JOHANE 7

1Msana ka toneto, Jesu a ti tsimbilela Galileya, a si dhundi kutsimbilela Judheya, ngukuva Vajudha va txi lava ku mu daya. 2Kambe m'buso wa Vajudha wa Midhute wu ti hafuhi. 3Se vanawe va ti khona kwakwe: “Khukha hawa, u txi tsula Judheya kufela ku vagondiswa vako ve wona mithumo yi u yi mahako. 4Ngukusa kha ku na mthu wu a mahako txilo kusisalani, ngako a txi dhunda kuziwa. Ngako u txi maha mithumo yo ngeto, ti kombise ka ditiko.” 5Ngukusa nivona vanawe va ti si kholwi kwakwe. 6Ngu toneto, Jesu a ti khene kwawe: “Mbimo yangu kha yi nzi kuhoka; kasi i di anu, mbimo yanu yi ho otshe masiku. 7Ditiko kha di na ku mi vengela, kambe ani da ni vengela, ngukusa na fakaza ti to mithumo ya dona yi bihile. 8Tsulani anu, m'busoniyo, ngukusa mbimo yangu kha yi nzi kuhetiseka.” 9Kutingako a di va gete timhaketo, a to ti salela Galileya. 10Kambe ngako vanawe va di tsute m'busoni, ene a to tsula a si ti wonekisi, aniko a to tsula kusisalani. 11Se Vajudha va ti mu lava m'busoni, va txi: “A hani ene?” 12Se ku ti ni kukanetisana ka hombe hagari ka dibutho, vamwane va txi khona: “I mthu wa mnene.” Vamwane va txi khona: “Ahim-him, wa kanganyisa vathu.” 13Hambi keto, va ti si wombawombi ngu ngene ha kubasani, ngu kuthava Vajudha. 14Hagari ka m'buso, Jesu a to kwela e ya Dithepeleni, e ya gondisa kona. 15Se Vajudha ve xamala, va txi khona: “Awuwa a zivisa ku txani Mibhalo, kuve kha gonda kani?” 16Jesu a to va xamula a txi khene: “Gondo yangu hi nga yangu, aniko nja wule a nga ni ruma. 17Ngako mthu a txi lava kumaha kuranda ka Txizimu, a na ti ziva ti to gondo yangu yi huma ka Txizimu, mwendo no ti wombela tangu ngu wutumbu. 18Awu a wombawombako ngu ta wutumbu wakwe, a lava kudhumiswa; aniko awu a lavako kudhumiswa ka wule a nga mu ruma, eyo ngene i ku wa ditshuri, kwakwe kha ku nga ho kukanganyisa. 19Ina Mosi kha mi ninga Mlayo kani? Aniko, hambi keto, kha ku nga ni wammweyo, hagari kwanu, a gongako Mlayo. Ngu ku txani, mi lavako ku ni daya?” 20Dibutho di to xamula di txi: “Awe una ni didhimoni. I mani a lavako ku ku daya, kani?” 21Jesu a to va xamula, a txi khene: “Ni mahile mthumo wa wumwewo dwe, se motshenu mi xamala. 22Mosi a mi ningile wukwera (na i singa ti to wukwera wu khatilwe ngu Mosi, aniko wu huma ka vakokwane), se ma yisa wukwerani mthu ngu Sabbata. 23Senikoko, ngako mthu a yiswako wukwerani ngu Sabbata, ti txi maneka i singa kundaka Mlayo wa Mosi, mi ni henyela ngu txani, ngako ni di hanyisile mthu, mmidi wakwe wotshe, ngu Sabbata kani? 24Mi nga lamuleni ngu kuwona khohe dwe, aniko lamulani ngu nzila yo lulama?” 25Vathu vo kari va Jerusalema va txi khona: “Ina hi nga ene wuwa va lavako ku mu daya kani? 26Se ndiyo wa wombawomba ha kubasani, kambe kha va mu anguli txilo. Ina vafumeli vathu va nga va va di ti zivile ngu ditshuri ti to ngene Mesiya apune kani? 27Aniko awuwa, ha ku ziva mu a humako kona, kasi Mesiya kha na mbi ziwa mu a tako ngu kona, mbimo yi a no ta.” 28Konako Jesu a to guleta dipswi e gondisa Dithepeleni, a txi khene: “Ma ni ziva! Ma ku ziva ni mu ni tako ngu kona. Kha na ti tela nipune, aniko awu a nga ni ruma i ditshuri ngu wutumbu wakwe, awu anu mi si mu ziviko. 