LUKA 18

1Jesu a engetile a txi mahela vagondiswa vakwe txifananiso, kasi kuwomba ti to ka laveka kukhongela yotshe mbimo, va si rereki: 2“Didhoropani ko kari, a titi ho mlamuli, awu a nga ti singa ni txithavo ka Txizimu, futsi kambe a ti singa ni txithavo ni mthu. 3Ka dona didhoropedo ku ti ni mmweyo wa noni, a nga txi wuyelela kuta kwakwe, a ta khene: ‘Hinga ni lamulela mhaka yi ni ku nayo ni mlala wangu.’ 4Ngu mbimo ya yingi, ene a lambile ku mu engisa. Msana keto a to pimisa ene apune, a txi khene: ‘Hambiko ni si thaviko Txizimu, futsi kambe ni si xoniphiko vathu, 5ngako noni yiya yi tako yi txi ni kulumela, ni na yi lulamisela mhaka, kasiku yi si tshumeli yi ta, yi ta ni xupha.’ ” 6Mkoma a engetile a txi khene: “Engisani mapswi awa ma wombwako ngu mlamuli wu wo mbi lulama! 7Ina Txizimu txi nga tandeka kulamulela vasawuleki va txona, ni kutimisela ngu vona ava va dilako masoni ka txona, wusiku ni mtshikari, kani? 8Na mi gela ti to Txizimu txi na kuluveta ku va lamulela. Kambe mbimo yi a no wuya Mwanana wa Mthu, ina a na ta mana likholo ha mafuni, kani?” 9Jesu a to maha kambe txidinganiso txiya ka vale va nga txi ti themba nga vathu vo lulama, na va txi kanyisa vakwawe: 10“Vathu vambidi va to kwela va txi ya Dithepeleni kuya khongela; mmweyo wawe i ti mfarisi, mmwane i ti mkhupisi. 11Mfarisi a di emile, a txi khongelisa tiya khanani kwakwe: ‘Txizimu, na ku bonga, ngukuva kha ni fanani ni vamwane vathu, i ku makhamba, sidambu, ni vamahi va wugango; futsi hambi mkhupisi wuwa kha ni fanani nayo. 12Na ti tona sakudya kambidi ngu divhiki, na humisa sa wugumi ka sotshe si ni ku naso.’ 13Aniko mkhupisi, a di emile ngu kule, a ti si tsani ni kugula maso e wona nzumani, aniko a txi ti peka khana a txi khene: ‘Txizimu txangu, telwa ngu wumbilu ni nani, ni ku muwonhi.’ 14“Na mi gela ku khani awuwa ngene a nga tshumela e tsula mtini kwakwe, a di basisilwe, ani wule mmwane mahala, nguko awuwa a ti guletako, a na vekwa hahatshi, ani wu a ti vekako hahatshi, a na guletwa.” 15Se va to mu tisela vanana va vadotho kasiku e va gwesa; kambe vagondiswa vakwe, ngako va txi ti wona, va to va tsimbisa. 16Aniko Jesu a to va dhana a txi khene: “Lekani vanana va txi ta kwangu, mi nga va tsiveleni, nguko Mfumo wa nzumani wu lumba vo nga vonavo. 17Kha ditshuri ni khani kwanu: Awu a si amukeliko Mfumo wa Txizimu nga mwanana, kha na mbi wulela ka wona.” 18Mfumeli wo kari a to mu wotisa a txi khene: “Mgondisi wa mnene, nji txani ni fanelako ku txi maha, kasi kumana thomba ya wutomi wo mbi guma kani?” 19Se Jesu a txi khene kwakwe: “U ni wombela txani ku ni wamnene? Kha ku nga ni wamnene, hahanze ka mmweyo dwe, i ku Txizimu. 20Wa yi ziva milayo yi yi ku: ‘U nga thuke u txi geleza, u nga daye, u nga pe, u nga henyele mthu, thava tate wako ni mame wako.’ ” 21Ene a ti khene: “Eto totshe ni ti xayisile kukhukhela ha wananani kwangu.” 22Kutingako Jesu a txi pfa toneto, a to khene kwakwe: “Njilo tximwetxo txi pwatekako kwako. Xavisa sotshe si u ku naso, u txi avela sisiwana, ngu kona u no va ni txuma nzumani; senikoko, ngono u txi ni londisa.” 23Aniko, ene, ngako a txi pfa timhaka tiya a to telwa ngu dikhodho ngutu, ngukuva i ti nyatithombe. 24Kutingako Jesu a di woni ti to ana ni dikhodho ngutu, a ti khene: “Ta karata ka va va ku ni tithomba kuwulela Mfumoni ka Txizimu. 25Ti nga hehuka kuwulela dikamelu ka ditshoko da txhingane, kupinda kuwulela nyatithombe Mfumoni ka Txizimu.” 26Ava va nga ti engisa va to khona: “Ngako i di toneto, ku nga huluka mani, kani?” 27Se ene a txi khene: “Ati ti xulako vathu, kha ti xuli Txizimu.” 28Se Pedro a nje khene: “Hinga wona, hi lekile sotshe, hi txi ku londisa.” 29Se ene a txi khene kwawe: “Kha ditshuri na mi gela ku khani: Kha ku nga ni mthu wu a nga leka nyumba yakwe, ni msikati, hambi vanawe mwendo vaveleki vakwe, mwendo vanana vakwe, ngu mhaka ya Mfumo wa Txizimu, 30a no mbi amukela so pinda siya ka mbimo ya konakuwa, se ka mbimo yi yi tako, a na ningwa wutomi wo mbi guma.” 31Ene a to dhana ngu phuho va Digumi ni Vambidi, a txi va gela ku khene: “Wonani, ha kwela hi ya Jerusalema, se totshe ti ti nga bhalwa ngu Vaprofeti, madingano ni Mwanana wa Mthu, ti na hetiseka. 32Ngukuva a na ningelwa ka vamatiko, vona va na mu tseketsela, ve mu ruketela, ve mu thurela lure. 33Se, msana ka ku mu kwapela ngu sisepu, va na mu daya; kambe a na wuka ngu ditshiku da wuraru.” 34Aniko vona ku walo ni txilo va nga txi pfisisa ka timhaka tiya: Dipswi diya di ti sisate kwawe, se kha va ti manisisa ati ti nga txi wombwa. 35Kutingako Jesu a txi tshuketela Jeriko, ku titi ho mthu wa dibhofu, a nga ti khalahatshile hafuhi ni nzila e kombela. 36Se ngako a txi pfa dibutho di txi pinda, a to wotisa a txi khene: “Nji txani?” 37Ve mu gela ku khona: “I Jesu wa Nazareta a pindako.” 38Se ene a to kwangula, a txi khene: “Jesu Mwanana wa Dhavhidha, ni pfele wusiwana.” 39Se ava va nga ti thangete masoni va to mu kawuka, va txi a na malale; kambe ene a to engeta e kwangula ngu mtamo a txi khene “Mwanana wa Dhavhidha, ni pfele wusiwana!” 40Se Jesu a to ema, a txi khene va na mu tise kwakwe. Kutingako a di hafuhi, a to mu wotisa a txi khene: 41“U randa ku ni txi ku mahela txani kani?” Ene a xamula a txi khene: “Mkoma, ni na tshumele ni wona!” 42Jesu a txi khene kwakwe: “Tshumela u wona! Likholo lako li ku hanyisile.” 43Se ene kunukunuko a to wona, e mu londisa, na a txi dhumisa Txizimu. Votshe vathu va va nga ti wona, nivona va to pfalisa Txizimu.


Copyright
Learn More

will be added

X\