MARKU 16

1Ngako ditshiku da Sabbata di di pindile, Maria wa Magdhala ni Maria, mame wa Jakobe, ni Salome, va to xava mafura kasiku ve ya mu tota ngu ona. 2Ni mabimbikutxa ka ditshiku do khata ka divhiki, vona va to tsula diyivani, na se ditambo di txi txa. 3Va titi wotisana va txi: “I mani a no ya hi wumbulutela dirigwi, a txi di thavisa ha txikeni ka diphala kani?” 4Se ngako va di gute maso, va to wona dirigwi di di wumbulutilwe, kuve dona i ti da hombe ngutu. 5Va di wulete diphalani, va to wona dijaha di di khalahatshile, didhawa da txinene, di di ambate nguwo yo basa, se ve xamala ngutu. 6Kambe dijaha di to va gela di txi: “Mi nga xamaleni! Mi lava Jesu wa Nazareta, awu wo bethelwa ha txihambanoni: A wukile, kha nga ho hawa. Wonani wukhalo wu va nga ti mu vekile ka wona. 7Tsulani mi txi ya gela vagondiswa vakwe ni Pedro, ti to ene wa mi thangela kuya Galileya, mi na ya mu wona, madingano ni ti a nga mi gelisa tona.” 8Vona va to huma diyivani, ve tutuma ngu kudhudhumela ni kuxamala; kha va gela txilo mthu, nguko va ti thava.[ 9Ngako a di wukile ni mixo ya ditshiku do khata ka divhiki, a to thanga e woneka ka Maria wa Magdhala, awu a nga ti tovete kwakwe mtxhanu wa madhimoni ni mambidi. 10Ene a to tsula e ya zivisa avale va nga ti londisela Jesu, nguko va ti pandiseka na va txi dila. 11Ngako va di engisile ti to ene wa hanya ni ti to a wonwi ngu Maria, kha va kholwa. 12Msana keto, a to ti komba ngu tximwane txiemo ka vambidi vawe, va nga ti tsimbila va txi ya hahanze ka m'ti. 13Vona va to tshumela ve ya gela va va nga ti sate, aniko nivona kha va kholwa. 14Ngu kugwitisa a to woneka ka va digumi ni mmweyo, va di ha sakudyani, e va kawuka ngu ku ambi kholwa kwawe ni kubanga ka timbilu tawe, nguko kha va kholwa ngu va va nga mu wona, a di wukile ngu ka vafi. 15Ene a to va gela a txi khene: “Tsimbilani ngu ka dotshe ditiko, mi txi txhumayela Evhangeli ka sotshe sivangwa. 16Awu a no kholwa, a txi bhabhatiswa, a na huluka; awu a no mbi kholwa, a na abaniswa. 17Sidiwukiso si si no mahwa ngu va va no kholwa ngu siya: va na tovela madhimoni ngu ditina dangu, va na wombawomba tidimi ta tiphya; 18va na ñola minyoka ngu manza, se hambi va txi sela sa txhefu, kha si na mbi va wusela phango; va na sanzeka manza ka valwali, ve kalamuka.” 19Senikoko, Mkoma Jesu, msana ka kuva a di wombawombile navo, a to gulwa a txi ya nzumani, a txi ya khalahatsha txineneni ka Txizimu. 20Se vona va to tsimbila va txi txhumayela ka otshe matiko, Mkoma a txi va vhunetela ni kutsanisa dipswi ngu sidiwukiso si si nga ti tsimbilelana nado.]

will be added

X\