MARKU 14

1Ku txi sala masiku mambidi kasi ku yi mahwa Pasika ni M'buso wa mapawu o mbi na mtshumbelo, vaphaxeli va hombe ni vabhali va to lava marindi a ku mu ñola ngu wutxhari, kasiku ve mu daya. 2Aniko va txi womba tiya: “Kha ku laveki ku ti maha hagari ka msaho, vathu va nga wusa dizunga.” 3Se mbimo yi Jesu a nga ti Bhetaniya, mtini ka Simoni, awule wa tshekela, na se va di ha sakudyani, a to ta wamsikati, a di ni txikadyana txa alabhastru, txi nga ti ni mafura o bhumula a nardhu ya yinene, yo dhula ngutu, se e faya txikadyana e thela mafura ha msungo ka Jesu. 4Vamwanyane vathu va nga ti ho, va to ngurangura va txi khona: “A xakela mafura awa ngu txani kani? 5Nguko ma ndina xaviswa ngu male yo pinda mazana mararu a madhenari, kasi maleyo yi txi avelwa ka sisiwana.” Se va txi mu kawuka. 6Aniko Jesu a to womba a txi khene: “Mu lekeni, mi mu karatela txani kani? Ene a ni mahete mthumo wa wunene. 7Hakunene, sisiwana mi na va naso yotshe mbimo hagari kwanu, se mi nga si kota ku si mahela wunene ka dihi ni dihi ditshiku, ngako mi txi ti lava; aniko ani kha mi nambi va ni nani yotshe mbimo. 8Ene a mahile ati a nga ti kota; a songolete kutotela mafura mmidi wangu kasi ku wu longisela kuya tshotshwa. 9Ngu ditshuri na mi gela: ka wuhi ni wuhi wukhalo ku no txhumayelwa Evhangeli, ka mafu otshe, ti na xawutwa ni txona ti ene a nga ti maha, kasi kumaha txialakanyiso ngu ngene.” 10Senikoko, Judhasi Iskariyoti, mmweyo wa va digumi ni vambidi, a to tsula ka vaphaxeli va hombe kasi kuya mu ningela kwawe. 11Vona va di engisile ti a nga womba, va to tsaka, ve mu thembisa ku mu ninga male. Se ene a to lava mbimo ya yinene kasi ku mu ningela ngu yona. 12Ka ditshiku do khata da M'buso wa mapawu o mbi tshumbelwa, i ku ditshiku da kubhawa Txinvutana txa Pasika, vagondiswa va to mu wotisa va txi khona: “Ngu hani u lavako ku hi ya ku longisela kudyela kona Pasika kani?” 13Konaho ene a to rumela vambidi ka vagondiswa vakwe, a txi va gela ku khene: “Tsulani didhoropani, se mi na ya manana koneyo ni wamwamna, a di rwate lidhuwa la mati. Mu londiseni. 14Se ahawa ene a no wulela, mi na ya gela nyamne wa m'ti mi txi khanu: ‘Mgondisi a hi rumile kuta womba tiya: Yi hani nyumba yi ni no ta dyela ka yona Pasika ani ni vagondiswa vangu kani?’ 15Ene a na mi komba wukhalo wa hombe nyumbani, wu ku txitezini, amuwa ku nga longiselwa, ku txi tshuriselwa. Mi na ya hi longisela kona.” 16Vagondiswa va to khukha ve tsula didhoropani ve ya mana sotshe nga ti a nga va gelisa tona, ve longisela Pasika. 17Mbimo yi di nga swa ditambo, a to tsula navo va digumi ni vambidi. 18Txikhati txi va nga ti ha mezani va txi dya sakudya, Jesu a ti khene: “Ngu ditshuri na mi gela ku khani: mmweyo wanu a dyako ni nani a na ni ningela.” 19Vona va to khata kutelwa ngu dikhodo, mmwane ni mmwane a txi wotisa ku khene: “Ina ngani kani?” 20Kambe ene a to va xamula a txi khene “I mmweyo wa va digumi ni vambidi, awu a tsunulako mbiyani kumweko ni nani. 21Kha ditshuri Mwanana wa Mthu a tsulisa ti ti nga bhaliswa txona ngu ngene. Aniko dikhombo da wule a no ningela Mwanana wa Mthu! I ti ta tinene kwakwe eyo mthu, idiku a sa nga va ni kuvelekwa.” 22Mbimo yi va nga ti ha sakudyani, ene a to teka dipawu, a txi di katekisa, a txi di bhanda, a txi va ninga, a txi khene: “Tekani, asiya i mmidi wangu.” 