LUKA 23

1Se va to khukha votshe va txi mu heleketa ka Pilato; 2va txi khata ku mu mangalela, va txi khona: “Hi mani mthu wuwa a txi kujetela ditiko dathu, a txi tsimba kukhupa resa ka Khezari, a txi khene Ene ngene Mkoma Mesiya.” 3Pilato a to mu wotisa, a txi khene: “Ina awe u Mkoma wa Vajudha kani?” Jesu a to xamula, a txi khene: “Ngawe u wombako tona!” 4Konako Pilato a to gela vaphaxeli va hombe ni dibutho, a txi khene: “Ani kha ni mani mnandu ka mthu wuwa.” 5Aniko vona va to tamarisa va txi khona: “Ene wa kujetela vathu kuwusa vhilinganya, a txi gondisa ka dotshe ditiko da Judheya, kukhukhela Galileya, amuwa a nga khatela kona kala kuhoka hawa.” 6Ngako a di engisile tiya, Pilato a to wotisa ti to Ene mbwa Galileya kani; 7Se a di engisile ti to Ene mbwa ditiko da kufumelwa ngu Herodha, a to mu rumela kwakwe Herodha, nga ngu hawa nene a nga txi maneka Jerusalema ka ona masiku ale. 8Mbimo yi a nga wona Jesu, Herodha a to tsaka ngutu, ngukusa i ti kale, a txi vilela ku mu wona, ngu kota ya tiya a nga txi ti engisa va txi wombawomba ngu ngene, a txi rinzela ti to mwendo Ene a nga thuka a txi maha txixamaliso txo kari masoni kwakwe. 9A mu wotisete to tala, kambe ene kha angula txilo. 10Vaphaxeli va hombe ni vabhali, va nga ti ho konaho, va titi ya masoni ngu ku mu mangalela. 11Herodha ni masotxhwa akwe va to wombawomba nayo ngu ku mu eyisa ni ku mu poyilela. Se ve mu ambeka nguwo yo khetima, va txi tshumela ve mu rumela ka Pilato. 12Ka ditshiku dile, Herodha ni Pilato va to txitxa ve maha vangana, vona kale va nga txi vengelana ngu txawe. 13Se Pilato a to ramba vaphaxeli va hombe ni vathangeli ni vathu va ditiko, 14a txi khene kwawe: “Mi tisile mthu wuwa masoni kwangu, mi txi khanu Ene i mkujeteli wa vathu. Ni mu wotisile masoni kwanu, kambe kha na mana txiwonho ni txa tximwetxo ka sile mi mu mangalelako ngu sona. 15Herodha nene kha mana txilo kwakwe, nguko a mu wuyisile kambe kheno kwathu. Kota nga ti nanu mi ti wonako, Ene kha maha txilo txa kuza txi mu abanisela kufa. 16Ngu toneto, ni na mu thukunyula e tsula, msana ka ku mu tsayisa.” 17[Se ngu mbimo ya M'buso wa Pasika, Pilato a ti ni fanelo ya ku va thukunyulela mmweyo wa vale vo sungwa.] 18Aniko konaho votshe va to kwangula ngu dipswi dimwedo, va txi khona: “Daya wuwa, u txi hi thukunyulela Bharabhasi!” 19Kasi Bharabhasi wuwa a ti ko khotelwa ngu mhaka ya kuwusa dizunga didhoropani, ni kudaya mthu. 20Pilato a tshumete kambe a txi va angula ngu kulava kuthukunyula Jesu. 21Kambe vona va txi kwangula va txi khona: “Mu bethele ha txihambanoni! Mu bethele ha txihambanoni!” 22Pilato a to va angula ka wuraru, a txi khene: “Kasi njiwonho muni a nga txi maha Ene kani? Kha na mana txilo kwakwe, txi si kotako ku mu abanisela kufa. Ngu kota yeto, ni na mu thukunyula e tsula, msana ka ku mu tsayisa.” 23Aniko vona va txi tamarisa ngu mapswi a kumaha diguwa, va txi kombela ti to a na bethelwe ha txihambanoni, futsi kambe diguwa dawe di to xula. 24Ngu kota yeto, Pilato a to wila ti to ku na mahwe ati vona va nga txi kombela tona; 25A to thukunyula awule a nga ti khotetwe ngu mhaka ya kuwusa yimbi ni kudaya mthu, kota nga ti vona va nga txi vilela tona, se e va ninga Jesu, va txi ya mu maha tiya vona va nga txi lava tona. 26Mbimo yi va nga txi mu heleketa, va to kurumeta Simoni wa Kirene, a nga txi wuya ngu thembweni, va txi mu pakatisa txihambano, na a txi txi pakata ngu msana ka Jesu. 27Va txi mu londetela vathu vo tala, ni vavasikati vo kari, va nga txi peka tihuwa, va txi mu dilela. 