MARKU 11

1Ngako va txi tshuketela Jerusalema, hafuhi ni Bhetfage ni Bhetaniya, mmangoni ka Olivheti, Jesu a to rumela vambidi ka vagondiswa vakwe, 2a txi va gela a txi khene: “Tsulani ka m'ti wule wu ku masoni kwanu. Mbimo yi mi no wulela, mi na ya mana tximbongolana txi di sungilwe, atxi txi si nziko kugadhwa ngu mthu. Txi thukunyuleni mi wuya natxo. 3Ngako mthu wo kari a txi mi wotisa ti to, ‘Mi txi thukunyulela txani’, mi na khanu: ‘Mkoma ngene a txi lavako, a na kuluveta ku txi tshumeta txi wuya kona hawa.’ ” 4Vona va to tsula ve ya mana tximbongolana hahanze, txi di sungilwe masoni ka ditimba, hafuhi ni nzila, se ve txi thukunyula. 5Vathu va va nga titi ho kona hale, va to va wotisa va txi khona: “Mi thukunyulela txani txibongolanetxo kani?” 6Vona va to xamula kota nga ti Jesu a nga va gelisa tona, se ve va leka ve tsula. 7Senikoko, va to neha tximbongolana ka Jesu; ve kapekela tinguwo tawe txitimwi ka txona, se Jesu e txi gadha. 8Vathu vavangi va txi ateta tinguwo tawe ha nzila, vamwane va txi veketela matshanzu awa va nga ti gangete tithembweni. 9Ava va nga ti thangete masoni kwakwe ni va va nga ti londetela ngu msana, va txi kwangula va txi khona: “Hozana! A na dhumiswe awule a tako ngu ditina da Mkoma! 10Wu katekile Mfumo wu wu tako wa tate wathu Dhavhidha. Hozana txitimwi ka txitimwi nzumani!” 11Se Jesu a to wulela Jerusalema ni mu Dithepeleni. Ngako a di rumarumile sotshe, ni kuwa kambe di nga ti swite, a to huma e ya Bhetaniya kumweko ni va digumi ni vambidi. 12Mangwanani ka kona, ngako va txi huma ngu Bhetaniya, ene a to pfa nzala. 13Ngako a txi wona, a di kule, mndonga wa mxanvu, awu wu ku ni mazokoro, a to hambuka e ya wona ku mwendo a nga mana txo maha ka wona, aniko ngako a di hokile ka wona, kha mana txilo hahanze ka ona mazokoro dwe, ngukuva i nga ti singa mbimo ya maxanvu. 14Jesu se a txi khene ka wona: “Kukhukhela konkuwa, ku nga ve ni mthu wu a dyako mihando yako kala kupinduka.” Vagondiswa vakwe va ti ti pfa. 15Se ve hoka Jerusalema. Kutingako Jesu a di wulete Dithepeleni, a to khata kutovela ava va nga ti xavisa ni va va nga ti xava Dithepeleni. A to khubhunyeta timeza ta vatxitxi va male ni sikalo sa vaxavisi va situvane. 16Se a ti si tumeleli mthu kutshawunyeta Dithepele a di rwate somaha. 17Se a to va gondisa a txi khene kwawe: “Ina kha ka bhalwa ti to: ‘Nyumba yangu yi na dhanwa ku i nyumba ya kukhongela ka otshe matiko?’ Kasi anu mi yi maha mkele wa makhokhokho.” 18Kambe vaphaxeli va hombe ni vabhali, ngako ve mu pfa na a txi womba tiya, va to lava marindi ya tiya va no mu dayisa tona, kambe va to mu thava, ngukuva dibutho dotshe di ti xamala ngu kugondisa kwakwe. 19Kutingako di di swite, a to huma didhoropani. 20Ni mixo, ngako va txi pinda, va to wona mndonga wa mxanvu wu di womile wotshe, kukhukhela mikulutini. 21Pedro a txi alakanya a txi khene kwakwe: “Mgondisi, wona mndonga wuwa wa mxanvu, u nga wu ruketela, wu womile.” 22Jesu a to xamula a txi khene kwawe: “Vanani ni likholo ka Txizimu! 23Kha ditshuri ni khani kwanu: mmwane ni mmwane a no womba ka txitunga txiya, atxi: ‘Khukha u ya ti rinza lineneni’, na a si kanakani mbiluni kwakwe, kambe a txi kholwa ti ta ku ati a ti wombako ti na maheka, a na mahelwa tona. 24Ngu konaho ni khani kwanu: Sotshe si mi si kombelako ngu kukhongela, tumelani ti ta ku mi si amukete, si na va sanu. 25Kungako mi txi ema mi khongela, divalelani wu mi ku ni mhaka nayo, ti to nene Tate wanu wu a ku nzumani, e mi divalela kuwonha kwanu. [ 26Aniko, ngako mi si divaleli vamwane, nene Tate wanu wu a ku nzumani, kha na mbi divalela sihoxo sanu.”] 27Se va to engeta ve ya Jerusalema. Kutingako va txi tsimbilatsimbila amu Dithepeleni, vaphaxeli va hombe ni vabhali ni madhota va to ta kwakwe, 28va ta mu wotisa, va txi: “I mtamo muni u mahako ngu wona tiya kani? Mwendo i mani a nga ku ninga mtamo wa kumaha tiya kani?” 29Jesu a to va xamula a txi khene: “Anani ni na mi wotisa mhaka yimweyo. Ni xamuleni, se nani ni na mi gela amuwa wu tako ngu kona mtamo wuwa ni mahako ngu wona atiya. 30Mtamo wa kubhabhatisa ka Johane wu ta ngu nzumani mwendo wu ta ngu ka vathu? Ni xamuleni.” 31Vona va to wombawomba ngu txawe va txi: “Hi txi khathu wu ta ngu nzumani, a na khene: ‘Ngu ku txani mi nga mbi kholwa kwakwe kani?’ 32Aniko, ngako hi txi khathu: ‘Wu ta ngu ka vathu...!’ ”Va ti thava vathu, nguko votshe va ti khona Johane hakunene i mprofeti. 33Se va to mu xamula Jesu va txi khona: “Kha hi ti zivi.” Konaho Jesu a to xamula, a txi khene kwawe: “Nanani kha ni na mbi mi gela mtamo wu ni mahako ngu wona atiya.”

will be added

X\