JOHANE 8

1[Jesu a to tsula mmangoni ka Olivheti. 2Ngu mbimo ya mixo, a to tshumela e ya woneka Dithepeleni, se votshe vathu va to ya tshangana hafuhi kwakwe. Ene a to khalahatsha a txi va gondisa. 3Konako, vabhali ni vafarisi va to mu tisela wamsikati, a nga manwa wugangoni, se va to mu veka hagari ka vathu. 4Va txi khona ka Jesu: “Mgondisi, awu wamsikati a to manwa a txi maha wugango. 5Aniko Mosi, amu ka Mlayo, a hi rumile kufayetela ngu marigwi vavasikati vo nga tiya. Se awe u khawe txani ngu tona kani?” 6Va wombile tiya, ngu ku mu riyela, kasiku ve si kota kumana mhaka ya ku mu mangalela ngu yona. Aniko Jesu a to nama, a txi bhala ha mafuni ngu litiho. 7Kota ngako va nga txi phikiza ngu ku mu wotisa, a to lulama, a txi va gela ku khene: “Awule hagari kwanu a manekako a singa ni txiwonho, a na thange ene a txi mu rinza dirigwi.” 8Se a di namile da wumbidi, a to khateta kubhala kambe ha mafuni. 9Konaho, va di engisile mhaka yiya, va to khata kupfhuka, mmweyo ngu mmweyo, kukhata ngu vale va hombe. Se a to sala ekha awule wamsikati, a nga ti zumbile hagari. 10Jesu a to lulama, a txi mu gela ku khene: “Wamsikati, kasi va hani? Kha nga ho ni wammweyo a nga ku abanisa kani?” 11Ene a to angula a txi khene: “Mkoma, ku walo ni wammweyo!” Jesu a to womba a txi khene: “Hambi ani kha ni ku abanisi. Tsula, aniko u nga engete kambe u txi wonha.”] 12Jesu a to tshumela a txi wombawomba ni vathu, a txi va gela ku khene: “Ani ni liwoningo la ditiko. Awu a ni londisako, kha tsimbili txidemani, kambe a na va ni kuwonekela ka wutomi.” 13Vafarisi va to mu gela, va txi khona: “Awe wo ti fakazela upune. Wufakazi wako hi nga wa wunene.” 14Jesu a to va xamula a txi khene: “Hambi ni txi ti fakazela nipune, wufakazi wangu mbwa wunene, nguko na ku ziva amu ni tako ngu kona, ni mu ni yako kona. 15Anu mi lamula ngu malamulelo a vathu. Ani kha ni lamuli mthu. 16Kambe ni txi lamula, kulamula kwangu nga kunene, nguko kha ni zumbi nokha, aniko nina ni Tate wu a nga ni ruma. 17Nikona Mlayoni kwanu, ku bhatwe ti to wufakazi wa vathu vambidi mbwa wunene. 18Ani na ti fakazela nipune. Nene Tate wu a nga ni ruma, wa ni fakazela.” 19Se va to mu gela va txi khona: “Tate wako kasi a hani?” Jesu a to va xamula a txi khene: “Ani kha mi ni zivi, hambi ni Tate wangu kha mi mu zivi. Idiku mi ti ni zivile, hambi ni Tate nga mi ti mu zivile.” 20Mapswi awa a ma wombile a di ka wukhalo wa miningelo, na a txi gondisa Dithepeleni. Kambe kha ka nga va ni mthu wu a nga mu ñola ngukusa txikhati txakwe txi ti sa nzi kuhoka. 21Jesu a to tshumela a txi va gela ku khene: “Ani na tsula, se mi na ni lava, aniko mi na fela txiwonhoni kwanu. Amu ni yako kona, anu kha mi na ku si kota kuta.” 22Vajudha va txi khona, “Eko wo lava ku ti tshongisa kani? Aku u ku khawe: ‘Amuwa ni yako kona, anu txima kha mi na ku si kota kuta’?” 23Se a to va gela a txi khene: “Anu mi va hahatshi, ani ni wa txitimwi. Anu mi va mafu awa, ani kha ni nga wa mafu awa. 24Ngu toneto, ni nga mi gela ni txi khani: ‘Mi na fela siwonhoni kwanu’, inkusa, ngako mi si kholwi ti to ‘Ngani wuwa’, mi na fela siwonhoni kwanu.” 25Se va to mu gela va txi: “Kasi awe ngawe mani?” Jesu a to va xamula, a txi khene: “Toneto ni nga mi gela kukhatani. 26Ni nato ta tingi to womba ngu nganu ni lamula, kambe awu a nga ni ruma mbwa ditshuri, se nani ati ni nga ti engisa kwakwe, ngu txona ni ti wombako ka vathu.” 27Vona kha va ti ziva ti to a titi wombawomba ngu Tate. 28Jesu a to va gela a txi khene: “Mbimo yi mi no guleta Mwanana wa Mthu, ngu konaho mi no ti ziva ti to ‘Ngani Wuwa’, ni ti to kha ni thumi txilo ngu txangu nokha, aniko ni womba ti ni nga gondiswa ngu Tate. 29Se awu a nga ni ruma, ana ni nani; kha ni leka nokha, ngukusa ani, otshe masiku, ni thuma ti ti mu tsakisako.” 