JOHANE 6

1Msana keto, Jesu a to tsula mtxhatuko ka linene la Galileya, li dhanwako kambe ku i Tibheriyadhe. 2Va txi mu londetela vathu, ngu kuwona sixamaliso si a nga ti si maha ka valwali. 3Jesu a to kwela mmangoni, e ya khalahatsha koneyo ni vagondiswa vakwe. 4Yi ti hafuhi Pasika, i ku M'buso wa Vajudha. 5Se a di gute maso e wona vathu vo tala, va txi ta kwakwe, Jesu a to gela Filipi a txi khene: “Ngu hani hi no ya xava mapawu a ku va ninga ve dya?” 6A wombisile tiya, kufela ku mu duka, ngukusa ene a txi ziva tiya a nga txi fanela kumahisa tona. 7Filipi a to angula a txi khene: “Mapawu a mazana mambidi a madhenari kha ma dingani kuta amukela txikhwemwana mmweyo ni mmweyo.” 8Andrewu, mwanawe Simoni Pedro, mmweyo wa vagondiswa, a wombile kwakwe a txi khene: 9“Ahawa kuna ni mfana a ku ni mtxhanu wa mapawu a mahila ni sihaka simbidi; kambe ina va nga enela votshe vathu vava vo tala ngu sona siya?” 10Jesu a to xamula a txi khene: “Va geleni vathuvo ve khalahatsha.” Ku ti ni mwasi wa wungi ka wukhalo wule. Ngu toneto, vathu va to khalahatshela, mtengo wawe i di wa kundingana mtxhanu wa makumi a mazana. 11Ti di ngeto, Jesu a to teka mapawu, se a di gwitile kubonga, a to ma avela ka vale va nga ti khalahatshile, a txi avelisa toneto nisona sihaka. Va dyite nga ti va nga txi ti lavisa tona. 12Mbimo yi va nga khura, Jesu a gete vagondiswa a txi khene: “Rolelani maruru awa ma nga sala, kasi ku si luzeki txilo.” 13Vona va rolete ve tata digumi da sirundu ngu maruru a kusala ka mtxhanu wa mapawu a kusiwa ngu vale va nga dya. 14Ngako vathu vale va di woni txixamaliso txi Ene a nga txi maha, va to womba, va txi khona: “Kha ditshuri awu ngene Mprofeti wu a fanelako kuta ha ditikoni.” 15Se ngako Jesu a di woni ti to va na nda ta kuta mu maha mfumeli, a to khukha, da wumbidi, ene ekha, e tsula mmangoni. 16Ni minova, vagondiswa vakwe va to relela lineneni. 17Se va to kwela ngalavani, ve ya Kapernawume. Se di to phuma, na Jesu a si nzi kuwuya. 18Kambe linene li to vhiluka ngu kota ya diphuho da hombe di nga txi futeta. 19Kutingako va di txungete mnava wa kudingana mtxhanu mwendo mtxhanu wa makilometro ni dimwedo, va to wona Jesu, a txi tsimbila txitimwi ka mati, a txi tshuketela hafuhi ni ngalava, se ve thava. 20Kambe ene a ti khene kwawe: “Ngani, mi nga thaveni!” 21Se vona va txi lava ku mu amukela ngalavani, aniko ngalava yi to kuluveta yi hoka mabambe hawa yi nga txi ya kona. 22Mangwanani ka kona, dibutho di di nga ti sate mtxhatuko ka linene, di to wona ti to kha ku nga ni yimwane ngalava konaho, hahanze ka yile vagondiswa vakwe va nga wulela ka yona, ni ti to Jesu a ti sa bela navo, aniko vagondiswa vakwe va ti tsute vokha. 23Hambi keto, timwane tingalava, ta kuta ngu Tibheriyadhe, ti ti hokile hafuhi ni hawa va nga dyela kona mapawu, ngako Mkoma a di bongile. 24Se ngako dibutho di di woni ti to Jesu a ti singa ho haleya, hambi ni vagondiswa vakwe, va to bela tingalavani ve teka nzila ya kuya Kapernawume, va txi lava Jesu. 25Se mbimo yi va nga ya mu mana mtxhatuko ka linene, va to womba kwakwe va txi: “Mgondisi, u bwakile txikhati muni hawa?” 26Jesu a to va angula a txi khene: “Ngu ditshuri, ngu ditshuri, na mi gela: Anu kha mi ni laveli mhaka ya sidiwukiso si mi nga si wona, kambe mi ni lava ngu mhaka ya mapawu awa mi nga dya mi txi khura. 27Mi nga karatekeni ngu kuthumela sakudya si si pindako, aniko thumelani asi si no va si di ho kala kuhoka ka wutomi wo mbi guma, asiya Mwanana wa Mthu a no mi ninga, nguko Ene wu, ngene a nga vekelwa txixambanyo ngu Txizimu Tate.” 28Konaho va to womba kwakwe, va txi khona: “Nji txani hi fanelako kumaha kasi kuthuma mithumo ya Txizimu?” 