MARKU 1

1Makhato a Evhangeli ya Jesu Kristu, Mwanana wa Txizimu. 2Nga ti ti nga bhalwa ngu mprofeti Isaya, a nga khene: “Wona, na ruma masoni kwako mtumi wangu, awu wu na kulungisa nzila yako. 3Nga ti ti nga bhaliswa tona dibhukuni ka Mprofeti Isaya, a nga khene:" Dipswi da wule a kwangulako txiwulani di: ‘Lungisani nzila ya Mkoma, lulametani maphango akwe.’" 4Se ene a to tsimbila ka dotshe ditiko da Jordhani, a txi txhumayela txibhabhatiso txa kuhunduluka, kasiku ve mana divalelo ya siwonho. 5Dotshe ditiko da Judheya ni votshe vathu va Jerusalema va titi ya kwakwe, ve ya bhabhatiswa votshe mnamboni ka Jordhani, va txi ti tshanza siwonho sawe. 6Johane a ti ambate didhowo da dikamelu, e ti sunga txiwunu ngu libhande la didhowo, a txi dya humbi ni wulombe wa txitinga. 7A ti txhumayela a txi khene: “Msana kwangu wa ta mmwane, awu a ku ni mtamo kupinda ani, awu ani ni singa ni fanelo hambi ya kunama masoni kwakwe ni thukunyula tingoti ta tikathula takwe. 8Ani ni mi bhabhatisa ngu mati, aniko ene a na ta mi bhabhatisa ngu Moya wo Sawuleka.” 9Ka oneyo masiku,Jesu a tile ngu Nazareta ka Galileya, a ta bhabhatiswa ngu Johane, mnamboni ka Jordhani. 10Mbimo yi a nga txi huma ngu matini, a to wona nzuma yi txi tuleka, se Moya wo Sawuleka wu txi txhika nga txituvane txitimwi kwakwe. 11Ku to huma dipswi da kuta ngu nzumani, di txi: “Awe u Mwanana wangu wo randeka ngutu, awu ni mu tsakelako.” 12Se konako Moya wo Sawuleka wu to yisa Jesu txiwulani. 13Ene a ti ya fungala mune wa makumi a masiku a di txiwulani, se e dukwa ngu Sathane. A txi hanya hagari ka sihari sa txitinga, se tingelozi ti txi mu thumela. 14Kutingako Johane a di khotetwe mkorani, Jesu a to ya Galileya, e ya txhumayela Evhangeli ya Txizimu, a txi khene: 15“Mbimo yi tatisekile, se Mfumo wa Txizimu wu hokile. Hundulukani mi txi kholwa ka Evhangeli”. 16Ngako a txi tsimbila hafuhi ni digova da Galileya, a to wona Simoni ni mwanawe Andrewu, va txi beta tikoka tawe digovani, nguko i ti vakoki va sihaka. 17Jesu a to va gela a txi khene: “Ni londiseni, ni na mi maha vakoki va vathu.” 18Kunukunuko, vona va to leka tikoka tawe, ve mu londisa. 19Se ngako a txi ya masoni, a to wona Jakobe, mwana Zebhedhewu, ni Johane, mwanawe, va di mu ngalavani, va txi rungetela tikoka tawe. 20Kunukunuko ene a to va dhana. Vona va to siya tate wawe Zebhedhewu kumweko ni sithumi mu ngalavani ve mu londisa. 21Se va to wulela Kapernawume. Ngu ditshiku da Sabbata, Jesu a to wulela disinagogani, a txi gondisa. 22Kambe va ti xamala ngu gondo yakwe, nguko a ti va gondisa nga wu a ku ni mtamo, a si fanani ni vabhali. 23Senikoko, a titi ho, kona disinagogani mule kwawe, mthu wu a nga ti wuleletwe ngu moya wa nzambwa, awu a nga kwangula a txi khene: 24“Nji txani u ku natxo ni nathu, Jesu wa Nazareta? U tela kuta hi lovisa kani? Ani na ku ziva ti to ngawe mani: U Msawuleki wa Txizimu.” 25Aniko Jesu a to wu dhusa a txi khene: “Malala, u txi huma keyo mthu!” 26Se moya wa nzambwa, msana ka ku mu zuzazuza, wu to peka huwa wu txi huma ka mthu wule. 27Se votshe va txi diwuka ngutu, va txi wotisana va txi khona: “Nji txani txiya? I gondo ya yiphya! Hambi mimoya ya nzambwa ene a yi dhusa ngu mtamo, yi txi mu engisa!” 28Kunukunuko nduma yakwe yi to hangalaka ka otshe makhalo a Galileya. 29Mbimo yi Jesu a nga huma ngu disinagogani, a to tsula kumweko ni Jakobe ni Johane nyumbani ka Simoni ni Andrewu. 30Mkokati wa Simoni a ti otete ha ditahoni, ngu kulwala ngu txindeyandeya, se ve kuluveta ve mu wombela ka Jesu. 31Ene a to tshuketa a txi mu ñola ngu diwoko a txi mu wusa; txindeyandeya txi to mu leka, se ene e khata ku va thumela. 32Minovani ka kona, mbimo yi di nga swa ditambo, va to tisa ka Jesu votshe valwali ni va va nga ti ni madhimoni. 33Vathu va dotshe didhoropa va ti ta sengeletana ha txikeni. 34A hanyisile valwali va nga txi karatwa ngu mipando yo hambana, a txi tovela madhimoni a mangi. Kambe a si tumeli ti to madhimoni me wombawomba, nguko ona ma ti mu ziva. 35Ni mixo, ku di ngadi phum, a to huma nyumbani e ya ka wukhalo wa ekhalela, a txi ya khongela kona. 36Kambe Simoni ni va a nga ti navo va to mu londisa. 37Mbimo yi va nga mu mana, va mu gete va txi khona: “Votshe va ku lava.” 38Ene a to va xamula a txi khene: “He tsuleni ka wumwane wukhalo, he tsuleni ka miti yile ya hafuhi, hi txi ya txhumayela kona, nguko ni tete toneto.” 39Ene a to tsimbila ngu dotshe da Galileya, a txi txhumayela masinagogani, a txi tovela madhimoni. 40Mthu wa tshekela a to ta kwakwe, a ta khizama a txi mu kombela, a txi khene: “Ngako u txi ti lava, u nga ni basisa.” 41Jesu, ngu kutalelwa ngu wumbilu a to nawuluta diwoko a txi mu gwesa, a txi khene kwakwe: “Na ti lava. Basiswa.” 42Kunukunuko tshekela yi to mu leka, ene a txi sala a di basile. 43Jesu a to tekela ku mu laya ngutu, a txi mu tsutisa ngu kukuluveta, 44a txi khene kwakwe: “U nga thuke u txi womba txilo ka mthu, aniko tsula u txi ya ti kombekisa ka mphaxeli, u txi maha mningelo wa kubasiswa kwako, kota nga kuruma ka mlayo wu wu nga leletwa ngu Mosi, kasi kumaha wufakazi kwawe.” 45Kambe ene, neti a nga huma, a to khata kuhuwelela, a si malali, e hangalasa mahungu ale, se Jesu e tandeka ni kuwulela ka m'ti wuhi ni wuhi, na ti txi ziwa; aniko a ti zumbela hahanze, ekhalela, se vathu ve huma ngu ka otshe makhalo ve ta kwakwe.

will be added

X\