LUKA 19

1Jesu a to wulela didhoropani ka Jeriko, se a txi di tshawunyeta. 2Konaho, mmweyo wa mwamna, a nga txi dhanwa ku i Zakewu, mthangeli wa vakhupisi, awu kambe i nga ti nyatithombe, 3a to humelela a txi lava kuwona Jesu, kasi ku mu ziva ti to i mthu wo txani. Aniko a si si koti ku mu wona, ngu mhaka ya kutsivelwa ngu vathu, ngukusa ene i ti wo koma. 4Se a to tutuma e ya masoni kwawe, a txi ya kwela ka mndonga wu wu dhanwako ti to i sikomora, kasiku a txi si kota ku mu wona, nguko Jesu a titi fanela kupinda ngu kona hale. 5Mbimo yi Jesu a nga hoka ka wukhalo wule, a to gula maso a txi mu wona, se a txi khene kwakwe: “Zakewu, kuluveta u txhika, nguko nyamsi ni fanela kuya zumba mtini kwako.” 6Se ene a to txhika ngu txikuluveta, a txi mu amukela ngu kutsaka. 7Mbimo yi va nga wona tiya, votshe va to khata kungurangura, va txi khona: “A endela nyumbani ka muwonhi.” 8Zakewu ene, a di emile, a ti khene ka Mkoma: “Mkoma, ni lava kuninga sisiwana hafu ya yotshe thomba yangu, se ngako a di ho awu ni nga mu dyelela, ni na mu tshumetela sile ni nga mu pela, si di engetetwe ka mune.” 9Jesu a xamute a txi khene: “Nyamsi kuhanyiswa ku wulete nyumbani muwa, nguko awuwa nene i mwanana wa Abrahamu. 10Inkusa kunene Mwanana wa Mthu a tete kuta lava ni kuhanyisa ava va nga ti mwalate.” 11Kutingako vona va txi engisa timhaketo, Jesu a to engeta e va gela txidinganiso, nguko a ti hafuhi ni Jerusalema, se vona va ti pimisa ti to Mfumo wa Txizimu wu na kuluveta kuhumelela. 12A txi khene: “Mthu wa nganakana a to endela ditikoni ka kule, kuya fumiswa wukoma, e tshumela e wuya. 13Kutingako a di dhani sithumi sakwe sa digumi, a to si ninga digumi da tipondo, a txi khene kwawe: ‘Ti bhinduliseni kala kuza ni wuya.’ 14Aniko vathu va ditiko dakwe va ti mu vengela, ve ruma mitumi msana kwakwe, kuya womba ti to: ‘Kha hi ti lavi kufumwa ngu mthu wuwa.’ 15“Ngako a di wile ngu kuya fumiswa wukoma, a to rumela kudhanwa sithumi sakwe, asi a nga ti si ningile male, kasi kuziva ti to nji txani mmwane ni mmwane a nga bhindula ngu yona. 16A to ta wo thanga, a txi khene: ‘Mkoma, pondo yako yi bhindute digumi da tipondo.’ 17Se ene a txi khene kwakwe: ‘Ngu tona, txithumi txa txinene, akuwa u nga thembeka ngu txilo txa txidotho, u na fuma digumi da madhoropa.’ 18Wa wumbidi a tile a txi ta khene: ‘Mkoma, pondo yako yi bhindute mtxhanu wa tipondo.’ 19Se ene a txi khene kwakwe: ‘Nawe fuma mtxhanu wa madhoropa.’ 20Mmwane a tile a txi ta khene: ‘Mkoma, pondo yako i ngadi yona yiya, ni nga yi sungelela mu ka difadhuko; 21Inkusa ni thavile, nguko u ku mthu wo karata: U teka txi u nga mba txi veka, u elula txi u nga mba txi phaya.’ 22Aniko ene a ti khene kwakwe: ‘Txithumi txo biha, ni ku abanisa ngu kuwomba kwako. U ti zivile ti to ni mthu wa tshofu, ni teka txi ni nga mbi txi veka, ni elula txi ni nga mbi txi phaya. 23Idito, njani u nga mba veka male yangu kubhindulisani kani? Kuwuyani kwangu ni ndina ta yi teka kumweko ni yi yi nga bhindulwa.’ 