MARKU 15

1Ni mixo, vaphaxeli va hombe va to tshangana ve maha txikungo kumweko ni madhota ni vabhali ni dotshe Dibanza. Senikoko, va di sungile Jesu, va to mu teka ve tsula ve ya mu ningela ka Pilato. 2Pilato a mu wotisile ku khene: “Ngawe Mfumeli wa Vajudha kani?” Jesu a mu xamute a txi khene: “U womba tona.” 3Vaphaxeli va hombe va txi mu lumbeta timhaka to tala. 4Pilato a to engeta e mu wotisa a txi khene: “Khu xamuli txilo? Hinga pfa timhaka ta tingi ati va ku mangalelako ngu tona!” 5Aniko Jesu kha xamula txilo ahawa ko za Pilato e xamala. 6Kambe ngu mbimo ya M'buso Pilato a ti tolovela kuthukunyula txibotxhwa tximwetxo, atxi va nga txi mu kombela. 7Se a titi ho wa mmweyo, awu ditina dakwe a dhanwako ku i Bharabhasi, a nga ti seketwe kumweko ni vale va nga wusa m'bango, va txi daya mthu hagari ka dona dizunga dile. 8Se dibutho da vathu va to kwela ve ya banzani ve ya khata kukombela ka Pilato ti to e maha ati a tolovelako ku va mahela. 9Pilato a wotisile a txi khene: “Mi lava ti to ni mu thukunyulela Mfumeli wa Vajudha kani?” 10Nguko a ti ti ziva ta ku vaphaxeli va hombe va mu ningete ngu livengo. 11Vaphaxeli va hombe va to kujetela dibutho ti to ve kombela kuthukunyulwa Bharabhasi. 12Pilato a to engeta kambe a txi womba kwawe, a txi khene: “Ni na maha txani kasi ngu wu mi mu dhanako ku i Mfumeli wa Vajudha kani?” 13Vona va to kwangula va txi khona: “Mu bethele ha txihambanoni!” 14Pilato a to khene kwawe: “Kasi ngubiha muni a nga ku maha kani?” Aniko vona va to tamarisa kukwangula va txi: “Mu bethele ha txihambanoni!” 15Se Pilato, ngu kulava kutsakisa dibutho, a to thukunyula Bharabhasi se, msana ka kuva a di rumete kukwapela Jesu, a to mu ningela kasiku e ya bethelwa ha txihambanoni. 16Masotxhwa ma to mu teka me mu yisa digumani, nyumbani ka wukoma ahawa va nga ya tshanganisa wotshe mtxawa. 17Msana keto, va to mu ambeka nguwo ya disilika do bhilivila, ve luka tshimbo ya mipa, ve yi gemeka ha msungo kwakwe. 18Senikoko, va to khata ku mu losa, va txi khona: “Xewe, Mfumeli wa Vajudha!” 19Se va txi mu peka ha msungo ngu msengele, ve mu thurela lure, na va txi khizama va txi mu khozela. 20Msana ka kuva va di mu tseketsete, va to mu thavisa nguwo yile yo bhilivila, ve mu ambeka siambalo sakwe. Senikoko va to mu teka kasi kuya mu bethela ha txihambanoni. 21Se ve mana mthu wo kari, Simoni wa Kirene, tate wa Alexandre ni Rufo, a nga txi pinda a txi wuya ngu thembweni; ve mu kurumeta kupakata txihambano txa Jesu. 22Se va to mu yisa ka wukhalo wu wu dhanwako ku i Golgota, ati ti wombako ku “Wukhalo wa Txikwakwa.” 23Va to mu ninga vhinya yo patwa ni mirra, kambe ene kha yi sela. 24Ngu msana va to mu bethela ha txihambanoni, ve abanela siambalo sakwe vona ngu txawe, va di thangile ngu kuxaxuva kasi kuwona atxi txi no lumba mmwane ni mmwane. 25I ti txikhati txa wuraru, mbimo yi va nga mu bethela ha txihambanoni. 26Ku ti ni m'bhalo wo komba mnandu wakwe, wu nga ti bhatwe ti taku: “Mfumeli wa Vajudha.” 