23Ngu msana a to teka digombe a txi bonga, a txi va ninga. Votshe va sete ngu dona. 24Ene kambe a va gete a txi khene: “Asiya i mnoha wangu, mnoha wa txitumelelano, awu wu theketelwako vavangi. 25Kha ditshuri na mi gela ni khani: kha ni na mbi swa ni txi sela kambe mihando ya mvhinya kala ditshiku dile ni no ya yi sela yi di yiphya Mfumoni ka Txizimu.” 26Se ngako va di gwitile kuembelela tindando, va to huma ve tsula mmangoni ka Olivheti. 27Jesu a to va gela a txi khene: “Motshenu mi na khuvekiswa, nguko ti bhatwe ti taku: ‘Ni na peka mdyisi, se tinvuta ti na hangalaka.’ 28Aniko ngu msana ka kuva ni di wukile ngu ka vakufa, ni na mi thangela kuya Galileya.” 29Konaho Pedro a to angula a txi khene: “Hambi votshe va txi khuveka, ani kha ni na mbi khuveka ni kudotho.” 30Jesu a to mu xamula a txi khene: “Kha ditshuri na ku gela ti to nyamsi, ka wona wusiku wuwa, na mkuku wu si nzi kuemba kambidi, awe u na ni lamba kararu.” 31Aniko ene a to engeta e tsanisa ngu mtamo a txi khene: “Hambi idiku to laveka kufa kumweko ni nawe, ani kha ni na mbi ku lamba.” Votshe vamwane va to wombisa toneto nivona. 32Se va to hoka ka wukhalo wu wu dhanwako ku i Getsemani. Konaho Jesu a to womba ka vagondiswa a txi khene: “Zumbani kona hawa, na nga ya khongela.” 33Ene a to teka Pedro ni Jakobe ni Johane e tsula navo. Se e khata kuphatuka tikhana ni kuxaniseka ngutu. 34A to va gela a txi khene: “Moya wangu wu mu kuxanisekani ka hombe ko nga ka lifo! Zumbani hawa mi txi wonelela.” 35A di tshuketile kudotho masoni a to ti wisa hahatshi a txi khongela, a txi womba ti to, ngako ti txi koteka, txikhati txiya txi na pinde kwakwe. 36A txi womba kambe ku khene: "Abba!" Tata, totshe ta koteka kwako, thavisa digombe diya kule ni nani! Hambi keto, ti nga maheke nga kuranda kwangu, aniko ti na maheke ati awe u ti lavako.” 37Ngu msana, a to wuya kwawe, a ta va mana va di otete, se e womba ka Pedro a txi khene: “Simoni, wo otela kani? U tandekile kuwonelela txikhati txa tximwetxo kani? 38Wonelelani mi txi khongela, kasi mi si wuleli kudukwani; moya wa ti lava, aniko mmidi wa rereka.” 39Se a to tshumela kambe e ya khongela, na a txi womba kambe oneyo mapswi a mamwewo. 40Se e wuya kambe a ta va mana vagondiswa va di otete, nguko maso awe ma ti nemelwa ngu wukohe, va txi pwata ni dipswi do mu angula. 41A di wile kwawe da wuraru, a to va gela a txi khene: “Konkuwa otelani mi humula. Ti dingani. Se txikhati txi hokile. Mwanana wa Mthu wa ningelwa manzani ka vawonhi. 42Khukhani! He tsimbileni! Wa bwaka awu a ni ningelako.” 43Ene a di ngadi a txi wombawomba, a to bwaka Judhasi, mmweyo wa vale va digumi ni vambidi, kumweko ni mtxawa wa hombe wu nga ti xomile matxhari ni migomba, na va txi rumwa ngu vaphaxeli va hombe ni vabhali ni madhota a ditiko. 44Awule a nga ti mu ningela a ti va vekete txikombiso txiya: “Awule ni no mu pswopswa, ngeneyo; mu ñoleni mi tsula nayo, mi txi mu woneleta tatinene.” 45Neti a nga bwaka, a to mu tshuketela hafuhi kwakwe, a txi khene: “Mgondisi!”, se a txi mu pswopswa. 46Vona va to nawuluta mawoko ve mu ñola. 47Konaho, mmweyo wa vale va nga titi ho, a to somola ditxhari dakwe e peka ngu dona txithumi txa mphaxeli wa hombe e txi wila nzeve. 