MARKU 4

1Jesu a to engeta e gondisa hafuhi ni digova, se dibutho da hombe di sengeletana kwakwe, se ene a to wulela ngalavani, ayi yi nga ti ddigovani e khalahatsha ka yona. Vathu votshe va ti mabambe ka digova. 2Se a to va gondisa timhaka ta tingi ngu sidinganiso. Kugondisani kwakwe a va gete a txi khene: 3“Engisani. Mphayi a humile a txi ya phaya. 4Ngako a txi phaya, timwane timbewu ti to wela hanzila, se sinyana si ta, si ta dyela totshe. 5Timwane timbewu ti to wela marigwini, ahawa ka ku ambi na mafu a mangi, se ti kuluveta kumila, ngukusa mafu ma ti sa tshima. 6Kambe ditambo, ngako di txi thola, tona ti to wuna, ti woma, ngu kupwata mikuluti. 7Timwane timbewu ti to wela mipani. Yona mipa, ngako yi txi kula, yi to ti kura, se ti tandeka kuveleka. 8Timwane timbewu ti to wela ka mafu a manene, ti txi mila, ti txi kula, ti txi veleka: Yimweyo yi veleka makumi mararu, yimwane mtxhanu wa makumi ni dimwedo, yimwane dizana.” 9Se a txi khene: “Awu a ku ni tinzeve to engisa, a na engise.” 10Kutingako a di phuho, ava va nga ti nayo ni va va digumi ni vambidi va to mu wotisa ngu mhaka ya sidinganiso. 11Se a txi khene kwawe: “Anu mi ningilwe kuziva misisalo ya Mfumo wa Txizimu, kasi ka vale va ku hahanze, totshe ti humelela ngu sidinganiso, 12titaku, ‘Hambi i di kuwona ve wona kambe va si wonisisi; hambi i di kuengisa ve engisa kambe va si pfisisi; kasiku va si thuki ve hunduluka, se ve divalelwa siwonho.’ ” 13A to engeta a txi khene kwawe: “Ina kha mi txi pfisisi txidinganiso txiya kani? Idito, se mi na pfisisa ku txani sotshe sidinganiso kani? 14Mphayi a phaya dipswi. 15Ava va ku hafuhi ni nzila, ahawa dipswi di nga phaywa kona, ngu vale va ku, ngako va di di pfite, Sathane e kuluveta a txi ta kwawe, a ta va tekela dipswi di di nga phaywa timbiluni kwawe. 16Ngu toneto, timbewu ti ti nga phaywa marigwini ngu vale va ku, ngako va di di pfite dipswi, ve kuluveta ku di amukela ngu kutsaka. 17Kambe, ngukuva va si na mikuluti, mba mbimonyana dwe; se ngako dikhombo ni kuxaniswa si txi va humelela, ngu mhaka ya dipswi, va kuluveta ve rereka. 18Atiya ti nga phaywa mipani, ngu va va engisako dipswi, 19kambe kukhutalela sa mafu awa, ni kukanganyiswa ngu tithomba, ni kunavela ka silo simwane, ku txi welela vona, ku txi kura dipswi, se di si veki mihando. 20Ati ti nga phaywa ka mafu a manene, ngu va va engisako dipswi, ve di amukela, se ve veleka mihando, mbewu yimweyo yi veleka makumi mararu, yimwane mtxhanu wa makumi ni dimwedo, yimwane dizana.” 21A to engeta a txi khene kwawe: “Dilambu, ina di nehwa kuta vekwa hahatshi ka txirundu mwendo hahatshi ka m'bhedhu kani? Ina kasi kha va di nehi ve ta di veka ha phandeni kani? 22Ngukuva kha ku na txilo txi txi ku kusisalani, txi na ku ambi wonekiswa; kambe kha ku na txilo txi txi nga tumbetwa, txi no mbi tumbulwa. 23Mthu ngako a di ni tinzeve ta kuengisa a na engise.” 24A to engeta a txi khene kwawe: “Riyani tinzeve ka ti mi ti engisako. Mpimo wu mi pimelako vamwane ngu wona, nananu mi na pimelwa ngu wona ngu Txizimu, futsi mi na engetelwa. 25Ngukuva awu a ku ni txo maha, a na engeta e ningwa, kasi awu a ku singa ni txilo, hambi txi a ku natxo, a na tekelwa.” 26E engeta a txi khene: “Mfumo wa Txizimu wu fana ni mthu wu a nga rinza mbewu mafuni. 27Se hambi a di otete mwendo hambi a di wukile, mitshikari ni wusiku, mbewu yona ya mila yi txi kula, na ene a si ti zivi. 28Mafu mapune ma milisa mbewu. Kukhata ku huma ditshina ngu msana ku rumbuka diphumbu, se ngu magwito ku velekwa diphumbu do tala ngu timbewu. 29Se siyalo ngako si di vitute, kunukunuko va wuletisa sikela, ngukuva se i nyango ya kuelula.” 30E engeta kambe a txi khene: “Mfumo wa Txizimu hi na wu fanisa ni txani? Hi na wu kombisa ngu txidinganiso muni kani? 31Wu fana ni mbewu ya sinapi, ayi i ku ya yidotho ka timbewu totshe ta mafu. 32Kambe ngako yi di phayilwe, ya kula yi pinda mindonga yotshe ngu kukula, yi va ni madhavi a hombe ahawa ka kuza sinyana sa nzumani si nga aka mtsudini ka yona.” 33E va txhumayela dipswi da Txizimu ngu sidinganiso so tala, nga ti va nga txi si kotisa txona ku di pfisisa. 34Kha womba mhaka kwawe, hahanze ka kumaha ngu sidinganiso. Se ngako va di phuho, a titi txhamusela totshe timhaka ka vagondiswa vakwe. 35Ngu donedo ditshiku, ni minova, a ti khene kwawe: “He txhatukeni hi ya ka yimwane phuho.” 36Kutingako va di siyite dibutho, va to mu teka ngu ngalava yi ene a nga ti ka yona, se koneho ku titi ho timwane tingalava. 37Se ku so vhiluka nkutxu wa diphuho da hombe, mavimbi me wulela ngalavani, yi za yi lava kutala. 38Jesu a ti txihondoni ka msana ka ngalava a di otete ha txikhigeloni. Se vona ve mu wusa va txi khona kwakwe: “Mgondisi, khu khatali ngu ngathu ngako hi txi lova kani?” 39Se ene a to wuka e dhusa diphuho, a txi khene ka digova: “Malala, u txi dwe!” Se diphuho di renga, se ku va ni kudikha ka hombe. 40Se a txi khene kwawe: “Mi thavisa tiya ngu txani kani? Kha mi nzi kuva ni kukholwa kani?” 41Se vona va to telwa ngu kuthava ka hombe, ve gelana va txi: “I mani ene wuwa, hambi diphuho ni digova si mu engisako kani?”


Copyright
Learn More

will be added

X\