28Jesu a to tshembereka a txi va wonetela, a txi khene: “Mahorana a Jerusalema, mi nga ni dileleni; ti dileleni anu ni vanana vanu, 29nguko ma na ta masiku awa ku no ta wombwa ti to va katekile vavasikati va i ku sifule, ni va va nga mbi veleka, ni va va nga mbi mamisa. 30Ka yoneyo mbimo, va na ta gela mimango va txi khona: ‘Welani txitimwi kwathu!’ Ka situnga va na ta khona: ‘Hi khubhunyeteni!’ 31Ngukusa, akuwa va nga maha tiya ka mndonga wo nakana, nji txani va no mbi txi maha ka wu wa kuwoma kani?” 32Se va txi teka kambe sigevenga simbidi, kasi kuya dawa kumweko nayo. 33Ngako va di hokile ka wukhalo wu wu dhanwako ku i “Txikwakwa”, va to mu bethela ha txihambanoni Ene ni sigevenga sile sa simbidi, tximwetxo ngu ditshelo da txineneni kwakwe, tximwane ngu ditshelo da txibhabha kwakwe. 34[Jesu a titi khene: “Tata, va divalele, nguko kha va ti zivi ati va ti mahako.”] Ngu msana, va to avelana tinguwo takwe, ngu kuxaxuvelana. 35Dibutho da vathu di ti zumbile kona hale, va txi wonetela, se vathangeli va kona va txi poyilela va txi khona: “A ponisile vamwane, a na ti ponise nene apune, ngako i di Mesiya Msawulwa wa Txizimu!” 36Masotxhwa niona ma txi mu xowokisela, ma txi mu tshuketela kufela ku mu ninga vhinagre. 37Va txi khona: “U di Mkoma wa Vajudha, ti hanyise upune!” 38Se ngu txitimwi kwakwe, ku ti bhatwe ti ta ku: “Awuwa i Mkoma wa Vajudha.” 39Mmweyo wa sigevenga sile a nga ti bethetwe naso, a to mu ruketela, a txi khene: “Kasi hi nga awe Mesiya, kani? Ti ponise, u txi hi ponisa nathu.” 40Aniko awule mmwane a to teka dipswi a txi mu kawuka, a txi khene: “Khu xoniphi Txizimu, hambiko nawe u manekako u di kona kuabaniswani kumweko nayo, kani? 41I di athu hi tsayiswa ngu kona; hi dihela mithumo yathu. Kasi ene kha wonha txilo.” 42Se a to txhatekela mapswi a ku khene: “Jesu, ni alakanye, mbimo yi u no wulela Mfumoni kwako.” 43Ene a mu xamute a txi khene: “Kha ditshuri na ku gela ti to:Nyamsi, u na va kumweko ni nani Paradiseni.” 44Ngu txikhati txo lava kudingana ni txa wutxhanu ni tximwetxo, txidema txi to khubhunyeta dotshe ditiko kala txikhati txa wutxhanu ni mune, 45ngu kota ya kuphumiswa ka ditambo, se nguwo ya Dithepele yi to vharuka ngu hagari; 46Se Jesu a to huwelela ngu dipswi da hombe, a txi khene: “Tata, na ningela moya wangu manzani kwako.” A di gwitile kuwomba tiya, a to fa. 47Se ngako nduna ya dizana da masotxhwa yi di woni tile ti nga maheka, yi to dhumisa Txizimu, yi txi: “Kha ditshuri mthu wuwa i ti wo lulama!” 48Ni votshe vathu vale vo tala, va nga ti tile kuta diwuka mhaka yile, ngako va di woni tile ti nga maheka, va to tshumela ve tsula mitini kwawe, na va txi ti peka tikhana. 49Votshe va va nga ti zivana nayo ni vavasikati va va nga ti mu londetela kukhukhela Galileya, va to ema ngu kule, va txi wonetela totshelele tiya. 50Ku titi ho wamwamna, a nga ti dhanwa ku i Josefa, i nga ti txihango txa Dibanza, mthu wa mnene, na a di lulamile, 51awu a nga ti sa pfana navo ka malamulelo awe ni mthumo wawe. I ti wa Arimateya, didhoropa da Vajudha, awu a nga ti rinzela Mfumo wa Txizimu. 52Ene a to tsula ka Pilato, a txi ya kombela mmidi wa Jesu. 53A to ya wu hawula, a txi wu phutela amu ka dilasori, a txi wu veka diyivani, di nga ti ketwe ha dirigwini, amuwa ku nga sa nzi kutshotshwa mthu. 54I di ditshiku da kulongisela, na se ditshiku da Sabbata di txi khata kuhuma wuronga wa kutxa. 55Senikoko, vavasikati vale va nga ti tile kumweko ni Jesu ngu Galileya va to longoloka ni Josefa ve ya wona diyiva ni kuwona kambe ati va nga vekisa tona txirumbi txa Jesu. 56Se va di wuyile, va to longela makha ni mafura o bhumula. Se ngu ditshiku da Sabbata va to humula, nga kuruma ka Mlayo.


Copyright
Learn More

will be added

X\