29Ani na mu ziva, inkusa ni ta ngu kwakwe, ni rumilwe ngu ngene.” 30Se va to lava ku mu ñola, aniko kha ka nga va ni mmweyo a nga mu gwesa, nguko mbimo yakwe yi sa nzi kuhoka. 31Kambe vavangi hagari ka dibutho va to kholwa kwakwe, va txi khona: “Ngako Mesiya a txi ta, ina a na ta maha sixamaliso so pala si si mahwako ngu wuwa, kani?” 32Vafarisi va to engisa ku dibutho di nga txi ngurangura ngu mhaka yakwe: Konako vaphaxeli va hombe ni vafarisi va to ruma mahalamu kuya mu ñola. 33Se Jesu a to khene kwawe: “Ni ngadi ni nanu mbimo ya yidotho, se na tsula ka wu a nga ni ruma. 34Mi na ni lava, kambe kha mi na mbi ni mana, nguko aha ni ku kona, anu kha mi si koti kuta.” 35Ngu kota yeto, Vajudha va to khata kuwotisana, va txi khona: “O lava kuya hani, aku hi no tandeka ku mu mana kani? O lava kuya ka va va nga hangalaka hagari ka Vagriki O lava kuya gondisa Vagriki? 36Di womba txani dipswi di da ku khene: ‘Mi na ni lava, kambe kha mi na mbi ni mana’, ni ku khene: ‘Aha ni ku kona, anu kha mi si koti kuta?’ ” 37Ka ditshiku do gwitisa da M'buso, i ku ditshiku da hombe, Jesu a to khukha a txi ema, a txi gula dipswi a txi khene: “Ngako mthu a di ni ditora, a na te kwangu a ta sela. 38Awule a kholwako kwangu, nga ti Mibhalo yi wombako, ‘minambo ya mati o hanya yi na khulunga, yi txi huma ngu mbiluni kwakwe.’ ” 39Jesu a titi womba tiya, na a txi fanekisa Moya wu va nga txi fanela ku wu amukela avale va ndino kholwa kwakwe; inkusa wona Moya wu ti sa nzi kuta, nga ti Jesu a nga sa nzi kupfaliswa. 40Vavangi hagari ka dibutho, kutingako va di engisile dipswido, va to womba, va txi: “Kha ditshuri, awuwa i Mprofeti.” 41Vamwane va txi khona: “Awuwa i Mesiya.” Aniko vamwane va titi khona: “Ina Mesiya a nga huma ngu Galileya? 42Ina Mibhalo kha yi wombi ti to Mesiya a na huma ka lixaka la Dhavhidha, a txi velekelwa Bhetlehema, didhoropa di Dhavhidha, a nga tumbuluka ka dona, kani?” 43Ngu toneto, diutho di nga abaneka ngu mhaka yakwe. 44Vamwane ka vona va to lava ku mu ñola, kambe ku walo ni mmweyo a nga tsana ku mu gwesa. 45Mahalamu ma to wuya ka vaphaxeli va hombe ni vafarisi, se vona ve va wotisa, va txi khona: “Njani mi nga mbi wuya nayo kani?” 46Mahalamu ma to xamula, ma txi: “Txima kha hi zivi kuwona mthu wo wombisa ku nga wule!” 47Se vafarisi va to xamula, va txi khona: “Kasi nanu mi dyeletwe? 48I mani ka va va hombe ni ka vafarisi, a nga kholwa kwakwe kani? 49Aniko dibutho diya di si ziviko Mlayo, di ruketetwe!” 50Nikodemo, awu a nga nga ya ka Jesu ni wusiku, a to khene kwawe: 51“Ina Mlayo wathu wa lamula mthu, na a si nzi kuengiswa ni kuziwa ti a nga ti maha kani?” 52Vona va to mu xamula va txi khona: “Kasi nawe u huma Galileya kani? Xola, u na wona ti to kha ku na mprofeti wu a tako ngu Galileya.” [ 53Se va to hangalaka, mthu ni mthu e tsula m'tini kwakwe.


Copyright
Learn More

will be added

X\