MARKU 12

1Se a to khata kuwombawomba kwawe ngu sidinganiso, a txi khene: “Mthu a to phaya mivhinya e mi ranganyeta ngu libhiyo, a txi kelela nzeka yo kamela ka yona mihando, e aka txitezi. Msana keto, a to yi ningela ka vadimi, se ene e teka dipfhumba. 2Ngu mbimo ya kona, a to ruma txithumi ka vadimi ti to txi ya amukela mitxelo ya mivhinya. 3Kambe vona va to mu ñola, ve mu peka, se ve mu tshumeta a si na txilo. 4A to engeta e ruma tximwane txithumi kwawe. Aniko nene va to mu balisela msungo, va txi mu wisa tingana. 5A to engeta e va rumela mmwane; aniko eyo va to so mu daya. Se e ruma vamwane vo tala, ku txi pekwa vamwane, vamwane ve dawa. 6Kambe ngu kuva a di ngadi ni mwanana wa mmweyo, awu a randekako, nene a mu rumile kwawe, ngu kugwitisa, a txi khene: ‘Va na thava mwanana wangu.’ 7Aniko vadimi va to langana, va txi khona: ‘M'dyi wa thomba ndiyo! Ngonani hi ta mu daya, thomba yi na maha yathu.’ 8Se ve mu ñola, ve mu daya, ve mu tshotsha hahanze ka thembwe ya mivhinya. 9Nyamne wa thembwe a na maha txani kani? A na ta a ta fuvisa vadimi, se thembwe ya mivhinya a na yi ningela ka vamwane. 10Kha mi nzi kugonda mibhalo yi yi ku: ‘Dirigwi diya vaaki va nga di nyenya, ngu dona di nga mahwa da hombe do tsanisa. 11Eto ti mahilwe ngu Mkoma, i mhaka yi yi xamalisako masoni kwathu?’ ” 12Va ti lava ku mu ñola, aniko ve thava dibutho ngukuva va ti ti pfite ti to a wombawomba ngu vona ka txidinganiso txiya. Se ve mu leka, ve tsula. 13Se va to rumela vafarisi vo kari ni va ka Herodha, ka Jesu kasi ku mu bzweta ngu mapswi. 14Vona va to ta kwakwe va txi: “Mgondisi, ha ti ziva ti taku u womba ti ti nga tsana ni ti taku khu thavi mthu, nguko khu sawuli tikhohe ta vathu; aniko u gondisa nzila ya Txizimu ngu ditshuri. Ina hina ni fanelo yo humisa mkhupo ka Khezari mwendo hi nga tona kani? Ha khupa mwendo kha hi khupi?” 15Kambe ene, ngu kuziva kukanganyisa kwawe, a ti khene kwawe: “Mi ni dukela txani? Ni neheleni didhenari ni di wona.” 16Vona va to di neha. Se ene a txi khene kwawe: “Txifaniso txiya ni m'bhalo wuwa, nza mani kani?” Va txi kwakwe: “Nza Khezari.” 17Se Jesu e va xamula a txi khene: “Tshumetelani Khezari, asi i ku sa Khezari, ni Txizimu asi i ku sa Txizimu.” Se va to xamala ngutu. 18Vasadhusi va va wombako ti to ku walo kuwuka ka vafi, va to ta kwakwe va ta mu wotisa va txi: 19“Mgondisi, Mosi a hi bhalete a txi khene: Mthu ngako a txi fa, e siya msikati a singa ni mwanana, mwanawe a na mu sambele thaka e wusela liveleko mwanawe. 20Va titi ho vavamna va mtxhanu ni vambidi, va txikoma ni txinanda. Wo khata a tekile msikati, se a txi fa, a sa nga siya mwanana. 21Wa wumbidi a mu tekile, a txi fa nene a singa ni mwanana. Ti mahisile toneto ni ka wa wuraru. 22Votshe va mtxhanu ni vambidi kha va siya mwanana. Msana ka votshe, a to fa nene wu wamsikati. 23Ngu ditshiku da kuwuka ka vafi, ngako va di wukile, wamsikati wuwa a na va wa mani kani? Ngukuva a tekilwe ngu votshe va mtxhanu ni vambidi.” 