LUKA 11

1Kutingako Jesu a txi khongela ka wukhalo wo kari, txikhati txi a nga gwita, mmweyo ka vagondiswa vakwe a to mu kombela a txi khene: “Mkoma, hi gondise kukhongela, nga Johane nene a nga gondisa vagondiswa vakwe.” 2Jesu a to va xamula a txi khene: “Mbimo yi mi khongelako, indani khanu: ‘Tata, ditina dako di na sawulwe, wu na te kwathu mfumo wako, 3Hi he sakudya sathu sa ditshiku ni ditshiku; 4Hi divalele siwonho sathu, nguko ha va divalela ava va ku ni minandu kwathu; u nga hi leke hi txi wa kudukwani.’ ” 5A va gete kambe ku khene: “Ngako mmweyo wanu, awu a ku, a di ni mndoni, e mu yela hagari ka wusiku, a txi ya khene kwakwe: ‘He mndoni wangu, hinga ni lomba mapawu mararu, 6nguko a bwakile mmweyo wa vandoni vangu, se kha ni nga ni txilo txa ku mu ninga’, 7se ene a txi angula a di nyumbani a txi: ‘U nga ni karate, ditimba se di sekilwe; vanana vangu ni nani hi otete, kha ni si koti kuwuka ni txi ku ninga txilo.’ ” Jesu a engetile a txi khene: 8“Na mi gela ku khani, hambi a txi lamba kuwuka, a ta mu ha mapawu ngu kuva i di mndoni wakwe, a na za a txi wuka ngu mhaka ya kusimamisa kwakwe, a txi mu ha si a si lavako. 9“Na mi gela kambe ku khani: Kombelani, mi na ningwa ngu Txizimu, lavani, mi na si mana; gogotani ditimba, mi na tulelwa. 10Nguko wuhi ni wuhi a kombelako wa hiwa; awu a lavako, wa si mana; awu a gogotako ditimba, wa tulelwa. 11I mani hagari kwanu, awu i ku tate, ngako mwanana a txi mu kombela txihaka a mu ningako mnyoka, a si mu ningi txihaka kani? 12Mwendo kambe ngako mwanana a txi kombela dianda, a nga mu ninga hume kani? 13Ngu toneto, eko hambi anu, mi ku vabihi, mi zivako kuha sa sinene vanana vanu, ngutungutu Tate wa nzumani a na pindisa ngutu kuninga Moya wakwe wo Sawuleke ka vale va mu kombelako!” 14Se a to tovela didhimoni da txiduma. Kutingako didhimoni di di humile, txiduma txi to wombawomba, se mabutho me xamala. 15Vamwane va txi khona: “A tovela madhimoni ngu Bhelzebhule, mkoma wa madhimoni.” 16Vamwane kambe va to mu duka ngu kukombela txidiwukiso txa kuta ngu nzumani. 17Kambe ene, ngu kuziva mialakanyo yawe, a to khene kwawe: “Mfumo wuhi ni wuhi wu ti bhandako wupune wu ti lwisa, wu na hangalaka. Se nyumba yihi ni yihi yi ti bhandako yipume, yi ti lwisa, yi na wa. 18Ngu konaho, Sathane nene, ngako a txi ti bhanda apune e ti lwisa, mfumo wakwe wu na tsanisa ku txani kani, eko mi ku khanu ani ni tovela madhimoni ngu Bhelzebhule? 19Ngako kha ditshuri ni txi tovela madhimoni ngu Bhelzebhule, valondeteli vanu va ma tovela ngu mani? Ngu konaho, vona va na va valamuli vanu. 20Kambe ngako ni txi tovela madhimoni ngu litiho la Txizimu, kha ditshuri Mfumo wa Txizimu wu hokile kwanu. 21Ngako mthu wa wurena a txi ñola matxhari, e woneleta nyumba yakwe, simaha sakwe sotshe si zumbisekile khakwati. 22Kambe ngako ku txi ta mmwane, awu a ku ni mtamo kupinda ene, a txi mu xomela e mu xula, wa mu honyola matxhari awa a nga ti ma thembile, a txi avela vathu asi nene a nga ti handile. 23Awuwa a si emiko ni nani, a lwa ni nani; awu a si sengeletiko ni nani wa hangalasa. 24“Moya wa nzambwa, ngako wu txi huma ka mthu, wu tsimbilela mu ka makhalo o mbi na mati, wu txi lava ko humula. Ngako wu txi ku pwata, wu womba tiya: ‘Ni na tshumelela nyumbani kwangu, amu ni nga humela kona.’ 25Se ngako wu txi hoka kona, wu yi mana yi di hiyetwe, na kambe yi di lungisilwe. 26Se wu ya lava mimoya yimwane ya mtxhanu ni yimbidi, ayi yi wu pindako ngu wubihi, se yi wulela yi zumba konamo. Se mazumbelo o gwitisa a mthu wuwa ma phinduka me maha o biha kupinda o khata.” 27Se a di ngadi a txi womba timhaketo wamsikati wu a ku hagari ka dibutho a to gula dipswi dakwe, a txi khene: “A katekile mame wu a nga ku veleka ni titshumbu ti u nga mama!” 28Jesu a txi khene: “Kambe ngutungutu va katekile ava va engisako dipswi da Txizimu, va txi di vekisa.” 