MARKU 13

1Kutingako a txi huma Dithepeleni, mmweyo wa vagondiswa vakwe a ti khene kwakwe: “Mgondisi, hinga wona kuxamalisa ka marigwi awa ni maakelo a tinyumba ta kona!” 2Jesu a txi khene kwakwe: “Wa ti wona tinyumba tiya ta hombe kani? Kha ku na mbi sala dirigwi txitimwi ka dirigwi, adi di no mbi khundumuswa.” 3Kutingako a di khate mmangoni ka Olivheti, na a di rendekelani ni Dithepele, Pedro ni Jakobe ni Johane ni Andrewu, va to mu wotisa, va di vokha, va txi: 4“Hi gele timhaka tiya, ti na maheka mbimo muni kani, txi na va txikombiso muni txi no komba ti taku txi hokile txikhati txa kutatiseka ka toshe tiya kani?” 5Jesu a to khata ku va gela a txi khene: “Ti woneleni ti to mi si thuki mi wongwa ngu mthu. 6Ngukuva vo tala va na ta ngu ditina dangu, va txi: ‘Ani ngani ene.’ Kambe va na timeta va vo tala. 7Ngako mi txi pfa tiyimbi ni nduma ya tiyimbi, mi nga thaveni, nguko ati ti fanete kuhumelela. Aniko hi nga ona magwito. 8Ngukuva ditiko di na wukela ditiko, mfumo wu na wukela mfumo, kutsekatseka ka mafu ku na va ho ka tiphuho to tala, ni tipaya ti na va ho. Eto ngu khata ka kuxaniseka. 9“Kambe anu ti woneleni, ngukuva va na mi yisa mabanzani ni masinagogani, mi na pekwa, mi emiswa masoni ka tinduna ni ka vafumeli ngu mhaka yangu, kasiku mi va tifakazi tangu masoni kwawe. 10Kambe ti fanete ti to Evhangeli yi txhumayelwa kuthanga ka otshe matiko. 11Ngako va txi mi ndinda va txi mi yisa kulamulwani mi nga thukeni mi vilela ngu ti mi no ya ti womba, aniko wombani ati mi no ningwa ka yoneyo mbimo, ngukuva hi nga anu mi no wombawomba, aniko i Moya wo Sawuleka. 12“Mwanawe mthu a na ningela mwanawe kudawani, tate wa mthu a na ningela mwanana wakwe; vanana va na wukela vaveleki vawe ngu mtamo ve va dayisisa. 13Mi na vengelwa ngu votshe ngu mhaka ya ditina dangu, aniko awu a timiselako kala magwito, ngene a no hulukiswa. 14“Ngako mi txi wona manyala a kuthisa ma di zumbile ahawa ku si faneliko (awu a gondako a na pfisise), ka yoneyo mbimo, ava va ku Judheya va na tutumele mimangoni. 15Awu a ku txitimwi ka nyumba a nga txhike, a nga wulele kuya teka txilo nyumbani kwakwe. 16Awu a ku thembweni a nga tshumele e ya teka nguwo yakwe. 17Ku na va ni dikhombo ka va va ku ni sirumbu, ni va va mamisako ka oneyo masiku. 18Khongelani ti to ti si humeleli ngu wuxika. 19Ngukuva ka oneyo masiku ku na va ni titshanisa ta hombe ngutu, ti to kukhukhela makhatoni ka ditiko di Txizimu txi nga di vanga kala konkuwa, kha ti khali kuva ho, futsi kambe kha ti na mbi nga va ho. 20Idiku Mkoma kha komisa masikuyo, nga ku si huluki mthu; aniko ngu mhaka ya va a nga va sawula, a komisile masikuyo. 21“Keyo mbimo, ngako mthu a txi khene kwanu: ‘Wonani Mesiya ndiyo’, mwendo ku: ‘Ndiyole haleya’, mi nga kholweni. 22Nguko ku na humelela Vamesiya va makuhu ni vaprofeti va makuhu; va na maha sidiwukiso ni sixamaliso kasi kupengisa ni va va nga sawulwa, ti txi koteka. 23I di anu, ti woneleni. Ani ni songolete ku mi gela totshe. 24“Ka masikuyo, msana ka kuxaniseka kuleya, ditambo di na maha txidema, mtxima wu na mbi woninga. 25Tinyeleti ti na wa ngu nzumani, mitamo yi yi ku nzumani yi na tsekatsekiswa. 26Konaho mi na wona Mwanana wa Mthu na a txi ta a di marefuni, a di ni mtamo wa hombe ni wudhumo. 27Ene a na rumela tingelozi takwe, ti txi tshanganisa votshe vale va nga sawulwa, va otshe matshelo a mune, khukhukhela magemetamitshi ka mafu kala magemetamitshi ka nzuma. 28“Gondani ngu txifaniso txa mxanvu. Ngako madhavi a wona ma di thambile, se ku txi thunga mazokoro, ma ti ziva ti to malanga ma hafuhi. 29Ngu toneto, ngako mi txi wona ti txi maheka tiya, ti ziveni ti to ene a hafuhi, a ha txikeni. 30Kha ditshuri na mi gela: liveleko liya kha li na mbi pinda, na totshe tiya ti sa maheka. 31Nzuma ni mafu si na pinda, kambe mapswi angu kha ma na mbi pinda. 32“Se ngu mhaka ya ditshiku da kona ni txikhati txa kona, a walo a si zivako, hambi tingelozi ta nzumani, hambi ene Mwanana; tsena Tate. 33Ti woneleni, ti bhasopeleni, nguko kha mi txi zivi txikhati. 34Inkusa ti fana ni mthu wu a nga maha dipfhumba. Mbimo yi a nga khukha ha mtini, a ningile mtamo ka sithumi sakwe, mmwane ni mmwane a txi mu ninga mthumo wakwe, se a txi eleleta ni muwoneleti wa ha txikeni ti to e wonisisa. 35Ngu toneto, ti woneleni, inkusa kha mi yi zivi mbimo yi a no wuya ngu yona nyamne wa m'ti, mwendo ni minova, mwendo ni hagari ka wusiku, mwendo mbimo yi wu embako mkuku, mwendo ni hale mixo. 36Kasiku, ngako a txi wuya a sa zivisa, a si ta mi mana mi di otete. 37Ati ni wombako kwanu, ni ti womba ka votshe; ni khani: Wonelelani!”

will be added

X\