MARKU 5

1Se va to hoka mtxhatuko ka digova, ditikoni ka Vagerasa. 2Kutingako Jesu a di humile ngu ngalavani, konako mthu wu a nga ti ni moya wa nza mbwa, awu a nga ti huma ngu mayivani, a to mu hingeta. 3Eneyo a ti zumba mayivani, kambe ku ti singa ni mthu wa mtamo wu a nga txi si kota ku mu sunga, hambi ngu titxhini. 4Nguko a sungilwe ka kungi ngu makhodha ni titxhini, kambe a funyile makhodha ni kubhenula titxhini, ku si maneki ni mthu wa mtamo wo si kota ku mu xula. 5Yotshe mbimo, wusiku ni mitshikari a ti tsimbila mayivani ni mimangoni, a txi kwangula, a txi ti kurumulela ngu marigwi. 6Kutingako a di woni Jesu, a di ngadi kule, a to tutuma e ya mu khizamela. 7Se a txi peka huwa ngu dipswi da hombe a txi khene: “I mhaka muni u ku nayo ni nathu, awe Jesu Mwanana wa Txizimu Nyatxitimwi?” 8Nguko Jesu a ti khene kwakwe: “Huma ka mthu wuwa, awe moya wa nzambwa.” 9Se e mu wotisa a txi khene: “Ditina dako u mani?” Wona wu mu xamula wu txi: “Ditina dangu ni Txikwata, nguko hi vangi.” 10Se wu to mu khongotela ti to a si thuki a txi yi tovela kule ni ditiko dile. 11Kona hale hafuhi ni mmango, ku ti ni mtxhambi wa hombe wa tikhumba, wu txi hava. 12Se mimoya yotshe yi mu khongotela yi txi: “Hi rumele tikhumbani, hi ya wulela ka tona.” 13Kunukunuko Jesu a to yi tumelela se mimoya yile ya nzambwa yi huma yi ya wulela tikhumbani; se mtxhambi wu tutumela mkovani, wu ya ti rinza digovani, tikhumba ti sela txihindo, mtengo wa tona wu ti lava kuva makumi mambidi a mazana. 14Vadyisi va tikhumba va to tutuma ve ya zivisa vathu va didhoropani ni va thembweni, se vona ve huma ve ya wona ti ti nga humelela. 15Kutingako va di hokile ka Jesu, ve wona wu a nga ti ni txikwata txa mimoya a di khalahatshile, a di ambate, a di ni mapimo a manene va to telwa ngu dizowa. 16Ava va nga ti wona va to xawutela ati ti nga humelela ka mthu wu a nga ti ni madhimoni ni mhaka ya tikhumba. 17Se ve khongotela Jesu ti to e khukha ditikoni kwawe. 18Jesu ngako a di bete ngalavani, mthu wu a nga ti ni madhimoni a to mu kombela kuzumba nayo. 19Aniko Jesu kha mu tumelela, a to khene kwakwe: “Tsula mwani, ka va ka kwanu, u ya zivisa totshe ti Mkoma a nga ku mahela tona, ngu ku kupfela wusiwana.” 20Se a to khukha, e khata kuhuwelela ditikoni ka Dhekapoli totshe ti a nga mahelwa tona ngu Jesu, se votshe ve xamala. 21Ngako Jesu a di tshawunyetile kambe ngu ngalava a txi ya mtxhatuko, va to ya tshangana masoni kwakwe vathu vo tala ngutu, hafuhi ni digova. 22Konaho a to bwaka mmweyo wa vathangeli va disinagoga, ditina dakwe a dhanwako ku i Jayiro. Se a di mu woni, a to mu khizamela, 23a txi mu kombela ngu kukarateka a txi khene: “Mwanana wangu wa txihoranana a hafuhi ni kufa, ngono u ta mu sanzeka manza, a na kalamuka a txi hanya.” 24Jesu a to longoloka nayo na a txi londetelwa ngu vathu vo tala, va nga txi mu kama. 25Se mmweyo wa wamsikati a titi xuphwa ngu malwati a lingolengole, ngu txipimo txa digumi da malembe ni mambidi; 26awu a nga tsimbila a txi xaniseka ngu kulava kuthumwa mu ka tiñanga to tala, a txi luza yotshe thomba yakwe, a si kalamuki, ka malwati yawa ma nga txi tamarisa kuya kubihani. 27Ngako a di engisile va txi wombawomba ngu Jesu, a to ta bwaka hagari ka dibutho, a to ema ngu msana kwakwe Jesu, a txi mu gwesa nguwo yakwe; 28nguko a titi khene: “Hambi idiku no si kota kugwesa siambalo sakwe basi, ni na hanyiswa.” 29Kha ditshuri, ngu ka yoneyo mbimo, wu to leka kuhumela mnoha, se ene a txi ti pfa ha mmidi kwakwe ti to a hanyisilwe ka malwati ale. 30Kunukunuko Jesu, a di pfite ti to mtamo wule wu humete kwakwe, a to tshembereka a txi wonetela dibutho, a txi khene: “I mani a nga gwesa tinguwo tangu kani?” 31Vagondiswa va to mu angula va txi khona: “Wa ti wona ti to vathu va ku kama ngu otshe madhawa, se wa nga wotisa ti to, ‘I mani a nga ni gwesa?’ ” 32Kambe ene a to gula maso a txi rumarumela ngu kulava kuziva ti to i mani a nga maha tiya. 33Kambe awule wamsikati, na a txi dhudhumela ngu kuthava, ngu kuwa a nga txi ti ziva tiya ti nga mu humelela, a to ya khizama masoni kwakwe, a txi mu txhamusela dotshe ditshuri. Se Jesu a nje khene kwakwe: 34“Mwanangu, likholo lako li ku hanyisile, tsula ngu kuthutha, thuseka ka malwati ako.” 35Ene a di ngadi a txi wombawomba, ku to bwaka vathu va kuta ngu mtini ka mthangeli wa disinagoga va txi khona: “Mwanana wako a fite; xana u karatela txani kambe Mgondisi kani?” 36Aniko Jesu, na a si khatali txilo ngu mhaka yi yi nga ti wombwa, a to gela mthangeli wa disinagoga a txi khene: “U nga thave, tumela dwe.” 37Se Jesu kha tumela ti to mmwane e tsula nayo, hahanze ka Pedro ni Jakobe ni Johane, mwanawe Jakobe. 38Mbimo yi a nga hoka mtini ka mthangeli wa disinagoga, a to ya mana masaluko a hombe, ni vathu va nga txi dila ni kupeketela tihuwa. 39Se a txi va gela ku khene: “Masaluko awa nga txani ni kudila kuwa nga txani kani? Dihorana kha da fa txilo, di to otela.” 40Vona va to khata ku mu seka. Aniko Jesu a to humisa hahanze votshe vathu vale, a txi teka basi tate ni mame wa mwanana wule wa txihoranana, kumweko ni vale va nga ti tile nayo, e wulela ka wukhalo wu a nga ti otelisitwe kona mwanana. 41Se a di mu ñote ngu diwoko a to womba a txi khene: “Talita kumi!” Ati ti wombako ku: “Txihoranana ni khani kwako, wuka!” 42Kunukunuko, a to wuka a txi tsimbilatsimbila, nguko i ti wa tanga ya digumi da malembe ni mambidi. Votshe vathu ve xamala ngutu. 43Ene a to va leletisisa ti to ni wammweyo a si thuki a txi ti ziva ati ti nga maheka, se a txi va gela ti to ve ninga sakudya mwanana wule wa txihoranana.

will be added

X\