LUKA 20

1Ngu ditshiku do kari, kutingako a txi gondisa vathu Dithepeleni ni kutxhumayela vathu Evhangeli, vaphaxeli va hombe ni vabhali va to ti wonekisa kwakwe kumweko ni madhota a ditiko, 2va txi khona: “Hinga hi gela mtamo wu u mahako tiya ngu wona, ni ti to awu a nga ku ninga mtamo wuwa i mani?” 3Ene a to va xamula a txi khene: “Anani ni na mi wotisa mhaka: Ni geleni: 4Kubhabhatisa ka Johane ku ti huma nzumani mwendo ku ti huma ka vathu kani?” 5Aniko vona va to kanetisana va txi khona: “Ngako hi txi khathu ku huma nzumani, a na khene: Mi lambile kukholwa ngu txani? 6Se ngako hi txi khathu: Ku humile ka vathu, ditiko dotshe di na hi balisela ngu marigwi, nguko votshe va kholwa ngutu ti to Johane i ti mprofeti.” 7Se va to xamula, va txi: “Kha hi ti zivi ti to ku ti huma ngu hani.” 8Konaho Jesu a to khene kwawe: “Nanani kha ni na mbi mi gela ti to ni maha tiya ngu mtamo muni.” 9Se a to khata kugela vathu txidinganiso txiya: “Mthu wo kari a phayile thembwe ya mivhinya, se e yi siyela manzani ka vadimi, se e teka dipfhumba da kuendela matikoni ka kule, mbimo yo lapha. 10Ngako yi di hokile nyango, a to ruma txithumi ka vadimi ti to ve txi ninga mihando yo kari ya vhinya. Aniko vadimi va to mu peka, ve mu tshumeta a singa ni txilo. 11Ene a to engeta e ruma tximwane txithumi; nitxona va to txi peka ve txi wisa tingana, se ve txi tshumeta txi singa ni txilo. 12Ene a to engeta e ruma txa wuraru. Neneyo va to mu vandula, ve mu tovela. 13Se nyamne wa thembwe a txi khene: ‘Ni na maha txani? Ni na ruma mwanana wangu, awu ni mu randako, mwendo, ngako va txi mu wona, va na mu thava.’ 14Aniko vona, ngako va txi mu wona, va to gelana, va txi khona: ‘M'dyi wa thomba ndiyo, he mu dayeni, kasiku thomba yakwe yi va yathu.’ 15Se va to mu humisa hahanze ka thembwe, ve mu daya. Nyamne wa thembwe a na maha txani kani? 16A na ta, a ta dayela vadimi vale e ningela thembwe ya mivhinya ka vamwane.” Ngako vona va txi pfa tiya, va to khona: “Ti nga thuke ti maheka timhaketo.” 17Se a txi va wonisisa, a ti khene kwawe: “Ti womba txani ati ti nga bhalwa va txi: ‘Dirigwi di vaaki va nga di nyenya, ngu dona di nga mahwa dirigwi da hombe da kutsanisa?’ 18Wuhi ni wuhi a no wela ka dirigwido, a na phwatika, aniko awu di no wa txitimwi kwakwe, di na mu phwarasa.” 19Se vaphaxeli va hombe ni vabhali va txi lava ku mu ñola ka txonetxo txikhati, aniko ve thava mtalo wa vathu, nguko va ti pfite ti to a ti mahela vona txidinganiso txiya. 20Se va to mu baramela, ve rumela sinyengwane, si nga txi ti maha vathu vo lulama, kasiku mu khakheta ka mapswi akwe, ti to va na mu ningela ka mtamo ni wukomani ka mfumeli. 21Se va to mu wotisa, va txi khona: “Mgondisi, ha ti ziva ti to u wombawomba ni kugondisa ngu kululama, futsi kambe khu woni khohe ya mthu, aniko u gondisa nzila ya Txizimu ngu ditshuri. 