LUKA 6

1Ngu ditshiku da Sabbata, Jesu a to pinda hagari ka tithembwe, se vagondiswa vakwe ve funya maphumbu a silo ve tsikitela ngu manza, ve dya. 2Vafarisi vo kari va txi khona kwawe: “Mi mahela txani ati ti si faneliko kumahwa ngu Sabbata?” 3Jesu a to va xamula a txi khene: “Ina kha ma gonda ati ti nga mahwa ngu Dhavhidha ditshiku di a nga pfa nzala ene ni va a nga ti navo kani? 4Ene a to wulela nyumbani ka Txizimu e teka mapawu a mhamba, e dya, e ninga ni va a nga ti navo, hambiko si nga ti sa fanela kudyiwa ngu vamwane vathu, i singa vaphaxeli dwe.” 5Se a txi khene kwawe: “Mwanana wa Mthu i Mkoma wa yona Sabbata.” 6Ngu dimwane ditshiku da Sabbata, Jesu a to wulela disinagogani a txi gondisa. Se a titi ho mthu, awu diwoko dakwe da txinene di nga ti womile. 7Vaphaxeli ni vafarisi va to mu wonetela, kasi kuwona ti to mwendo a na hanyisa ngu Sabbata kani, ti to va na mana txi va no mu mangalela ngu txona. 8Kambe Jesu a txi yi ziva mialakanyo yawe, se e gela mthu wu wa kuwoma diwoko, atxi: “Khukha u txi ema hawa hagari.” 9Ene a to khukha a txi ema. Jesu a to khene kwawe: “Na mi wotisa ti to ngu ditshiku da Sabbata ku lulamile kumaha tihi kani, kumaha ta tinene mwendo kumaha ta walo; kuhanyisa mthu mwendo ku mu lovisa?” 10Se a to va wonisisa votshe, a txi gela mthu wule a txi: “Nawuluta diwoko dako.” Ene a to mahisa toneto, se diwoko dakwe di hanyiswa. 11Konaho vona va to tala ngu kuhenya, se ve wombawombisana ngu ti va no ti maha ka Jesu. 12Ka ale masiku Jesu a to ya mmangoni kuya khongela. Se e pila wusiku wotshe a txi khongela ka Txizimu. 13Ngako di di txite, a to dhana vagondiswa vakwe, se e sawula, hagari kwawe, Digumi ni Vambidi, ava a nga va raya ditina da ku i Vapostoli. 14I Simoni, awu a nga mu raya ku i Pedro, ni Andrewu mwanawe; ni Jakobe, ni Johane, ni Filipi, ni Bhartolomewu, 15ni Matewu, ni Tomasi, ni Jakobe mwana Alfewu, ni Simoni a dhanwako ku i Zelote, 16ni Judhasi mwana Jakobe, ni Judhasi Iskariyoti, awu a nga ningela Jesu. 17Kutingako a di kwitimile navo ngu mmangoni, a to ema ha ndandalani, se dibutho da hombe da vagondiswa vakwe ni vathu va vangi va kuta ngu ka dotshe da Judheya, ni Jerusalema, ni matiko a hafuhi ni linene a Tiri ni Sidhoni, 18ve ta kwakwe kuta mu engisa ni kuta hanyiswa ka malwati awe. Ni va va nga txi karatwa ngu mimoya ya nzambwa nivona va titi hanyiswa 19Dibutho dotshe di ti lava ku mu gwesa, nguko mtamo wu ti huma ngu kwakwe, wu txi va hanyisa votshe. 20Jesu a to gula maso a txi wona vagondiswa vakwe, a txi khene: “Mi katekile anu sisiwana, nguko mfumo wa nzumani mbwanu. 21Mi katekile anu mi pfako nzala konkuwa, nguko mi na khura. Mi katekile anu mi dilako konkuwa, nguko mi na seka. 22Mi katekile anu, ngako vathu va txi mi zonda, va txi mi tovela, va txi mi ruketela, va txi nyenya ditina danu nga do va ni nduma yo biha, ngu mhaka ya Mwanana wa Mthu. 23Tsakani ka donedo ditshiku, mi txi giya, nguko nzumani, hakhelo yanu yi na va i di ya hombe; vatate vawe nivona ngu toneto va nga mahisa tona ka vaprofeti. 24Aniko, dikhombo danu anu vanyatithombe, nguko mi ku mani kale kuthavelelwa kwanu. 25Dikhombo danu anu konkuwa mi nga khura, nguko mi na va ni nzala. Dikhombo danu, anu konkuwa mi sekako, nguko mi na pandiseka mi txi dila. 26Dikhombo danu, ngako vathu votshe va txi mi dhumisa. Ngu toneto vatate vawe va nga txi mahisa tona ka vaprofeti va makuhu. 27“Aniko ani na mi gela, anu mi ni engisako, ni khani: Randani valala vanu, mahani wunene ka vale va mi zondako, 28Wombani mapswi a wunene ka vale va mi ruketelako, khongelelani avale va mi xanisako. 