LUKA 4

1Jesu, a di tate ngu Moya wo Sawuleka, a to khukha mnamboni ka Jordhani, a txi yiswa txiwulani ngu wona Moya wo Sawuleka, ahawa a nga ya zumba mune wa makumi a masiku, 2Se e dukwa ngu Sathane. Mndani ka masiku ale, kha nga va ni kudya txilo, se mbimo yi ona ma nga guma ene a to pfa nzala. 3Sathane a to mu gela a txi khene: “Ngako u di Mwanana wa Txizimu, gela dirigwi diya di txi phinduka di maha sakudya.” 4Jesu a to angula, a txi khene: “Mthu kha hanyi ngu sakudya dwe.” 5Sathane a to mu teka a txi mu yisa mmangoni, a txi mu komba ngu txikhatianyana, yotshe mifumo ya ditiko, 6a txi mu gela ku khene: “Ni na ku ninga wotshe wukoma wuwa ni kupfaliswa ka matiko awa, nguko si ningilwe ani, se ani na ninga wu ni ti lavako ku mu ninga; 7Ngako u txi ni khozela, sotshe siya si na lumba awe.” 8Jesu a mu xamute a txi khene: “Ti bhatwe ti taku: ‘U na khozela Mkoma Txizimu txako, u txi thumela txona, dwe.’ ” 9Ngu msana, a to mu yisa Jerusalema, a txi ya mu veka txiroroni ka Dithepele, a txi khene kwakwe: “Ngako u di Mwanana wa Txizimu, ndaka u txi zatama hahatshi, 10Nguko ti bhatwe ti taku: ‘Ene a na leleta tingelozi takwe kasiku ti kulwela kotshe mu u tsimbilako kona.’ 11Ti bhatwe kambe va txi: ‘Tona ti na ku khamukela manzani ka tona, kasiku mkondo wako wu si humbwi ngu dirigwi.’ ” 12Jesu a to xamula a txi khene: “Ti wombilwe ti to: ‘U nga thuke u txi duka Mkoma Txizimu txako.’ ” 13Se ngako a di hetile sotshe siduko, Sathane a to khukha e leka Jesu, kala yimwane mbimo. 14Jesu a to wuya Galileya ngu mtamo wa Moya, se nduma yakwe yi txi hangalaka ka otshe maphambo a hafuhi. 15A titi gondisa masinagogani, a txi dhumiswa ngu votshe vathu. 16Ene a to tsula Nazareta, ahawa a nga kulela kona, se ngu toloveto yakwe, a to wulela disinagogani ngu ditshiku da Sabbata, se a txi khukha a txi ema kasi kugonda dibhuku. 17Va to mu ninga dibhuku da mprofeti Isaya. Mbimo yi a nga di tula, a to mana wukhalo wu ku nga bhalwa ti to: 18“Moya wa Mkoma wu txitimwi kwangu, nguko Ene a ni totile, kasiku ni ya huwelela mahungu a manene ka sisiwana, a ni rumete kuya nuwela mhaka ya kuthukunyulwa ka va vo sungwa, ni ka mabhofu kuningwa kutshumela me wona, kuya thusa ava va xaniswako, 19ni kupeka nyiwo ya dilembe do kateka da Mkoma.” 20Ene a to petela dibhuku a txi di ningela ka muvhuneteli, se a txi khalahatsha. Votshe va va nga ti disinagogani va titi mu wonetela. 21Se a to khata ku va gondisa a txi khene: “Nyamsi m'bhalo wuwa wu tatisekile tinzeveni kwanu.” 22Votshe va titi mu fakazela ngu wunene, va txi xamala mapswi a kutala ngu kateko, ma nga txi huma ngu txisofuni kwakwe, va txi khona: “Ina hi nga ene mwanana wa Josefa, kani?” 23Ene a to va gela a txi khene: “Hakunene mi na womba kwangu divingwa di diku: ‘Ñanga, ti hanyise upune.’ Totshe ti hi nga ti pfa va txi khona u ti mahile Kapernawume, ti mahe nikona muwa ditikoni kwanu.” 24Ngu msana a to txhatekela mapswi a ku khene: “Kha ditshuri na mi gela ku khani: A walo mprofeti wu a amukelwako ngu txithavo ditikoni kwawe. 25Aniko kha ditshuri na mi gela kambe ti taku khani: Ka masiku a mprofeti Elija, ku ti ni tinoni to tala ditikoni ka Israyeli, mbimo yi nzuma yi nga sekwa, txipimo txa malembe mararu, ni mtxhanu wa mitxima ni wumwewo, ku txi tumbuluka paya ka dotshe ditiko. 26Kambe Elija kha rumelwa ka noni ni yayimweyo ka tona; a rumetwe ka noni ya Serepta ka Sidhoni dwe. 27Va titi ho kambe vathu va tshekela ditikoni ka Israyeli, mbimo ya mprofeti Elizewu, aniko kha basiswa ni wammweyo kwawe, hahanze ka Naamani wa Msiriya.” 28Va txi engisa mapswi awa, votshe disinagogani, va to tala ngu kuhenya. 29Se va di khukhile, va to mu humisa hahanze ka didhoropa va txi mu yisa txitimwi ka mmango wu didhoropa dawe di nga ti aketwe ka wona, kasi kuya mu susumeta a txi wa hahatshi. 30Aniko ene a to pinda ngu hagari kwakwe, a txi teka nzila yakwe e tsula. 31Se a to kwitima e ya Kapernawume, didhoropa da Galileya, se e gondisa vathu ngu masiku a Sabbata. 32Vona va ti xamala ngu kugondisa kwakwe, nguko dipswi dakwe di ti ni mtamo. 33Mthu a titi ho disinagogani, awu a nga ti ni moya wa nzambwa, wa didhimoni, e kwangula ngu dipswi da hombe, 34a txi khene: “Ha! Nji txani u ku natxo ni nathu, awe Jesu wa Nazareta? U tete kuta hi lovisa, kani? Na ku ziva ti to ngawe mani, awe u Msawuleki wa Txizimu.” 35Se Jesu a to wu dhusa, a txi: “Malala, u huma kwakwe.” Ngako didhimoni di di mu ginyalatile hagari kwawe, di to huma kwakwe di sa mu maha phango. 36Se ve xamala votshe, va txi wotisana va txi: “Ti womba txani tona tiya? Ene a ruma mimoya ngu txikomakoma ni nyala, se yi huma!” 37Konaho nduma yakwe yi pfala ka maphambo otshe a ditiko dile. 38Se a to huma disinagogani e wulela nyumbani ka Simoni. Kambe mkokati wa Simoni a ti lwala ngu txindeyandeya, se ve mu kombelela kwakwe. 39Se Jesu a to nama txitimwi kwakwe, a txi dhusa txindeyandeya txi mu leka; se ene kunukunuko a to wuka e va thumela. 40Ngako di txi swa ditambo, votshe va va nga txi lwala ngu wulwati wuhi ni wuhi, va ti tiswa kwakwe, se e sanzeka manza akwe txitimwi ka mmweyo ni mmweyo, a txi va hanyisa. 41Madhimoni ma to huma ka vo tala, me huwelela ma txi: “Awe u Mwanana wa Txizimu.” Kambe Jesu a to ma dhusa e ma tsimba kuwombawomba, nguko ma ti mu ziva tatinene ti to ngene Mesiya. 42Ngako di di txite, a to huma e ya ka wukhalo wa ekhalela, se vavangi va ti mu lava. Ngako va di mu mani, va to zama ku mu tsivela, kasiku a si khukhi kwawe. 43Aniko a txi khene kwawe: “Ni fanete kuya txhumayela ka mamwane madhoropa Evhangeli ya Mfumo wa Txizimu, ngukuva ni rumetwe toneto.” 44Se a txi gondisa masinagogani ka Judheya.

will be added

X\