MARKU 10

1Jesu kutingako a di khukhile koneho, e ya ditikoni ka Judheya, mtxhatuko ka Jordhani, vathu va vangi va to ta sengeletana kwakwe. 2Vafarisi va to tshuketela hafuhi kwakwe va txi mu wotisa, ngu ku mu duka, va txi khona: “Ina wamwamna a nga si kota kutovela msikati wakwe kani?” 3Ene a to angula a txi khene “Mosi a mi layisile ku txani?” 4Vona va ti khona: “Mosi a hi tumelete kubhala dipasi da kuhambana ni msikati ni ku mu tovela.” 5Jesu a nje khene kwawe: “Mosi a mi vekete mlayowo nguko mi ku vathu va timbilu ta kubanga. 6Kambe kukhatani Txizimu txi va vangile mwamna ni msikati. 7Ngu toneto wamwamna a na siya tate wakwe ni mame wakwe a txi namarela ka msikati wakwe; 8se va na maha nyama yimweyo ngu wumbidi wawe; ngu toneto hi nga ngadi vambidi, vo va i di mmidi umwewo. 9Ngu toneto, asiya Txizimu txi nga si tshanganisa mthu a nga thuke a txi si abanisa.” 10Se ngako va di mtini, vagondiswa va to engeta ve mu wotisa mhaka yiya. 11Jesu a va xamute a txi khene: “Awule a tovelako msikati wakwe e tekana ni mmwane, a maha wugango wa kuhoxela wule wo khata. 12Ngako wamsikati a txi tovela mwamna wakwe, a txi tekana ni mmwane, a maha wugango.” 13Vathu va to mu tisela sivananana kasiku e si gwesa, kambe vagondiswa va to va tsimbisela. 14Aniko Jesu, mbimo yi a nga wona tiya, a to henya, a txi khene: “Lekani sivananana si txi ta kwangu, mi nga si tsimbiseni, nguko Mfumo wa Txizimu wu lumba ava vo nga tiya. 15Kha ditshuri na mi gela ku khani: Awule a si amukeliko Mfumo wa Txizimu nga mwanana, txima kha na mbi wulela ka wona.” 16Konako a to si singarela a txi si sanzeka manza, a txi si katekisa. 17Mbimo yi Jesu a nga huma a txi goxometa nzilani kwakwe, mthu wo kari a to tutuma a ta mu khizamela, a txi mu wotisa a txi khene: “Mgondisi wa mnene, nji txani ni fanelako ku txi maha, kasiku ni mana thomba ya wutomi wo mbi guma?” 18Jesu a to mu angula a txi khene: “I mhaka muni u txi ni womba ti to ni wamnene? Kha nga ho wu i ku wamnene, hahanze ka Txizimu. 19Wa yi ziva milayo yi yi ku: ‘U nga daye, u nga mahe wugango, u nga pe, u nga lumbete, u nga dyelele, thava tate ni mame.’ ” 20Ene a to mu xamula a txi khene: “Mgondisi, totsheleleto ani ni ti veketile, kukhukhela ha wananani kwangu.” 21Konaho Jesu a to gula maso a txi mu wonisisa ngu ku mu dhunda, se a txi mu gela tiya: “U pwatekelwa ngu txilo tximwetxo dwe: Tsula u txi ya xavisa sotshe si u ku naso, u txi ningela ka sisiwana. U na mana thomba nzumani. Se ngono u txi ni londeta.” 22Aniko mthu wule a to thuvika khohe ngu kuengisa mapswi awa, a txi khukha e tsula ngu kupandiseka, nguko i ti nyatithombe. 23Se Jesu a to rumaruma a txi gela vagondiswa vakwe a txi khene: “Ta karata ngutu tatinene kuwulela Mfumoni ka Txizimu avale va ku ni tithomba.” 24Vagondiswa va to xamala ngutu ngu mapswi akwe. Kambe Jesu a to engeta a txi khene: “Vanavangu, ti karatile ngutu kuwulela Mfumoni ka Txizimu! 25Ta hehuka kuwulela dikamelu ka ditshoko da txhingane, kupinda kuwulela nyatithombe Mfumoni ka Txizimu.” 26Se vona ve xamala ngutu ka kupindisa, va txi wotisana ngu txawe, va txi khona: “Se i mani a no si kota kuhuluka?” 27Ngako ene a di gute maso a txi va wonisisa, a to va angula a txi khene: “Ka vathu, eto kha ti koteki, aniko ka Txizimu ta koteka, inkusa ka Txizimu totshe ta koteka.” 28Pedro a to angula a txi khene: “Hinga wona, athu hi lekile sotshe, hi txi ku londetela.” 