27Kumweko nayo si bethetwe sigevenga simbidi, tximwetxo ngu didhawa da txinene, tximwane ngu didhawa da txibhabha kwakwe. [ 28Ngu hawa ku nga tatiseka ati ti nga bhalwa taku: “A batwe kumweko ni sindakamilayo.”] 29Ava va nga txi pinda va titi mu ruketela, va txi zinginika misungo yawe, va txi khona: “Ha! Awe u khundumusako Dithepele, u txi di aketa ngu masiku mararu. 30Ti hanyise upune, u txhika ngu ha txihambanoni!” 31Vaphaxeli va hombe kumweko ni vabhali va ti mu xowokisela nivona, va txi khona: “A hanyisile vamwane, se ene kha si koti ku ti hanyisa apune! 32Ene i ku Mesiya, Mfumeli wa Israyeli, a na txhike konakuwa ngu ha txihambanoni, kasiku hi na ti wona, hi txi kholwa.” Hambi ni vale va nga ti bethetwe kumweko nayo va to mu ruketela nivona. 33Se ku di hokile txikhati txa wutxhanu ni tximwetxo, ku to phuma txidema ka dotshe ditiko kala ka txikhati txa wutxhanu ni mune. 34Senikoko ngu txikhati txa wutxhanu ni mune, Jesu a to huwelela ngu dipswi da hombe, a txi khene: “Eloyi, Eloyi, lama sabaktani”, ati ti wombako ku: “Txizimu txangu, Txizimu txangu, u ni lekete txani?” 35Vamwanyane ka vale va nga titi ho konaho, mbimo yi va nga mu engisa, va to womba va txi khona: “Engisani, ene a dhana Elija.” 36Mmweyo wa vona a to tutuma e ya beta txiponja amu ka vhinagre, e txi zomeka ahawa ka litshava, e mu ninga kasiku e sela, na a txi khene: “Lekani, hi na nga wona mwendo Elija a na ta a ta mu txhikisa.” 37Aniko Jesu a to peka huwa ngu dipswi da hombe, a txi ningela muhefemulo wakwe. 38Se nguwo ya Dithepele yi to vharuka ngu hagari, kukhukhela txitimwi kala hahatshi. 39Nduna ya dizana da masotxhwa, yi nga ti emile hafuhi kwakwe, ngako yi di woni ati a nga fisa tona, yi to diwuka yi txi: “Hakunene awuwa mthu i ti Mwanana wa Txizimu!” 40Va titi ho kambe vavasikati va nga txi wonetela va di kule; hagari ka vona a titi ho Maria wa Magdhala ni Maria, mame wa Jakobe wa mdotho, ni Joseti ni Salome. 41Avava ngu vale va nga txi mu londisela ni ku mu thumela, mbimo yi ene a nga ti Galileya; ku ti ni vamwanyane vavasikati va vangi, va nga ti kwete kumweko nayo ve ya Jerusalema. 42Mbimo yi ditambo di nga txi ya kuswani, ka ditshiku da kulongisela, ati ti wombako ditshiku di di gametwako ngu Sabbata, 43Josefa wa Arimateya, i nga ti didhota da nduma ka Dibanza, awuwa nene a nga txi rinzela Mfumo wa Txizimu, a to tsanisa mbilu e tsula ka Pilato e ya kombela txirumbi txa Jesu 44Pilato a to xamala ngu kuengisa ti to Jesu se a fite. 45Konaho a to rumela kudhana nduna yile ya dizana da masotxhwa, e yi wotisa ti taku a fite kale kani. Se ngako a di zivisilwe ngu nduna ya dizana, Pilato a to rumela ti to txirumbi txi na ningelwe ka Josefa. 46Senikoko, Josefa, msana ka kuva a di xavile dilasori, a to thavisa mmidi wa Jesu ha txihambanoni, e wu phutela ngu dona, e wu veka diyivani, di nga ti ketwe ha dirigwini; se e wumbuluta txiwindi, a txi khubhunyeta ngu txona diyiva. 47Maria wa Magdhala ni Maria, mame wa Joseti, va to wonisisa ahawa va nga mu kelela kona.

will be added

X\