LUKA 14

1Ngu ditshiku da Sabbata, Jesu a to wulela nyumbani ka mmweyo wa vathangeli va Vafarisi, kuya dya sakudya. Se va ti mu wonisisa tatinene. 2Se a titi ho masoni kwakwe mthu wo lwala ngu txitsamba. 3Se Jesu a to womba ka vagondisi va M'layo ni ka Vafarisi a txi khene: “Ina ta tumeleka kuhanyisa ngu ditshiku da Sabbata mwendo kha ti tumeleki kani?” 4Aniko vona va to malala. Ene a to mu teka e mu hanyisa, se e mu tsutisa. 5Se a txi khene kwawe: “I mani kwanu awu, ngako mwanana wakwe mwendo homu yakwe, si txi wa txisimani ngu ditshiku da Sabbata, a si kuluvetiko ku si humisa ngu ditshiku da Sabbata kani?” 6Ka toneto va tandekile ku mu xamula. 7Jesu a to maha txidinganiso txiya ka vale va nga ti rambilwe, ngu kuwona ati va nga txi langisa tona makhalo o thanga, a txi khene kwawe: 8“Ngako u txi dhanelwa m'buso wa ntekano, u nge ya langa wukhalo wa masoni; a nga thuka a di rambilwe mmwane wa kuxonipheka kupinda awe; 9Awu a nga ku ramba awe ni nene, a txi ta a ta ku gela ku khene: Khukha ka ewo wukhalo, a na zumba awuwa. Konaho, awe, ngu tingana, u na khukha u txi ya ka wukhalo wo gwitisa. 10Aniko, ngako va txi ku dhana, tsula u txi ya khalahatsha ka wukhalo wo gwitisa; se nyamne wa m'ti, a txi ku tela, a na ta khene kwako: Mndoni, ngono ngu kheno makhatoni. Kwako eto ti na va i di ta ku kupfalisa masoni ka votshe va va nga rambwa. 11Nguko wuhi ni wuhi a ti kulisako, a na vekwa hahatshi, ani wu a ti vekako hahatshi, a na guletwa.” 12Msana keto, a ti khene ka wule a nga mu dhana: “U txi lava kuha vathu m'buso wa kususula mwendo wa kulalela, u nga dhane vandoni vako, mwendo vananu, mwendo maxaka, mwendo vaakelani, vanyatithombe va nga thuka nivona va txi ku tshumetela ngu so fana ni soneso. 13Aniko, ngako u txi maha m'buso, dhana sisiwana, silema, sidiya ni mabhofu; 14Eho u na va u di katekile, nguko evo kha va na so ku tshumetela ngu sona. Kambe kuwukani ka valulami u na ta tshumetelwa.” 15Mmweyo wa vale va nga ti ha sakudyani, ngako a txi pfa timhaketo, a to khene kwakwe: “A katekile awu a no ya dya sakudya Mfumoni ka Txizimu!” 16Kambe Jesu a ti khene kwakwe: “Mthu wo kari a mahile m'buso wa hombe, e ramba vathu vavangi. 17Se a to ruma txithumi txakwe ngu txikhati txa m'buso, kuya gela va va nga rambwa, a txi khene: ‘Ngonani, silo sotshe si lungisilwe.’ 18Kambe va lambile votshe ngu diganda. Awu wo khata a ti khene kwakwe: ‘Ni xavile thembwe, se ni lava kuya yi wona; na ku kombela ti to u txi ya ni kombelela divalelo.’ 19Mmwanyane a txi khene: ‘Ni xavile digumi da tikavi, se ni lava kuya ti duketa, na ku kombela u txi ya ni kombelela divalelo.’ 20Mmwanyane a txi khene: ‘Ni tekile msikati, ngu toneto, kha ni na kuya.’ 21Txithumi txi to tshumela txi ya zivisa mkoma wa txona timhaketo. Se nyamne wa m'ti a to henya, a txi gela txithumi txakwe, a txi khene: ‘Kuluveta u txi ya mitendelani ni mapangoni ka didhoropa, u txi tisa kheno sikulungu ni silema ni mabhofu ni va vo khwita.’ 22Se txithumi txi txi kha txona: ‘Mkoma, ati u nga ruma ti mahilwe, kambe wukhalo wu ngadi ho.’ 23Se nyamne wa m'ti a txi khene ka txithumi: ‘Tsula tinzilani ni tibhiyoni, u txi kurumeta vathu kuwulela, nyumba yangu yi za yi tala. 24Nguko na mi gela ku khani: Ni mmweyo wa va va nga rambwa kha na mbi danza txilalelo txangu.’ ” 25Mabutho a hombe ma ti londetela Jesu, se ene a to va rendekela a txi khene kwawe: 26“Ngako mthu a txi ta kwangu, na a si vengeli tate wakwe, mame wakwe, msikati wakwe, vanana vakwe, vanawe va mazambi, tindiyakwe, hambi ni wutomi wakwe, kha si koti kumaha mgondiswa wangu. 27Awu a si rwaliko txihambano txakwe, a txi ni londisa, kha si koti kumaha mgondiswa wangu. 28Ngu toneto, i mani kwanu, awu a lavako kuaka txitezi txa kudingilila ka txona, a si thangiko ngu kukhalahatsha a txi bala mtengo wa si si lavekako, a txi wonisisa ti to mwendo si nga eneta mthumo, kani? 29Kasiku, ngako a di khatile kuaka, a txi tandeka kuheta, va si thuki va txi khata ku mu seka votshe va va no ti wona, 30va txi khona: ‘Mamoyo a khatile kuaka, aniko a tandekile kuheta!’ 31“Tximwane txidinganiso: ngu wuhi mkoma, awu a xomelako kuya lwa ni mmwane, a si thangiko ngu kukhalahatsha a txi wonisisa ti to a nga si kota kuxula ngu dizana da mazana a vathu, mmwane mkoma wu a mu telako a di xomile mazana mambidi a mazana a vathu? 32Kutingako a txi ti wona ti to kha ti dingani, wa tutumela kurumela mtumi, mmwane mkoma a di ngadi kule, kasi kuya kombela tinzila ta kudikha. 33Inna-ko, ngu toneto, wuhi ni wuhi kwanu, a si tumeliko kuleka sotshe si a ku naso, kha na kumaha mgondiswa wangu. 34“M'nyu njilo txi txi tshambako, kambe ngako m'nyu wu txi phwamwa, wu nga lungwa ngu txani wona kani? 35Kha wu nga ngadi wu vhuna txilo, hambi i di kuphinduka wu maha mafu, hambi kumaha sa kunonisa; aniko wa theketwa hahanze. Awu a ku ni tinzeve ta kuengisa a na engise.”

will be added

X\