29Kutingako dibutho di txi sengeletana, Jesu a ti khene: “Lixaka liya lo biha li kombela txidiwukiso, aniko kha li na mbi ningwa txidiwukiso tximwane, i singa txidiwukiso txa Jona. 30Ngukusa, nga kuwa Jona a nga va i di txidiwukiso ka va Niniva, Mwanana wa Mthu nene a na va txidiwukiso ka lixaka liya. 31Mkoma wa msikati wa kuta ngu Wulambwe a na khukha a txi ema, kulamulwani, kumweko ni vathu va lixaka liya, a na va kona, ngukuva a tile ngu siyekamitshi kuta engisa wuzivi wa Solomoni; kasi wa hombe kupinda Solomoni wa ho hawa. 32Vathu va Niniva va na ema kulamulwani kumweko ni lixaka liya, va na li kona, nguko va hundulukile ngako va txi txhumayelwa ngu Jona; kasi wa hombe kupinda Jona wa ho hawa.” 33“Kha ku na mthu wu a lumekako dilambu kasi ku di veka kusisalani, mwendo hahatshi ka txirundu; aniko di hayekwa ha txipandeni, ti to ava va wulelako ve wona kuwonekela. 34Dilambu da mmidi ngu diso; ngu konaho, ngako diso dako di di lulamile, mmidi wako wotshe wu kuwonekelani; aniko ngako di di bihile, mmidi wako niwona wu txidemani. 35Ti wonele ti to kuwonekela kuwa ku ku kwako ku nga phinduke ku txi maha txidema. 36Ngako mmidi wako wotshe wu txi woningwa, na wu singa ni txidema, ngu kona wu no woningwa wotshe kufana ni mbimo yi dilambu di ku woningako ngu kuwonekela ka dona.” 37Jesu a di ngadi a txi wombawomba, mfarisi a to mu kombela ku e ya dya nayo. Se ene a to wulela e ya khalahatsha ha mezani. 38Kambe mfarisi a to xamala ngako a txi wona ti to Jesu kha thanga ngu kusamba, a sa nzi kudya. 39Se Mkoma a txi khene kwakwe: “Kunene, anu vafarisi mi kuwula m'hindo ni mbiya hahanze ka sona, kuve mndani mi tate ngu kupa ni tshofu. 40Mabhembanu! Awu a nga maha sa hahanze hi nga ene a nga maha ni sa mndani kani? 41Aniko ningani ka sikulungu asi mi ku naso, ngu kona silo sotshe si no va si di basile kwanu. 42“Kambe mina ni dikhombo, anu vafarisi nguko mi humisa sa wugumi ka mbowa ni ka matawa otshe ni ka yotshe mindiwo ya mazokoro, mi txi leka kululama ni lirando la Txizimu! Mi ti fanete ku ti maha eto, mi si leki kumaha tile to thanga. 43“Mina ni dikhombo, anu vafarisi, nguko mi randa sikhalo si si ku masoni, masinagogani, ni kuloswa mitendelani. 44Mina ni dikhombo anu, ngukuva mi fana ni mayiva, ayawa ma si wonekiko, ayawa vathu va ma kandetelako, va si ma zivi.” 45Se mmwane wa vagondisi va Mlayo a to xamula a txhi khene: “Mgondisi, ngu kuwombisa eto, wa hi ruketela nanathu.” 46Aniko, ene a ti khene: “Mina ni dikhombo anu vagondisi va Mlayo ngukuva mi rweka vathu mirwalo yi yi va nemelako, kuve anu ma lamba ku yi gwesa mirwaloyo, hambi ngu litiho limwelo. 47“Mina ni dikhombo anu, nguko mi aka mayiva a Vaprofeti va va nga dawa ngu vatate vanu. 48Kha ditshuri mi maha wufakazi wa mithumo ya vatate vanu, na mi txi yi tumela, nguko vona ngu vona va nga va daya, se anu mi aka mayiva awe. 49Ngu konaho, wuzivi wa Txizimu wu wombile, wu txi: ‘Ni na va rumela vaprofeti ni vapostoli, va na daya vamwane kwawe, ve xanisa vamwane.’ 50Ati to mnoha wa vaprofeti votshe wu wu nga theketwa kukhukhela kutumbulukani ka mafu, wu txi vilwa ka lixaka liya, 51kukhata ngu mnoha wa Abhele kala kuhetisela ngu wa Zakariya, awu a nga dawa hagari ka txiluvelo ni Wukhalo wo Sawuleka ngutu; inna, na mi gela ni khani: Wu na vilwa ka lixaka liya. 52Mina ni dikhombo, anu vagondisi va Mlayo, nguko mi tekile khiya ya tigondo, se anu kha ma wulela, kambe mi tsimbile ava va nga txi lava kuwulela.” 53Kutingako a txi huma, konaho vabhali ni vafarisi va to khata ku mu wukela ni ku mu txhokolotela ngu mapswi, ti to e wombawomba timhaka to tala, 54Ve mu riyela kasiku mwendo va nga mu ñola ngu mapswi a kuwombwa ngu txisofu txakwe.


Copyright
Learn More

will be added

X\