JOHANE 9

1Ngako Jesu a txi pinda, a to wona mthu wa dibhofu, kukhukhela kuvelekwani kwakwe. 2Se vagondiswa vakwe va to mu wotisa, va txi khona: “Mgondisi, i mani a nga goha, ngene mwendo mbaveleki vakwe, ku kala e velekwa i di dibhofu kani?” 3Jesu a to va xamula a txi khene: “Hi nga ene a nga goha, hambi ni vaveleki vakwe; atiya ti mahekile kasi kuwonekiswa mithumo ya Txizimu ngu ngene. 4Ta laveka ti taku ani ni maha mithumo ya wule a nga ni ruma, na i di ngadi mitshikari; wusiku wa ta, ahawa mthu a si si kotiko kuthuma txilo. 5Ngako ni ku ngadi ho ha ditikoni, ni liwoningo la ditiko.” 6A di wombile tiya, a to thura lure hahatshi, e maha ndope ngu lure, e tota ngu yona maso a dibhofu dileya; 7e di gela ku khene: “Tsula u txi ya samba txizivani ka Silowame (ti ti wombako ku ‘Txirumwa’).” Ti di mahile eto, ene a tsute e ya samba, se e wuya a txi wona. 8Konaho, vaakelani vakwe ni vale va nga ti mu wonile ti to a hanya ngu kukombela, va to womba va txi khona: “Ina hi nga ene wule a nga ti khalahatshile e kombela kani?” 9Vamwane va txi khona: “Ngene wuwa.” Aniko vamwane va txi khona: “Wo fana nayo.” Se ene a nje ku ti angulela, a txi khene: “Ngani.” 10Senikoko, va txi mu wotisa, va txi khona: “Nji txani txi nga maheka, kasiku maso ako me mana kuwona kani?” 11Ene a xamute a txi khene: “Mthu wule a dhanwako ku i Jesu, a to maha ndope e ni tota ngu yona mu ka maso, e ni gela tiya: ‘Tsula txizivani ka Silowame, u txi ya samba.’ Se konako ni to tsula ni ya samba, se ni khata kuwona.” 12Vona va to womba va txi khona: “A hani ene?” Ene a to xamula a txi khene: “Kha ni ti zivi.” 13Se va to mu teka awule i nga ti dibhofu, ve mu yisa ka Vafarisi. 14Kambe ditshiku di Jesu a nga vhuva ngu dona ndope e mu tula maso, i ti ditshiku da Sabbata. 15Se Vafarisi va to engeta kambe ve mu wotisa ti to ti mahisile ku txani kumana kuwona kani; ene a to womba a txi khene: “A to ni tota ndope mu ka maso, ni txi ya samba, se konkuwa na wona.” 16Se koneho vamwane vafarisi va to womba va txi: “Awuwa mthu hi nga wa ka Txizimu, nguko kha veketi Sabbata.” Vamwane va txi khona: “Ti nga mahisa ku txani mthu wa txigohi e si kota kumaha sidiwukiso siya?” Se va to khata kuphikizana ngu txawe. 17Va to engeta kambe ve womba ka dibhofu, va txi khona: “Awe u wona txani ngu wule a nga ku tula maso?” Ene a va xamute a txi khene: “Mprofeti.” 18Hambi keto, Vajudha kha va kholwa ti to ene hakunene i ti dibhofu ni ti to a nga va a di tulekile maso, kala kuza ve dhana vaveleki vakwe wule se a wonako. 19Va va wotisile va txi khona: “Ngene wuwa mwanana wanu, mi ku khanu a velekilwe i di dibhofu kani? Ti mahisile ku txani kumana kuwona kani?” 20Se vaveleki va va xamute va txi khona: “Ha ti ziva ti to awuwa ngene mwanana wathu, ni ti to a velekilwe i di dibhofu. 21Aniko ati ti nga mahisa tona kala a txi mana kuwona, kha hi ti zivi, hambi ni wule a nga mu tula maso, kha hi mu zivi. Nene mbwa hombe, mu wotiseni, a na ti xamulela apune.” 22Vaveleki vakwe va wombisile tiya ngu kuthava Vajudha. Inkusa vona Vajudha va ti langanile ti to, ngako mthu wo kari a txi womba ti to Jesu ngene Mesiya, a na tovelwa disinagogani. 23Ngu toneto vaveleki vakwe va nga womba va txi: “Nene mbwa hombe, mu wotiseni, a na ti xamulela apune.” 24Ka wumbidi, va to engeta ve mu dhana mthu wule i nga ti dibhofu, va txi khona kwakwe: “Dhumisa Txizimu! Athu ha ti ziva ti to eyo mthu njigohi!” 25Kambe ene a xamute a txi khene: “Ati to njigohi, ani kha ni ti zivi; mhaka yimweyo ni yi zivako ngu yiya ya ku ani ni ti dibhofu, aniko se na wona,” 26Va to engeta kambe va txi khona: “A to ku maha txani Ene? A mahisile ku txani ku ku tula maso?” 27Ene a va xamute a txi khene: “Ni wombile, mi txi ti engisa, i mhaka muni mi lavako ku ti engisa kambe? Kasi nananu mi lava kumaha vagondiswa vakwe kani?” 28Konaho va to khata ku mu ruketela va txi khona: “Mgondiswa wakwe ngawe wekha, athu hi vagondiswa va Mosi. 29Ha ti ziva tatinene ti to Txizimu txi wombawombile ni Mosi, kambe awu kha hi ti zivi ti to a ta ngu hani.” 30Se mu'thu wule a to ti angulela a txi khene: “Ta xamalisa ngutu hakunene, ti to anu kha mi mu zivi emo a tako ngu kona, na kasi ngene a nga ni tula maso. 31Kambe ha ti ziva ti to Txizimu kha txi engisi vawonhi; aniko awule a txi khozelako, a txi maha kuranda ka txona, eyo txona Txizimu txa mu engisa. 32Kha hi zivi ku ti pfa ti to nombwe wo kari a tute maso mthu wo velekwa i di dibhofu. 33Idiku Ene i ti singa wa Txizimu, nga a sa si kota kumaha txilo.” 34Se vona va txi mu angula, va txi khona: “U veleketwe txiwonhoni, ngu wutumbu wako wotshe, se u lava ku hi gondisa?” Konaho va to mu humisa hahanze. 35Jesu a ti engisile ti to va mu humisile hahanze, se ngako a di manani nayo, a to mu wotisa a txi khene: “Wa kholwa ka Mwanana wa Mthu kani?” 36Se ene a txi khene: “Ngu mani, Mkoma, kufela ku ni kholwa kwakwe kani?” 37Jesu a nje khene: “Awe se u mu woni; ngene wu a wombawombako ni nawe,” 38Ene a to xamula a txi khene: “Na tumela, Mkoma!” Se a to khizama, a txi mu khozela. 39Konaho Jesu a to womba a txi khene: “Ani ni tete kuta lamula ha ditikoni, kufela ku ava va si woniko ve mana kuwona, ani vale va wonako ve maha mabhofu.” 40Se vafarisi vo kari, va nga ti kumweko nayo, ngako va di engisile tiya, va to mu wotisa, va txi khona: “Ina hi mabhofu nathu kani?” 41Jesu a to va xamula, a txi khene: “Idiku kha mi nga mabhofu, nga mi si nga ni mnandu. Aniko ngako mi ku khanu: ‘Ha wona!’ ngu toneto txiwonho txanu txi namarete.

will be added

X\