29Jesu a to xamula a txi khene: “Kha ditshuri na mi gela: Kha ku nga ho mthu wu a nga leka nyumba, vanawe, tindiyakwe, mame, tate, vanana mwendo tithembwe, ngu mhaka yangu ni ngu mhaka ya Evhangeli, 30awu a no mbi amukela, ka txona txikhati txa nyamsi, dizana da tinyumba, da vanawe, da tindiya, da vamame, da vanana mwendo da tithembwe, kumweko ni sixaniso; se ka txhikhati txi txi tako, wutomi wo mbi guma. 31Kambe vavangi vo thanga va na va va magwito, se va magwito va na va vo thanga.” 32Ngako va di ngadi ha nzila, va txi kwela kuya Jerusalema, Jesu a to thangela masoni kwawe. Vona va ti xamala, ve mu londetela na va txi thava. Se ene a to engeta e ya phuho ni va digumi ni vambidi a txi khata ku va gela ati ti no mu humelela, a txi khene: 33“Wonani, hi kwelela Jerusalema, se Mwanana wa Mthu a na ningelwa ka vaphaxeli va hombe ni ka vabhali. Vona va na mu avanisela lifo ve mu ningela ka vamatiko. 34Va na mu poyilela ve mu thurela lure, ve mu kwapela ni ku mu daya, aniko msana ka masiku mararu, a na tshumela a txi wuka.” 35Jakobe ni Johane, vanana va Zebhedhewu, va to tshuketela Jesu va txi mu angula ngu mapswi awa: “Mgondisi, hi lava ku u txi hi mahela ati hi no ku kombela.” 36Jesu a to wotisa a txi khene: “Kasi mi lava ni txi mi mahela txani?” 37Vona va mu xamute va txi khona: “Hi tumelele ti to mmweyo wathu u txi mu khalahatshisa txineneni kwako, mmweyo u txi mu khalahatshisa txibhabha kwako, wudhumoni kwako.” 38Jesu a to va xamula a txi khene: “Kha mi txi zivi txi mi kombelako tona. Ina mi nga si kota kusela ka digombe da wuvi adi ani ni no sela dona, ni kuamukela txibhabhatiso txi ani ni no txi amukela kani?” 39Se vona ve xamula va txi: “Inna! Hi nga si kota.” Se Jesu a nje khene kwawe: “Digombe di ani ni no sela ka dona, nananu mi na di sela, ni txibhabhatiso txi ni no txi amukela, nananu mi na txi amukela. 40Kambe kukhalahatsha txineneni kwangu, mwendo txibhabha kwangu, eto kha ti nga mtamoni kwangu, ti lumba avale va nga longiselwa tona.” 41Mbimo yi va nga ti engisa ava va digumi, va to khata kuhenyela Jakobe ni Johane. 42Jesu a to va dhana a txi va gela ku khene: “Ma ti ziva ti to avale va dhanwako ku mbafumeli va matiko, va fuma ngu mitamo, madhota a kona ma tsotsorola vathu. 43Kambe kha ti laveki eto hagari kwanu. Awule a lavako kumaha wa hombe hagari kwanu, a na ti mahe txithumi txanu, 44ani wule a lavako kumaha mthangeli a na ti mahe txithumi txa votshe. 45Inkusa Mwanana wa Mthu kha tela kuta thumelwa, a tete kuta thumela vamwane ni kuningela wutomi wakwe kasi ku na terula vavangi.” 46Va to hoka Jeriko. Se ngako Jesu a txi huma ngu Jeriko ni vagondiswa vakwe ni dibutho da vathu vo tala, Bhartimewu, mwanana wa Timewu, awu i nga ti dibhofu da kuzumba ha nzila a txi kombela, 47ngako a di engisile ti to awule a pindako i Jesu wa Nazareta, a to khata kukwangula a txi khene: “Jesu Mwanana wa Dhavhidha, hinga ni mahela wumbilu.” 48Vavangi va titi mu kawuka va txi a na malale, kambe ene a so tamarisa a txi kwangula ngu mtamo a txi khene: “Mwanana wa Dhavhidha, hinga ni mahela wumbilu!” 49Se Jesu a to ema, a txi khene: “Mu dhaneni!” Vona va to mu dhana wule wa dibhofu, va txi mu gela va txi khona: “Tsana msana, khukha, ene wa ku dhana!” 50Ene a to tshotsha nguwo yakwe, a so lepu a ya ka Jesu. 51Jesu a to mu wotisa a txi khene: “U lava ni txi ku mahela txani?” Wa dibhofu a to angula a txi khene: “Mgondisi, maha ti to ni tshumela ni wona.” 52Jesu a to mu gela a txi khene: “Tsula, likholo lako li ku hanyisile.” Konaho, a to tshumela e mana kuwona, se e mu londisa nzilani.


Copyright
Learn More

will be added

X\