22Se ke, ina hina ni fanelo yo hakhela mkhupo ka Khezari mwendo hi nga tona kani?” Ngako ene a txi wona mano awe, a ti khene kwawe: 23“Ni kombeni didhenari. Di ni txifaniso ni m'bhalo wa mani kani?” 24Vona va to xamula va txi khona: “Nza Khezari.” 25Ene a nje khene kwawe: “Tshumetelani ka Khezari asi i ku sa Khezari, ni ka Txizimu asi i ku sa Txizimu.” 26Se va to tandeka ku mu bzweta ngu mapswi akwe masoni ka vathu, se ve xamala kuxamula kwakwe, va so kaye. 27Se va to tshuketela Jesu Vasadhusi vo kari, ava va kanetako kuwuka ka vafi, va ta mu wotisa va txi khona: 28“Mgondisi, Mosi a hi bhalete ku khene: ‘Ngako a txi fa mthu wo kari, wamwamna, a txi siya msikati wakwe a singa ni mwanana, mwanawe a na mu sambele thaka wu wa noni, kasi kuwusela liveleko mwanawe.’ 29Se va titi ho mtxhanu wa vavamna ni vambidi, va txikoma ni txinanda. Wo khata a tekile msikati, se a txi fa, a singa ni mwanana. 30Wa wumbidi, 31msana kwakwe nene wa wuraru, va mu sambete thaka wu wamsikati. Votshe va mtxhanu ni vambidi va fite va sa siya mwanana. 32Ngu kugwitisa, a to fa nene wule wamsikati. 33Senikoko, kuwukani ka vafi, awule wamsikati a na va i di msikati wa mani, eko ka votshe a nga va msikati wawe, kani?” 34Jesu a va xamute a txi khene: “Vathu va ha mafuni hawa, va teka ni kutekwa, 35aniko ava va no maneka va di ni fanelo ya txiavelo ka dimwane ditiko ni txa kuwuka ka vafi, evo kha va teki, futsi kambe kha va tekwi. 36Kha va na mbi ngadi ve fa, nguko vona va fana ni tingelozi. Vona mbanana va Txizimu, nguko mbanana va kuwuka ngu kufani. 37Seni kambe, mhaka ya kuwuka ka vafi yi wombilwe ngu Mosi, mbimo yi a nga womba ngu ta txipopo txo tura, a txi khene: ‘Mkoma i Txizimu txa Abrahamu, Txizimu txa Isaake ni Txizimu txa Jakobe.’ 38Ngu toneto, Txizimu hi nga Txizimu txa vafi, aniko nja va vo hanya, nguko ka txona votshe va hanya.” 39Se vabhali vo kari va to xamula va txi khona: “Mgondisi, u xamute ta tinene.” 40Se kha va tsana ku mu wotisa yimwane mhaka. 41Se ene a txi khene kwawe: “Ngu ku txani vathu va wombako ku Mesiya i Mwana Dhavhidha, kani? 42Nguko Dhavhidha apune a wombile ka Dibhuku da Masalmo, a txi khene: ‘Mkoma a ti khene ka Mkoma wangu: Zumba ngu txineneni kwangu, 43kala kuza ni maha valala vako txikhigetelo txa mikondo yako.’ 44Se ngako Dhavhidha a txi mu dhana ku i Mkoma, a nga va ene i di Mwanakwe ngu txani kani?” 45Ene a to womba, na va txi ti engisa votshe vathu, a txi khene ka vagondiswa vakwe: 46“Ti woneleni ka vabhali, ava va randako kutsimbila va di ambate tinguwo to lapha, ni kuloswa mitendelani, ni sikhalo sa masoni masinagogani, ni sikhalo so thanga mibusoni. 47Va moxa tinyumba ta tinoni, va txi ti guleta ngu kumaha mikombelo yo lapha. Vonavo va na ta lamulwa ngu kulamulwa ku ku pindisako.”

will be added

X\