LUKA 21

1Ngako Jesu a txi guleta maso, a to wona vanyatithombe, va txi thela miningelo yawe amu ka txiya txa msengo wa Dithepele. 2A to wona ni wamsikati wa txisiwana, wa noni, a txi veka konamo simaleana simbidi. 3Se a txi khene: “Kha ditshuri, ni khani kwanu: Noni yiya ya txisiwana yi ningete kupala votshe. 4Nguko votshe va va nga humisa msengo wa Txizimu, va tekile kutalelwani kwawe; kambe awuwa, atxi a nga txi ningela, a txi tekile wusiwanani kwakwe, i di sotshe si a nga ti khene a na hanya ngu sona.” 5Ngako vamwane vo kari va nga txi wombawomba ngu Dithepele, ti to di tshurisetwe ngu marigwi o tshura ni miningelo ya sithembiso, Jesu a to angula a txi khene: 6“Ma ta masiku, ayawa, ka sotshe si mi si wonako, ku no mbi sala dirigwi txitimwi ka dirigwi: Sotshe si na khundumuselwa.” 7Vona va to mu wotisa va txi khona: “Mgondisi, ti na maheka ditshiku muni toneto kani? Njikombiso muni txi no woneka, kasi kuzivisa ti to eto ti lava kuhumelela kani?” 8Ene a xamute a txi khene: “Ti woneleni, mi si tumeli kukanganyiswa, nguko vavangi va na ta ngu ditina dangu, va txi khona: ‘Ani ngani’, mwendo kambe ku khona: ‘Mbimo se yi hafuhi!’ Mi nga va londeteleni. 9Mbimo yi mi engisako va txi womba ngu tiyimbi ni mazunga, mi nga telweni ngu dizowa: Ti fanete kuthanga toneto ti txi humelela, kambe magwito a totshe kha ma na mbi woneka kunukunuko.” 10Ngu msana a va gete ku khene: Lixaka li na wukela limwane lixaka, mfumo wu na wukela wumwane mfumo. 11Ku na humelela kuzinginikela ka hombe ka mafu, se ka makhalo a mangi ku na va ni tinzala ni mitungu. Ku na humelela sidiwukiso so thisa, ni sikombiso sa hombe nzumani. 12Aniko ti si nzi kumaheka totshe tiya, va na mi ñola, va txi mi xanisa, va txi mi ningela masinagogani, va txi mi sekela mikorani; va na mi yisa ka vakoma ni vafumeli ngu ndava ya ditina dangu; 13Seni eto ti na mi ninga mbimo ya kufakaza wukholwa wanu. 14Ti bhaleni timbiluni kwanu ti to mi nga karatekeni ngu tile mi fanelako ku ti vhikelisa tona, 15nguko ani nipune ni na mi ninga mapswi a wuzivi, ayawa valala vanu va no mbi si kota ku ma xula, hambi ku ma kambula. 16Mi na ningelwa hambi ngu vatate vanu, ngu vananu ni maxaka anu, ni vandoni vanu; va na daya vamwane kwanu. 17Mi na vengelwa ngu votshe ngu ndava ya ditina dangu. 18Aniko kha ku na mbi lova hambi msisi wumwewo wa ha msungoni kwanu. 19Ngu kutimisela kwanu, mi na hanyisa mimoya yanu. 20Ngako mi txi wona Jerusalema a txi ranganyetwa ngu sikwata sa tiyimbi, zivani ti to kuvhandamuswa kwakwe ku hafuhi. 21Ka donedo ditshiku, ava va ku Judheya, va na thavele mitungani; ava va ku didhoropani, va na hume. Se ava va ku tithembweni, va nga thuke ve wulela didhoropani; 22nguko masikuyo masiku a kupharela, kasiku totshe ti ti nga bhalwa ti hetiseka. 23Va na va ni dikhombo va sirumbu ni va kumamisa ka oneyo masiku, ngukuva ku na va ni tixanisa ta hombe ha mafuni, ni kuhenyelwa ku na wela ditiko diya. 24Va na wa ngu kudawa ngu ditxhari, va na payulwa ve yiswa ka otshe matiko; se Jerusalema a na kandetelwa ngu vamatiko, kala kuza mbimo ya vamatiko yi va yi di tatisekile. 25“Ku na va ku di ni sikombekiso ha ditamboni, ha mtximani ni tinyeletini. Ha mafuni ku na va ho kuxaniseka ka matiko ngu kuthava diguwa da kudhuma ka mavimbi ni linene. 26Vathu va na tsivala ngu kuthava makhombo yawa ma no humelela ha ditikoni kotshe: Nguko mitamo ya nzumani yi na dekadekiswa. 27Konako se va na wona Mwanana wa Mthu a txi txhika a di marefuni, ni mtamo ni wudhumo wa hombe. 28Mbimo yi ti no khata kuhumelela tiya, gulani maso mi txi wona txitimwi, ngukusa ku hafuhi kuhanyiswa kwanu.” 29Se a to womba txifananiso txiya: “Wonani mxanvu ni yimwane mindonga. 30Mbimo yi yi khatako kuthunga linyenvu, ma ti ziva ti to ma hokile malanga. 31Ngu toneto, mbimo yi mi no wona kuhumelela tiya, ti ziveni ti taku wu hokile Mfumo wa Txizimu. 32Kha ditshuri na mi gela ku khani: kha li na mbi pinda aliya liveleko, na ti sa humelela tiya. 33Nzuma ni mafu si na pinda, aniko mapswi angu kha ma na mbi pinda. 34“Kambe ti woneleni, kasiku timbilu tanu ti si thuki ti nemelwa ngu ku ambi ti pimela ni wudevi ni kuvilela ngu sa wutomi wuwa, ti to ditshikudo di si mi ñoli ngu txidhukisa, 35nga mlawu, ngukuva di na wela votshe va va nga aka ha mafuni kotshe. 36Khutalani na mi txi khongela txotshe txikhati, kasiku mi va ni mtamo wa kuhuluka ka totshe ti ti no humelela, ni kuema mi di tsani masoni ka Mwanana wa Mthu.” 37Ni mtshikari, Jesu a ti zumba a txi gondisa Dithepeleni, kambe ni wusiku a ti huma e ya zumba mtungani, awu wu dhanwako ku mbwa Olivheti. 38Se votshe vathu va ti vindukela ve ta kwakwe, Dithepeleni, kasi kuta mu engisa.


Copyright
Learn More

will be added

X\