30Na a di ngadi a txi womba toneto, vavangi va to kholwa kwakwe. 31Ngu toneto, Jesu a to gela Vajudha va va nga ti khotwe kwakwe, a txi khene: “Ngako mi txi zumba ka dipswi dangu, mi na va vagondiswa vangu ngu ditshuri. 32Mi na ziva ditshuri, se ditshuri di na mi khulula.” 33Va to xamula va txi khona: “Athu hi liveleko la Abrahamu. Txima kha hi zivi ku nga va tikhumbi ta mthu. U wombisa ku txani ti to: ‘Mi na khululwa’?” 34Jesu a to va xamula a txi khene: “Ngu ditshuri, ngu ditshuri, ni khani: Wuhi ni wuhi a mahako txiwonho, i khumbi ya txiwonho. 35Se khumbi kha yi zumbi mtini otshe masiku. Mwanana ngene a zumbako mtini otshe masiku. 36Ngu toneto, ngako Mwanana a txi mi thusa, mi na va mi di thusekile kha ditshuri. 37Na ti ziva ti to mi liveleko la Abrahamu, kambe mi lava ku ni daya, ngukusa dipswi dangu kha di wuleli mndani kwanu. 38Ani ni womba ati ni nga ti wona ka Tate wangu; nanu mi maha ati mi nga ti engisa ka tate wanu.” 39Va to xamula va txi khona kwakwe: “Tate wathu ngu Abrahamu.” Se Jesu a txi khene kwawe: “Ngako mi di vanana va Abrahamu, mahani mithumo ya Abrahamu. 40Aniko anu mi lava ku ni daya, ani ni mi gelako ditshuri di ni nga di engisa ka Txizimu. Abrahamu kha ti maha tiya. 41Anu mi maha mithumo ya tate wanu.” Konaho va to khona kwakwe: “Athu kha ha velekwa wugangoni. Hina ni tate mmweyo, i ku Txizimu.” 42Jesu a to va gela ku khene: “Idiku Txizimu i Tate wanu, mi ndina ni dhunda, nguko ni ta ngu ka Txizimu, ni huma ngu ka txona, inkusa kha na ti tela nipune, aniko ngu txona txi nga ni ruma. 43Kha mi ma pfi ngu txani mawombawombelo angu kani? Nguko mi si si kotiko kuengisa dipswi dangu. 44Tate wanu ngu Sathane. Se mi randa kumaha kunavela ka tate wanu. Ene i m'dayi kukhukhela kukhatani, kha zumba ditshurini, ngukusa kwakwe ku walo ditshuri. Ngako a txi wombawomba makuhu, a wombawomba ngu ti i ku takwe, nguko i m'hembi ni tate wa makuhu. 45Aniko ani, ngu kuwa ni wombako ditshuri, kha mi kholwi kwangu. 46I mani kwanu a no ni kona ku nina ni txiwonho kani? Se ngako ni txi womba ditshuri, njani mi si ni tumeli kani? 47Awu i ku wa Txizimu, a engisa mapswi a Txizimu. Anu kha mi engisi, nguko kha mi nga va Txizimu.” 48Vajudha va to xamula, va txi khona kwakwe: “Ina kha hi wombi tona ti to khathu awe u Musamariya ni ti to khathu una ni didhimoni?” 49Jesu a to xamula a txi khene: “Ani kha ni nga ni didhimoni; aniko ani na xonipha Tate, kasi anu kha mi ni xoniphi. 50Ani kha ni ti laveli wudhumo nipune: Wa ho wu a lavako ku ni dhumisa, ngene a lamulako. 51Ngu ditshuri, ngu ditshuri na mi gela ku khani: Ngako mthu a txi veketa dipswi dangu, txima kha na mbi wona lifo ni ditshiku ni dimwedo.” 52Vajudha va txi khona kwakwe: “Konkuwa se ha ti ziva ti to una ni didhimoni. Abrahamu a fite, vaprofeti nivona va fite; se awe u khawe: ‘Ngako mthu a txi veketa dipswi dako, kha na mbi wona lifo ni ditshiku ni da dimwedo.’ 53Ina u wa hombe awe, kupinda Tate wathu Abrahamu, awu a nga fa kani? Ni vaprofeti nivona va nga fa. Awe u ti maha mani kani?” 54Jesu a to va xamula a txi khene: “Ngako ni txi ti dhumisa, ku ti dhumisa kwangu hi nga ka txilo. Awu a ni dhumisako i Tate, awu anu mi ku khanu i Txizimu txanu, 55kuve kha ma mu ziva; aniko ani na mu ziva. Ngako ni txi khani kha ni mu zivi, ni ndina va wa makuhu kufana ni nanu. Aniko ani na mu ziva, se na veketa dipswi dakwe. 56Abrahamu, tate wanu, a tsakete kuwona ditshiku dangu, se a di woni e nengela.” 57Konaho Vajudha va to khona kwakwe: “Awe khu si kuva ni mtxhanu wa makumi a malembe, se u woni Abrahamu?” 58Jesu a to khene kwawe: “Ngu ditshuri, ngu ditshuri, na mi gela ku khani: Na Abrahamu a si nzi kuva ho, ‘Ani ngani Wuwa’.” 59Se vona va to rola marigwi kasi ku mu rinzetela, aniko Jesu a to sisala, e huma Dithepeleni.

will be added

X\