhamba, kudaya, 22wugango, kunavela ko biha, tshofu, kukanganyisa, ku ambi ti ñola, mabava, sisolo, ku ti kulisa, wukhwanda. 23Wubihi wuwa wotshe wu huma ngu mndani, ngu wona wu bihisako mthu.” 24Ngako a txi khukha konaho, a to ya ditikoni ka Tiri ni Sidhoni. Se e ta wulela nyumbani ko kari, na a si ti lavi kuziwa ngu mthu, aniko a tandekile ku ti sisa. 25Nguko wamsikati, awuwa mwanana wakwe wa muhorana a nga ti wuleletwe ngu moya wa nzambwa, a ti engisile ti to wa ho, se a txi ta, e ta ti wisa minengeni kwakwe. 26Wamsikati wuwa i ti Mugriki wa lixaka la Vasiro-Fenikiya. A to mu kombela ti to e tovela didhimoni di huma kwakwe. 27Kambe Jesu a ti khene kwakwe: “Leka vanana ve thanga vona ve dya ve khura, nguko kha ta tshura kuteka sakudya sa vanana, si rinzwa ka siwana.” 28Ene a to khene ka Jesu: “Inna, Mkoma! Aniko hambi i di toneto, siwana nisona sa dya maruru awa ma wiswako ngu vanana hahatshi ka meza.” 29Ene a to mu xamula a txi: “Ngu konaho ka dipswi diya, tsula, didhimoni di humile ka mwanana wako.” 30Kutingako a di tshumelete nyumbani kwakwe, a to ya mana mwanana a di otete ha ditahoni, na se didhimoni di di humile. 31Ngako a txi engeta e khukha ditikoni ka Tiri, a to pinda ngu nzila ya Sidhoni, a txi ya digovani ka Galileya, e tshawunyeta ditiko da Dhekapoli. 32Se ve tisa kwakwe mthu wu i nga ti diphanzeve na a di ni txidimiti, ve mu kombela ku e mu sanzeka manza txitimwi. 33Ngako a di mu humisile hagari ka dibutho, a txi ya nayo phuho, a to wuleta titiho takwe tinzeveni ka diphanzeve, e thura lure, e mu gwesa lidimi ngu lona lure. 34Se a to wona nzumani, a txi hefemuteka, a txi khene kwakwe: “Efata”, ati ti wombako ku “Tuleka!” 35Se tinzeve takwe ti to tuleka, ni misiha ya lidimi lakwe yi to thuseka, se e wombawomba tatinene. 36Jesu a to va embela eto, ti to va si geli mthu. Aniko hambiko a nga txi va embela eto, vona va ti simamisa kururutela mhaka yiya. 37Se va to xamala ngutu, va txi khona: “A mahile totshe ngu mamahelo a manene. A mahile ti to maphanzeve me si kota kuengisa; siduma si si kota kuwombawomba.”

will be added

X\