24Jesu a to va xamula a txi khene “Ina kha mi timeli ngu kuwa mi si ziviko mibhalo ni mtamo wa Txizimu kani? 25Ngukuva, msana ka kuwuka ngu ka vafi, kha va na mbi ngadi ve teka, hambi i di kutekwa; se vathu va na va nga tingelozi nzumani. 26Ngako i di vafi ni kuwuka kwawe ina kha ma gonda dibhukuni ka Mosi, ngu tiya Txizimu txi nga womba nayo txipoponi txi txi kha txona: ‘Ngani Txizimu txa Abrahamu, Txizimu txa Isaake, Txizimu txa Jakobe?’ 27Txona hi nga Txizimu txa vafi, kambe i Txizimu txa va va hanyako. Idito, mi timete ngutu.” 28Mmwane wa vabhali, awu a nga va pfa va txi kanetisana, kutingako a txi wona ti to a va xamute tatinene, a to mu tshuketela a ta mu wotisa, a txi khene: “Ngu wuhi mlayo wo khata ka yotshelele kani?” 29Jesu a to angula a txi khene: “Wo khata ngu wuwa: ‘Israyeli, engisa: Mkoma Txizimu txako, ngu txona txokha i ku Mkoma. 30U na randa Mkoma Txizimu txako ngu yotshe mbilu yako, ngu wotshe muhefemulo wako, ngu otshe mapimo ako ni wotshe mtamo wako.’ 31Wa wumbidi ngu wuwa: ‘U na randa muakelani wako nga ti u ti randisako tona awe upune.’ Kha wu nga ho wumwane mlayo wo pinda yiya.” 32M'bhali a to angula a txi khene: “U womba tona, Mgondisi! Kha ditshuri, eto, u ti womba ngu kona, ti to: ‘Txizimu ngu txona txokha i ku Mkoma, hahanze ka txona kha nga ho mmwane’; 33ni ti kambe to: ‘Kuranda Txizimu ngu yotshe mbilu, ngu otshe mapimo, ngu wotshe mtamo, ni kuranda muakelani nga ti mthu a ti randisako tona’, ti ni lisima kupinda totshe timhamba to hiswa ni totshe tixaka ta timhamba.” 34Jesu a di woni ti to ene a xamute ngu wuzivi, a mu gete a txi khene: “Khu nga kule ni Mfumo wa Txizimu!” Se ni mmweyo a ti si tsani kambe ku mu wotisa txilo. 35Jesu, ngako a txi gondisa, Dithepeleni, a to wombawomba a txi khene: “Vabhali va wombisa ku txani ti to Mesiya i Mwanana wa Dhavhidha kani? 36Kasi Dhavhidha ene a wombile ngu Moya wo Sawuleka a txi khene: ‘Mkoma a ti khene ka Mkoma wangu: Khalahatsha txineneni kwangu kala ni maha valala vako txikhigetelo txa mikondo yako.’ 37Se akuwa Dhavhidha a mu dhanako ku i Mkoma, a nga va mwanakwe ngu ha ko txani kani?” Se dibutho di da hombe di ti mu engisa ngu kutsaka. 38Jesu a titi womba, na a txi gondisa, a txi khene: “Ti woneleni ka vabhali. Vona va dhunda kutsimbila va di ambate siambalo so lapha, va dhunda ni kuloswa mu mitendelani. 39Va dhunda makhalo o thanga mu mibusoni. 40Va moxa silo sa tinoni, va txi va dyelela ngu kulaphisa mikombelo. Va na mana txitsayiso txo karata.” 41Msana keto, Jesu a to khalahatsha hafuhi ni hawa va vekako kona male ya miningelo, a txi wonetela ati vathu va ningelisako tona. Vavangi va nyatithombe va txi thela male ya yingi. 42Se a txi ta mmweyo wa noni, i nga ti txisiwana, a ta ningela simaleana simbidi, sa sidotho. 43Jesu a to dhana vagondiswa a txi va embela a txi khene: “Kha ditshuri na mi gela ni khani: awu wa noni, wa txisiwana, a vekile mu ka msengo male ya yingi ngutu kupinda votshe. 44Votshe vamwane va vekile male, na yi txi khukhela kutalelwani kwawe; kasi ene, kupwatani kwakwe, a ningete sotshe simaleana si a nga ti naso, asi a nga ti fanela kuhanya ngu sona.”

will be added

X\