MARKU 2

1Kutingako ma di pindile masiku, Jesu a to tshumela e wulela Kapernawume, se ti txi pfala ti to ene a nyumbani. 2Vathu va vangi va to kuluveta ve sengeletana konaho, ahawa ko za ku txi pwateka ni wukhalo ha txikeni. Jesu a titi va txhumayela dipswi da Txizimu. 3Konaho a to nehwa kwakwe mthu wa kuwoma sihango, a di rwatwe ngu mune wa vathu. 4Ngako va nga txi tandeka ku mu hokisa ka Jesu, ngu mhaka ya kutala ka vathu, va to kwela va txi ya hasula lwango la nyumba yiya ene a nga ti ka yona, se va di tute ditshoko, va to mu txhikisa a di ha ditahoni hawa va nga ti mu rwamisile kona. 5Jesu ngu kuwona kukholwa kwawe, a ti khene ka mlwali: “Mwanangu, u divaletwe siwonho sako.” 6Kambe vabhali vo kari va ti zumbile konaho, va txi pimisa timbiluni kwawe, va txi: 7“A wombisa tiya ngu txani? Wa ruka. I mani a si kotako kudivalela siwonho hahanze ka Txizimu?” 8Jesu kunukunuko a to ti ziva ngu moya wakwe ati va nga txi alakanya timbiluni kwawe, se a txi va gela ku khene: “Mi alakanyela txani toneto timbiluni kwanu kani? 9Ngu tihi ti nga hehuka kuwomba ka wu wa kuwoma sihango: Ku khani, ‘siwonho sako si divaletwe’, mwendo ku khani, ‘Khukha u txi teka ditaho dako u txi tsimbila?’ 10Se kasi mi na ti ziva ti to Mwanana wa Mthu ana ni mtamo ha mafuni wa kudivalela siwonho.” A to gela wu wa kuwoma sihango, a txi: 11“Ni khani kwako, khukha u teka ditaho dako u txi tsula mtini kwako.” 12Ene a to khukha se kunukunuko e teka ditaho dakwe, a txi tsula, na a txi wonwa ngu votshe vathu, ahawa votshe va nga xamala ve dhumisa Txizimu va txi khona: “Kha hi zivi ku ti wona to nga tiya.” 13Jesu a to engeta e khukha, a txi ya diphambo da digovani, dibutho da vathu votshe ve ya kwakwe, se e va gondisa. 14Kutingako a txi pinda, a to wona Levhi, mwana Alfewu, a di nyumbani ka mkhupo, a txi khene kwakwe: “Ni londise.” Se Levhi a to khukha e mu londisa. 15Kutingako Jesu a di khalahatshile kudyani, nyumbani ka Levhi, vakhupisi va vangi ni vawonhi va to ta khalahatsha kumweko ni Jesu ni vagondiswa vakwe, nguko i ti vathu va vangi va nga txi mu londisa. 16Kambe ngako vabhali va mtxawa wa vafarisi, ve mu wona a txi dya kumweko ni vakhupisi ni vawonhi, va to khona ka vagondiswa vakwe: “Nji txani a txi dya kumweko ni vakhupisi ni vawonhi kani?” 17Jesu ngako a txi ti pfa eto, a to khene kwawe: “Ava va hanyako kha va lavi ñanga, aniko yi lawa ngu va va lwalako. Ani kha na tela kuta dhana va vo lulama, aniko ni tete vona vawonhi.” 18Vagondiswa va Johane ni vafarisi va ti ti tona sakudya. Se ve ta ka Jesu, va txi ta khona kwakwe: “Ngu ku txani vagondiswa va Johane ni vafarisi va ti tonako sakudya, na kuve vagondiswa vako kha va ti toni, kani?” 19Jesu a va xamute a txi khene: “Tipheleketi ta wu a tekako msikati, ina ti nga si kota ku ti tona sakudya, na mteki a di ngadi kumweko nato kani? Ka yotshe mbimo yi ti ku ngadi nayo, kha ti na ku ti tona sakudya. 20Aniko ma na ta masiku awa ti no ta tekelwa mteki, se ngu kona ti na kuta ti tona sakudya. 21Kha ku na mthu wu a rungako txiziva txa nguwo ya yiphya ka txiambalo txa kale, nguko txiziva txa txiphya txi nga namula nguwo ya kale, se kuvharuka ku txi engeteleka. 22Futsi kambe kha ku na mthu wu a thelako vhinya ya yiphya ka misava ya kale, nguko a txi maha eto, vhinya yi na vharula, se ku txi luzeka vhinya ni misava. Aniko vhinya ya yiphya yi thelwa ka misava ya yiphya.” 23Ngu ditshiku da Sabbata, ngako Jesu a txi pinda ngu hagari ka tithembwe ta fulaho, vagondiswa vakwe, mbimo yi va nga txi tsimbila ngu nzila, va to khata kufunya maphumbu. 24Vafarisi va to mu gela va txi khona: “Hinga wona, va mahela txani ati ti si tumelelwiko kumaha ngu ditshiku da Sabbata, kani?” 25Ene a ti khene kwawe: “Kha mi nzi kugonda tiya Dhavhidha a nga mahisa tona, mbimo yi a nga khamwa a txi pfa nzala, ene ni vale a nga ti navo kani? 26Ahawa a nga wulela nyumbani ka Txizimu, ka masiku a Abhiyatari, mphaxeli wa hombe, a txi dya mapawu a mphaxo e ninga ni vale a nga ti navo, ayawa ma nga ti fanela kudyiwa ngu vaphaxeli dwe?” 27Se a txi khene kwawe: “Sabbata yi mahetwe mthu, hi nga mthu a nga mahelwa Sabbata. 28Ngu konaho, Mwanana wa Mthu i Mkoma wa yona Sabbata kambe.”


Copyright
Learn More

will be added

X\