LUKA 15

1Votshe vakhupisi ni vawonhi va ti tshuketela hafuhi ka Jesu, kasi kuta mu engisa. 2Aniko Vafarisi ni Vabhali va titi ngurangura va txi khona: “Mamowa wa amukela vawomhi, a txi dya navo.” 3Konaho ene a to va mahela txidinganiso txiya: 4“I mani hagari kwanu, awu a ku ni dizana da tinvuta, se a txi mwalalelwa ngu yimweyo, a si siyiko ti timwane ta mtxhanu wa makumi ni mune wa makumi ni mtxhanu wa tinvuta ni mune txiwulani, a txi londeta ayi yi nga mwalala, kala kuza a txi yi mana, kani? 5Se ngako a di yi mani, ngu litsako wa yi pakata, 6senikoko, mbimo yi a nga wuya mtini wa ramba vangana vakwe ni vaakelani, a txi khene: ‘Tsakani kumweko ni nani nguko ni mani nvuta yangu, yi nga ti mwalate.’ 7Na mi gela ku khani, kufana ni toneto, nzumani ku na va ni litsako la hombe ngutu ngu mhaka ya muwonhi mmweyo a nga hunduluka, kupinda litsako la kutsakela mtxhanu wa makumi ni mune wa makumi ni mtxhanu ni mune wa vathu va kululama, va si faneliko ku hunduluka. 8“Mwendo ngu wuhi wamsikati a ku, a di ni digumi da matxheleni a txi mwalalelwa ngu dimwedo, a si lumekiko dilambu, a txi hiyela nyumba, a txi rumarumela kala kuza e di mana kani? 9Se ngako a txi di mana, wa ramba vangana ni vaakelani va vasikati kulowe, a txi va gela ku khene: ‘Tsakani kumweko ni nani, nguko ni mani ditxheleni di di nga ti mwalate!’ 10Ani na mi gela ku khani, kufana ni toneto, kuna ni litsako la hombe masoni ka tingelozi ta Txizimu, ngu txiwonhi tximwetxo txi hundulukako.” 11Jesu a va gete ku khene: “Mthu wo kari a ti ni vanana vambidi va sizambiana. 12Mnanda wa kona a tile ka tate wakwe a ta khene: ‘Tata, ni ninge txiavelo txa thomba, atxi txi ni lumbako.’ Se tate a va avete thomba votshe va vambidi. 13Msana ka masikuanyana madotho, awu wa mnanda a to pakela thundu yakwe, e khukha a txi tsula ka ditiko da kule, a txi ya hangalasela thomba yakwe, ngu kuhanyisa ku ambi ti pimela. 14Ngako a di hetile kudya sotshe, ku to humelela nzala ya hombe ditikoni mule, se ene a txi khata kupfa wusiwana. 15Ene a to tsula a txi ya kombela mthumo ka mmweyo wa vathu va ditiko dileya, awu a nga mu rumela tithembweni kwakwe, kasi kuya dyisa tikhumba. 16Ene a ti navela kukhura ngu makamba awa ma dyiwako ngu tikhumba, aniko a ti singa ho ni mmweyo a nga txi mu ha. 17“Se a di zumbile a txi ti alakanya, a to khene: ‘Nza singi sithumi sa tate wangu, si dyako, si txi sela, kuve ani na fa hawa ngu nzala. 18Ni na khukha ni tsula ka tata, ni txi ya mu gela ku khani: Tata, ni wonhete nzuma ni masoni kwako. 19Kha ni swi ni di ni fanelo yo dhanwa ku ni mwanana wako. Ni amukele u txi ni pata kumweko ni sithumi sako.’ 20Se a to khukha, a txi tsula ka tate wakwe.“Se ene a di ngadi kule, tate wakwe a to mu wona, a txi mu pfela wusiwana, a to tutuma a txi ya mu wukarela ngu mu ka thamo, a txi mu pswopswa. 21Mwanana a to khene: ‘Tata, ni wonhete nzuma ni masoni kwako. Kha ni fanekelwi ngu kuwombwa ti to ni mwanana wako.’ 22Aniko tate a to gela sithumi sakwe a txi khene: ‘Kuluvetani mi neha siambalo so tshura ngutu, mi txi mu bombisa, mu ambekiseni ringi litihoni kwakwe, mu ambekiseni tikathula mikondoni kwakwe. 23Wuyisani dirole da kuena, di dayeni hi txi dya, hi txi maha msaho, 24nguko mwanana wu wangu, a nga ti fite, se a tshumete a txi hanya, a ti mwalate, se e tshumela e manwa.’ Se va to khata kubusa. 25“Mwanana wakwe wa mkoma a ti tithembweni. Se kuwuyani kwakwe, ngako a di hafuhi ni m'ti, a to pfa kuembelela ni sigingo sa kusinya. 26A di dhani mmweyo wa vale va sithumi, a to mu wotisa ku khene: ‘Atile nda txani!’ 27Ene a mu gete ku khene: ‘I mnanda wako a nga wuya, se tate wako a date dirole do nona, nguko a mu amukete a txi hanya kwati.’ 28Kambe ene a to henya ngutu, se a si lavi kuwulela.“Tate wakwe a to huma, a txi ya mu khongotela. 29Kambe ene a xamute ka tate wakwe a txi khene: ‘Malembe a mangi ni ku thumelako, kha ni zivi kundaka ni wumwewo ka milayo yako, kambe khu zivi ku nga ni ninga phongo ni txi busa ni vangana vangu. 30Aniko a wuyile mwanana wu wako, a nga moxa suma sako ni magelegele, se ene u mu dayete dirole do nona!’ 31Kambe tate a mu xamute ku khene: ‘Mwanangu, awe u zumba ni nani yotshe mbimo, sotshe si i ku sangu, nzako. 32Ti ni fanelo kubusa, hi txi tsaka nguko mnanda wu wako a ti fite, e tshumela a txi hanya; a ti mwalate, e tshumela a txi manwa!’ ”


Copyright
Learn More

will be added

X\