LUKA 3

1Ngu dilembe da wugumi ni mtxhanu da kufuma ka Tibheriyo Khezari, na Ponsio Pilato i di mfumeli wa Judheya, Herodha i di mfumeli wa Galileya, Filipi mnanda wakwe i di mfumeli wa Itureya, ni wa ditiko da Trakonita, Lisaniya i di mfumeli wa Abhileni; 2se Anasi ni Kayifasi i di Vaphaxeli va hombe, Txizimu txi wombawombile ka Johane, mwana Zakariya, a nga ti txiwulani. 3Se ene a to tsimbila ka dotshe ditiko da Jordhani, a txi txhumayela txibhabhatiso txa kuhunduluka, kasi ku ve mana divalelo ya siwonho; 4Nga ti ti nga bhaliswa tona dibhukuni ka mapswi a Mprofeti Isaya, a nga khene: “Dipswi da wule a kwangulako txiwulani di: Lungisani nzila ya Mkoma, lulametani maphango akwe. 5Yotshe mikova yi na tatiselwa, ani yotshe mimango ni situnga si na khundumuselwa; seni tinzila ta majikwa ti na lulametwa, ani tinzila ta sikhele ti na lulama; 6Votshe vathu va na wona kuhanyisa ka Txizimu.” 7Se a to gela mabutho a vathu va nga txi ta kuta bhabhatiswa ngene, a txi khene: “Lixaka la timamba, mi layilwe ngu mani kuthava kuhenya ku ku tako kani? 8Ngako i di toneto, humisani mihando yi yi kombisako kuhunduluka; mi nga thukeni mi alakanya mi txi khanu: ‘Hi ni tate, wathu Abrahamu’; nguko ni khani kwanu: Txizimu txi nga si kota kuhindula marigwi awa me maha vanana va Abrahamu. 9Kambe nzanga yi vekilwe ha mikulutini ka mindonga; mndonga wuhi ni wuhi wu si velekiko mihando ya yinene, wu na wilwa wu rinzwa mndiloni.” 10Mabutho a vathu ma ti mu wotisa ma txi: “Se nji txani hi fanelako ku txi maha kani?” 11Ene a to va xamula a txi khene: “Awule a ku ni mabhaji mambidi, a na abane ni wule a ku singa ni dadimwedo; awule a ku ni sakudya a na mahe toneto nene.” 12Vasengisi nivona va tile kasi kuta bhabhatiswa, va ta mu gela ku khona: “Mgondisi, nji txani hi fanelako ku txi maha, kani?” 13Ene a to va xamula a txi khene: “Mi nga sengiseni simwane, hahanze ka sile mi nga sikelwa sona ngu mthetho.” 14Masotxhwa niona ma to mu wotisa ma txi kha ona: “Athu-ko, hi fanete kumaha txani, kani?” Ene a to xamula a txi khene: “Mi nga thumiseni wurena ka si i ku sa vane, mi nga mangaleleni mthu hahanze ka mnandu, kambe tumelani kuenelelwa basi ngu muholo wanu.” 15Ngaku vathu va nga ti zumbile va txi rinzela ngu kuthemba timbiluni kwawe, ti to Johane i nga va i di ene Mesiya, 16ene Johane a to va gela votshe a txi khene: “Ani ni mi bhabhatisa ngu mati, aniko a na bwaka awule a ku ni mtamo kupinda ani, awule ani ni ku singa ni fanelo ya kuthukunyula tingoti ta tikathula takwe; eyo a na ta mi bhabhatisa ngu Moya wo Sawuleka ni mndilo. 17Manzani kwakwe ana ni txiselo txa kusangaya, a na hehera fulaho ya txithatheni kwakwe, e yi sengeleta mu txisangalani kwakwe. Se a na hisa maphumbu ngu mndilo wo mbi timeka.” 18Ngu sona siya ni simwane silayelo, Johane a ti txhumayela ka vathu Evhangeli. 19Kambe, ngako mfumeli Herodha a di kawukilwe ngu Johane ngu timhaka ta Herodhiya, msikati wa Filipi, mwanawe, ni konaho ka totshe timwane to biha a nga ti maha, 20a to engetela, txitimwi ka totshe tiya, mhaka ya kusekela Johane mkorani. 21Mbimo yi vathu votshe va nga gwita kubhabhatiswa, ni mbimo yi Jesu a nga ti kukhongelani, ngu msana ka kuva a di bhabhatisilwe nene, nzuma yi to tuleka. 22Se Moya wo Sawuleka wu to txhika txitimwi kwakwe ngu txifaniso txa txituvane. Se dipswi da kuta ngu nzumani di to pfala, di txi: “Awe u Mwanana wangu wo randeka ngutu; ni vekile kwako kotshe kutsaka kwangu.” 23Jesu a ti lava kuva ni makumi mararu a malembe, mbimo yi a nga khata kugondisa; se, ngu kudinganisa ka vathu, i ti mwana Josefa; mwana Heli; 24mwana Matate, mwana Levhi, mwana Melki, mwana Janayi, mwana Josefa, 25mwana Matatiya, mwana Amosi, mwana Nahume, mwana Esli, mwana Nagayi, 26mwana Mate, mwana Matatiya, mwana Semeyi, mwana Joseke, mwana Joda, 27mwana Johana, mwana Resa, mwana Zorobhabheli, mwana Salatieli, mwana Neri, 28mwana Melki, mwana Adhi, mwana Kosana, mwana Elmadhana, mwana Heri, 29mwana Joxuwa, mwana Eliyazari, mwana Jorimu, mwana Matate, mwana Levhi, 30mwana Simiyoni, mwana Judha, mwana Josefa, mwana Jonamu, mwana Eliakimi, 31mwana Meleya, mwana Mena, mwana Matate, mwana Natani, mwana Dhavhidha, 32mwana Jese, mwana Obhedhi, mwana Bhowazi, mwana Sala, mwana Naasoni, 33mwana Aminadhabhe, mwana Admini, mwana Arni, mwana Esroni, mwana Faresi, mwana Judha, 34mwana Jakobe, mwana Isaake, mwana Abrahamu, mwana Tara, mwana Nakori, 35mwana Seruki, mwana Ragawu, mwana Falegi mwana Ebheri, mwana Sala, 36mwana Kayinana, mwana Arfaxadhe, mwana Seme, mwana Nowa, mwana Lameke, 37mwana Matusalema, mwana Henoki, mwana Jaredhe, mwana Malaleyeli, mwana Kayinana, 38mwana Enosi, mwana Seti, mwana Adhamu, mwana Txizimu.

will be added

X\