48Jesu a to va angula a txi khene: “Mi ta mi di xomile matxhari ni migomba, kuta ni ñola nga no va dikhamba! 49Otshe masiku ni ti kumweko ni nanu Dithepeleni, ni txi gondisa, kambe kha ma ni ñola; aniko se yi fanela kutatiseka Mibhalo.” 50Konaho, vagondiswa va to mu leka ve thava votshe. 51Mmweyo wa dizambi a to mu londisa, a di phambile dilasori kugwita. Se ve mu ñola. 52Aniko ene, a to leka dilasori manzani kwawe, a txi pshwonyowoka e thava a sa ambala txilo. 53Senikoko va to teka Jesu ve mu yisa ka mphaxeli wa hombe, ahawa va nga ti tshanganile vaphaxeli va hombe ni madhota a ditiko ni vabhali. 54Pedro a titi mu londetela a di kule, kala e wulela digumani ka mphaxeli wa hombe, ahawa a nga ya khalahatsha kumweko ni mahalamu e wora mndilo. 55Ti di mahile eto, vaphaxeli va hombe ni dotshe Dibanza va to lava wufakazi wo mangalela Jesu, kasi ve si kota ku mu daya, aniko va so wu pwata. 56Vavangi va to fakaza makuhu ngu ngene, aniko wufakazi wawe wu so hambana. 57Vamwanyane va to khukha ve mu mangalela ngu ku mu lumbeta, va txi khona: 58“Hi mu engisile a txi khene: ‘Ani ni na hasula Dithepele diya do mahwa ngu manza a vathu, se mndani ka masiku mararu, ni na aka dimwane do mbi mahwa ngu manza a mthu.’ ” 59Hambi keto, wufakazi wawe wu ti si pfani. 60Konaho, mphaxeli wa hombe a to khukha hagari kwawe, a txi ema, e wotisa Jesu, a txi khene: “Khu anguli txilo kani? Nda txani ti va ku mangalako ngu txona kani?” 61Aniko ene a to tamarisa a txi malala, a si anguli txilo. Mphaxeli wa hombe a to engeta e mu wotisa, a txi khene: “Ngawe Mesiya, Mwanana wa Txizimu txi txi dhumiswako kani?” 62Jesu a to xamula a txi khene: “Ngani. Futsi kambe mi na mu wona Mwanana wa Mthu a di khalahatshile txineneni ka Nyamne wa Mtamo wotshe, na a txi ta ngu marefu a nzumani.” 63Senikoko mphaxeli wa hombe a to vharula tinguwo takwe na a txi khene: “Hi ngadi hi txi lavela txani tifakazi kani? 64Mi txi engisile txiruko! Mi wona to txani kani?” Votshe va to lamula ti to ene a fanetwe ngu kufa. 65Se vamwane va to khata ku mu thurela lure, va txi mu fenengeta khohe ngu nguwo, na va txi mu peka tipama, va txi khona: “Hinga huta!” Mahalamu niona ma txi mu peka ngu tipama. 66Ka yoneyo mbimo, Pedro a ti maneka a di digumani, hahatshi. Konaho ku to ta kwakwe mmweyo wa txithumi txa wamsikati txa mphaxeli wa hombe. 67Se ngako a di woni Pedro a txi wora mndilo, a to mu wonisisa tatinene, se a txi khene: “Nanawe u ti kumweko ni Jesu wa Nazareta.” 68Aniko ene a kanetile a txi khene: “Kha ni ti zivi, futsi kambe kha ni ti mani eto u wombako.” Msana keto a to huma ha txikeni, se mkuku wu to emba. 69Senikoko awule wa txithumi, mbimo yi a nga mu wona kambe, a to engeta e womba ka vale va nga titi ho, a txi khene: “Awuwa i mmweyo wawe.” 70Aniko ene a to kaneta ka wumbidi. Se msana ka mbimonyana ya yidotho, ava va nga titi ho konaho, va to womba kambe ka Pedro va txi: “Awe ngu ditshuri u mmweyo wawe, nguko nawe u Mugalilewu.” 71Senikoko a to khata kuruketela ni kuxambanya a txi khene: “Kha ni mu zivi mthuyo mi wombako ngu ngene.” 72Konaho mkuku wu to emba ka wumbidi. Se Pedro e khumbula atile Jesu a nga ti mu gete taku: “Wu sa nzi kuemba kambidi mkuku, awe u na ni lamba kararu.” Konaho a to khata kudila.

will be added

X\