24Se a txi khene ka va va nga ti koneho: ‘Mu tekeleni pondoyo, mi yi ningela ka wu a ku ni digumi da tipondo.’ 25Se vona va txi khona kwakwe: ‘Ene ana ni digumi da tipondo.’ 26Jesu a txi khene: ‘Na mi gela ti taku wuhi ni wuhi a ku naso, a na ningwa simwane, aniko awu a ku singa naso, a na tekelwa hambi sona si a ku naso. 27Se valala vangu, ava va nga mbi ti lava ku ni va fuma, va tiseni hawa, mi va daya masoni kwangu.’ ” 28Ngako a di wombile timhaka tiya Jesu a to thangela masoni ka vagondiswa vakwe, ve ya Jerusalema. 29Mbimo yi va nga txi lava kuhoka Bhetfage ni Bhetaniya, hafuhi ka mmango wa Olivheti, Jesu a to rumela vambidi ka vagondiswa vakwe, a txi va gela ku khene: 30“Tsulani ka m'ti wule wu ku masoni: Mbimo yi mi no wulela, mi na ya mana tximbongolana txi di sungilwe, atxi txi si nziko kugadhwa ngu mthu. Txi thukunyuleni mi wuya natxo hawa. 31Ngako mthu wo kari a txi mi wotisa ti to: ‘Mi txi thukunyulela txani?’, mi na khanu: ‘Mkoma, ngene a txi lavako.’ ” 32Avale va nga rumwa va to tsula ve ya mana kota nga ti ene a nga va gelisa tona. 33Mbimo yi va nga txi thukunyula tximbongolana, vanyamne va to wotisa ku khona: “Mi thukunyulela txani tximbongolanetxo kani?” 34Vona va to angula va txi khona: “Mkoma ngene a txi lavako.” 35Se ve txi teka ve tsula natxo ka Jesu. Va to kapeka tinguwo tawe txitimwi ka tximbongolana, se ve gadhisa Jesu. 36Mbimo yi Jesu a nga txi ya masoni, vathu va to atetela tinguwo tawe ha nzila. 37Se ngako a txi relela kuya dithekani ka mmango wa Olivheti, otshe mabutho a vagondiswa, ma titi dhumisa Txizimu ngu kutsaka, ngu dipswi do pfala, ngu kota ya sixamaliso si va nga si wona. Va txi khona: 38“A na dhumiswe Mfumeli wu a tako, ngu ditina da Mkoma. Kudikha ku na tale nzumani, ni kupfaliswa ka Nyatxitimwi!” 39Vafarisi, va nga ti hagari ka dibutho, va to gela Jesu va txi khona: “Mgondisi, hinga kawuka vagondiswa vako.” 40Kambe Jesu a va angute a txi khene: “Na mi gela ku khani: Ngako vona va txi malala, marigwi ma na kwangula,” 41Ngako a di hafuhi, a to wona didhoropa e di dilela, a txi khene: 42“Yowe! Idiku nanawe u ti zivile nyamsi timhaka ti ti ku tiselako kudikha! Kambe konkuwa ti sisalekile masoni kwako. 43Ngukuva ku na ta masiku txitimwi kwako, ayawa valala vako va no ta ku bhiyela ngu ona, ve ku ranganyeta, ve ku tsivela ngu otshe matshelo. 44Va na ku dikha hahatshi, awe ni vanana vako, va ku kwako. Kambe kha va na mbi siya kwako dirigwi txitimwi ka dirigwi, ngukusa khwa ziva mbimo yi u nga endelwa ngu yona.” 45Ngako a di wulete Dithepeleni, a to khata kutovela hahanze votshe va va nga ti xavisela kona, a txi khene kwawe: 46“Ku bhatwe ti to: ‘Nyumba yangu yi na va i di nyumba ya mikombelo; kasi anu mi yi maha mkele wa timbafa.’ ” Se a titi gondisa Dithepeleni otshe masiku. 47Kambe vaphaxeli va hombe ni vabhali ni madhota a ditiko, va ti lava ku mu daya. 48Aniko ve tandeka kumana nzila yo ti maha eto, nguko votshe vathu va ti namarete ka mapswi akwe, va txi mu engisa.

will be added

X\