LUKA 17

1Jesu a ti khene ka vagondiswa vakwe: “Kha ti koteki kupwateka sikhuvekiso, aniko ana ni dikhombo awule sikhuvekiso si humelelako ngu ngene. 2Ti nga va tinene, ngako a txi sungelelwa dirigwi da kukhurunga thamoni a txi vinzwa lineneni, kupinda kuva e khuvekisa mmweyo ka vale va vadotho. 3Ti woneleni-ko! Ngako mwananu a di ku wonhete, mu kawuke; ngako a txi ti laya, mu divalele. 4Ngako a di ku wonhete ka mtxhanu ni kambidi ngu ditshiku, se e tshumelela kwako ka mtxhanu ni kambidi ngu ditshiku, a txi khene: ‘Na ti sola’, mu divalele.” 5Vapostoli va wombile ka Mkoma va txi khona: “Hi engetele likholo!” 6Mkoma a xamute a txi khene: “Idiku mo va ni likholo lo fana ni nyingi ya sinapi, mi ndina gela mmora wuwa mi txi khanu: ‘Ti dule u txi ya ti phaya upune lineneni.’ Se wona wu ndina mi engisa. 7“I mani kwanu, awu a ku ni txithumi txa kudima mwendo txa kudyisa tihomu, awu mbimo yi txona txi wuyako ngu thembweni, a txi gelako ku khene: ‘Ngono kheno ngu kukuluveta, u ta khalahatsha ha mezani ka sakudya?’ 8Ina kha thangi ngu ku txi gela ku khene: ‘Ni lulamisele so lalela ngu sona, ambala txipani txa mthumo, u ta ni thumela mbimo yi ani ni dyako ni sela; ngu msana u na dya u txi sela nawe ngu txikhati txako?’ 9Ina a na txi bongela ngu kuva txi di mahile ati a nga txi ruma kani? 10Ngu toneto nanu, msana ka kuva mi di hetile kumaha totshe tifanelo tanu, wombani ku khanu: ‘Hi sithumi so mbi vhuna txilo, hi mahile tiya hi nga ti ni fanelo ya ku ti maha dwe.’ ” 11Ngako Jesu a txi ya Jerusalema a to pinda ngu hagari ka Samariya ni Galileya. 12Se ngako a txi wulela didhoropani ko kari, a to manana ni digumi da vathu vo lwala ngu tshekela, ava va nga ema ngu kule, 13se ve gula mapswi, va txi khona: “Jesu Mgondisi, hi pfete wusiwana!” 14Ngako a di va woni, a to khene kwawe: “Tsulani mi txi ya ti kombisa ka vaphaxeli.” Se ngako vona va txi tsula, va to maneka va di basisilwe ha nzila. 15Se mmweyo wawe, mbimo yi a nga wona ti to a kalamukile, a to tshumelela msana, na a txi dhumisa Txizimu ngu dipswi do guleka. 16A ti ya khizama minengeni ka Jesu, a txi mu bonga. Aniko ene i ti muSamariya. 17Se Jesu a nje khene: “Kasi hi nga digumi da vathu va nga hanyiswa kani? Va hani va va mtxhanu ni mune? 18Kha maneka ni wammweyo a nga tshumela a ta bonga ka Txizimu, hahanze ka wu wamatiko.” 19Se a to khene kwakwe: “Khukha u txi tsula, likholo lako li ku hanyisile.” 20A wotisilwe ngu Vafarisi ti to Mfumo wa Txizimu wu na ta ditshiku muni, se ene a to va xamula a txi khene: “Mfumo wa Txizimu kha wu woneki kuta ka wona. 21Kha wu na mbi wombwa ta ku: ‘Wonani, ndiwo hawa!’, mwendo ku: ‘Wonani, ndiwole haleya’; nguko Mfumo wa Txizimu wu hagari kwanu.” 22Se a txi khene ka vagondiswa vakwe: “Yi na ta mbimo yi mi no lava kuwona hambi dimwedo ka masiku a Mwanana wa Mthu, aniko kha mi na mbi di wona. 23Va na khona kwanu: ‘Wonani, ndiyo hawa’ mwendo ku: ‘Wonani, ndiyole haleya’; aniko mi nga tsuleni, mi nga va londeteni. 24Nguko, kufana ni kukeluka ka nzuma ku kelukako kukhukhela ka phuho yimweyo ya nzuma kala ka yimwane phuho, nene Mwanana wa Mthu a na mahisa toneto ngu ditshiku dakwe. 25Kambe kukhata a fanete kuxaniswa ngutu e zondwa ngu va liveleko liya. 26“Nga ti ti nga humelela ka mbimo ya Nowa, ti na va toneto ka mbimo ya Mwanana wa Mthu. 27Va titi dya, ve sela, ve teka ni kutekwa, ku txi za ku hoka ditshiku di Nowa a nga wulela ngalavani, se ndambi yi txi hoka, yi va daya votshelele. 28To nga toneto ti mahekile ka masiku a Loti: Va txi dya, ve sela, ve xava ve xavisa, ve dima ve phaya, ve aka tinyumba. 29Aniko ditshiku di Loti a nga huma ngu dona Sodhoma, mndilo ni txivavula si to wiswa ngu nzuma, si va daya votshe. 30Ti na va nga toneto, ditshiku di Mwanana wa Mthu a no humelela ngu dona. 31“Ka donedo ditshiku, awu a ku txitimwi ka nyumba, na thundu yakwe yi di nyumbani, a nga thuke e txhika, e ya yi teka; ni wu a ku thembweni, a nga tshumelele msana nene. 32Khumbulani msikati wa Loti. 33Wuhi ni wuhi a no randa kuxayisa wutomi wakwe, a na mwalalelwa ngu wona. Aniko wuhi ni wuhi a mwalalelwako ngu wutomi wakwe, a na wu xayisa. 34Na mi gela ni khani: Ka vavasikati vambidi va otelako ha ditahoni kumweko, ku na tekwa mmweyo, e lekwa mmwane. 35Ka vavasikati vambidi va khurulako kumweko, ku na tekwa mmweyo, e lekwa mmwane. 36[Ka vavambidi va ku thembweni, ku na tekwa mmweyo, e lekwa mmwane.”] 37Se va to mu wotisa va txi khona: “Mkoma ti na mahekela hani, kani?” A txi khene kwawe: “Ahawa txirumbi txi ku kona, ngu konaho sinyana sa makoti si no sengeletana kona.”

will be added

X\