29Ka wule a ku pekako dithama, mu ningetele dimwane; awule a ku tekelako dibhaji, u nga mu lambele dihembe. 30Awu a kombelako, mu he, aniko u nga vile awule a ku tekelako txako. 31Ati mi ti dhundako ku vamwane va txi mi mahela tona, nananu va maheleni toneto; 32Ngako mi txi randa avale va mi randako dwe, ngu tshungulwa ka txani mi no ku mana ka toneto kani? Hakunene, hambi vawonhi nivona va randa avale va va randako. 33Seni kambe ngako mi txi mahela wunene dwe, awule a mi mahelako wunene, ngu tshungulwa ka txani mi no ku mana ka toneto kani? Vawonhi nivona va ti maha toneto. 34Se ngako mi txi lomba so maha dwe awule mi rinzelako kutshumetelwa ngene, mi na bongwa ka tihi kani? Vawonhi nivona va lombisa simaha vamwane, kasiku ve tshumetelwa ngu simwane so fana. 35Kasi i di anu, randani valala vanu, mahani wunene, mi txi lombisa simaha sanu ka vamwane, hambi mi si rinzeli kutshumetelwa ngu vona. Kudihelwa kwanu ku na va ka hombe, mi na va mi di vanana va Nyatxitimwi, nguko Ene wa maha wunene ka vale va si ziviko kubonga ni ka vale va tshofu. 36Telwani ngu wunene, nga Tate wanu nene a ku ni wunene. 37“Mi nga lamuleni kasiku nananu mi si lamulwi ngu Txizimu, mi nga ningeni mnandu vamwane, kasiku nananu mi si ningwi mnandu; divalelani siwonho sa vamwane, kasiku nananu mi na divalelwa. 38Hanani vamwane, kasiku nananu mi na hiwa. Ha tikhanani kwanu ku na thelwa mpimo wa wunene, wo zindetwa, wu txi khusungelwa, wo tala wu txi thekela; inkusa mpimo wu mi no pimela vamwane, ngu wonewo nanu mi no pimelwa ngu wona.” 39A to va mahela txidinganiso txiya: “Ina dibhofu di nga si kota kukombisa nzila dimwane dibhofu kani? Ina kha ma na mbi wa ngu wumbidi wa ona txikheleni kani? 40Mgondi kha pindi mgondisi wakwe, aniko mgondi wuhi ni wuhi a nga gondiswa tatinene, a na fana ni mgondisi wakwe. 41“U wonisa ku txani txitsokoro txi txi ku disoni ka mwananu, u si woniko mtanda wu wu ku disoni kwako kani? 42U nga si kotisa ku txani kugela mwananu u txi khawe: ‘Mwanathu, thutha ni thavisa txitsokoro disoni kwako,’ na kasi awe khu woni mtanda wu wu ku disoni kwako kani? Mxengeteli, thanga ngu kuthavisa mtanda wu wu ku disoni kwako, se ngu kona u no wona kuthavisa txizokoro disoni ka mwananu. 43“Kha wu nga ho mndonga wa wunene wu ningako m'hando wo biha, futsi kambe kha wu nga ho mndonga wo biha wu ningako m'hando wa wunene. 44Hakunene, mndonga wu ziwa ngu mihando ya wona; kha va haphi maxanvu amu ka sihaha; futsi kambe kha va haphi mauvha amu ka likwakwati. 45Mthu wa mnene a humisa sa sinene ngu ka txuma txa txinene txa mbilu yakwe. Aniko mthu wa tshofu, ngu ka txuma txa tshofu ya mbilu yakwe, a humisa so biha, nguko txisofu txa mthu txi wombawomba ngu tile ti nga tala mbiluni. 46“Njani mi ni dhanako mi txi: ‘Mkoma, Mkoma’, kuve kha mi mahi ti ni mi gelako tona kani? 47Wuhi ni wuhi a tako kwangu, se a txi engisa mapswi angu, e va e ma thumisa, ni na mi kombisa awu a fanako nayo. 48A fana ni mthu wu a akako nyumba, awu a nga kela e hokomisa, a txi veka makhato ha dirigwini; se ngako yi txi ta ndambi, mtalo wa mati wu yi peka, kha yi dekadeki, ngukuva yi akilwe khakwati. 49Aniko awu a engisako mapswi angu, a si ma thumisi, a fana ni mthu wu a nga aka nyumba yakwe ha divhunyeni, yi si na makhato; ngako mtalo wa mati wu txi yi peka, yi kuluveta kuwa, se kulova ka nyumba yiya ku txi va i di ka manyala.”

will be added

X\