29Jesu a to angula kwawe a txi khene: “Mthumo wa Txizimu ngu wuwa: Kholwani ka wule txona txi nga mu ruma.” 30Vona va to womba va txi khona: “Nzidiwukiso muni, u si mahako, kasiku, hi txi si wona, hi na kholwa kwako kani? Njilo muni u txi mahako kani? 31Vatate vathu va dyite manna txiwulani, nga ti, ti nga bhalwa, va txi khona: ‘A va ningile sakudya sa dipawu da kuta ngu nzumani.’ ” 32Jesu a to va xamula a txi khene: “Ngu ditshuri, ngu ditshuri, na mi gela ni khani: Hi nga Mosi a nga mi ha dipawu da kuta ngu nzumani. Tate wangu ngene a mi hako dipawu da ditshuri da kuta ngu nzumani, 33nguko dipawu da Txizimu ngu dona di txhikako ngu nzumani, di ta hanyisa ditiko.” 34Se vona va to womba va txi khona: “Mkoma, hi he yotshe mbimo dipawu donedo.” 35Jesu a to va angula a txi khene: “Ani ngani dipawu da wutomi. Awu a tako kwangu, kha na mbi swa a txi pfa nzala; awu a kholwako kwangu kha na mbi swa a txi pfa ditora. 36Aniko ani ni mi gete ku khani: Anu mi ti woni, kambe kha mi tumeli. 37Votshe va ni nga ningwa ngu Tate, va na ta kwangu, se awu a tako kwangu, kha ni na mbi mu tshotsha hahanze. 38Ngukusa ni txhikile ngu nzumani, i singa ngu kutela kuta maha kuranda kwangu, aniko ngu kutela kuta maha kuranda ka wu a nga ni ruma. 39Kambe kuranda ka wu a nga ni ruma, ngu ti to ni si tshotshi ni wammweyo wa votshe va a nga ni ninga, aniko ni na va wusa ngu ditshiku da magwito. 40Ngu toneto, kuranda ka Tate ngu kuwa: Wuhi ni wuhi a wonako Mwanana e kholwa kwakwe, e va ni wutomi wo mbi guma; se ani ni na mu wusa ngu ditshiku da magwito.” 41Vajudha va to khata kungungurukela ngu kuwa ene a nga womba, a txi khene: “Ani ni dipawu di di nga txhika ngu nzumani.” 42Vona va titi khona: “Ina ene wu hi nga Jesu Mwanana wa Josefa? Ina athu kha hi mu zivi tate wakwe ni mame wakwe? Se nji txani a txi khene: Ani ni txhikile ngu nzumani?” 43Jesu a to va xamula a txi khene: “Mi nga ngurangureni! 44A walo wu a si kotako kuta kwangu, ngako a sa dhanwa ngu Tate wu a nga ni ruma; se ani ni na mu wusa ka ditshiku da magwito. 45Ti bhatwe ka mabhuku a vaprofeti, va txi khona: Votshe va na gondiswa ngu Txizimu. Wuhi ni wuhi a nga engisa Tate, a txi amukela sileleto sakwe, wa ta kwangu. 46Hi nga ti to kuna ni mthu wu a nga wona Tate, hahanze ka wu a tako ngu ka Txizimu, eyo ngene a nga wona Tate. 47“Ngu ditshuri, ngu ditshuri, na mi gela, ni khani: Awule a kholwako kwangu, ana ni wutomi wo mbi guma. 48Ani ni dipawu da wutomi. 49Txiwulani, vatate vanu va dyite manna kambe va fite. 50Aniko dipawu di di nga txhika ngu nzumani di maha ti to awu a di dyako, a si fi. 51“Ani ni dipawu da kuhanya di nga txhika ngu nzumani. Awu a dyako dipawu diya a na hanya wutomi wo mbi guma. Dipawu di ni no mu ninga, ngu mmidi wangu ni no wu ningela ngu ndava ya kuhanyisa ditiko.” 52Vajudha va to kanetisana ngu txawe, va txi khona: “Xana ene a nga hi ningisa ku txani mmidi wakwe hi txi wu dya?” 53Konaho Jesu a to va gela, a txi khene: “Ngu ditshuri, ngu ditshuri, na mi gela, ni khani: Ngako mi si dyi mmidi wa Mwanana wa Mthu, ni kungako mi si seli mnoha wakwe, anu kha mi na mbi va ni wutomi mndani kwanu. 54Awu a dyako mmidi wangu ni kusela mnoha wangu, ana ni wutomi wo mbi guma, se ani ni na mu wusa ka ditshiku da magwito. 55Nguko mmidi wangu nzakudya sa ditshuri, ani mnoha wangu nzakusela sa ditshuri. 56Awu a dyako mmidi wangu, a txi sela ni mnoha wangu, a zumba kwangu, se nanani ni zumba kwakwe. 57Kota ngaku Tate wu a nga ni ruma, a hanyako, se nani ni hanyako ngu ngene, kufana ni tongeto, awu a ni dyako, a na hanya ngu ngani. 58Ngu donedo dipawu di nga txhika ngu nzumani. Kha di fanani ni dile va nga dya vatate vanu; vona va fite; kasi awu a no dya dipawu diya a na hanya wutomi wo mbi guma.” 59Jesu a wombile timhaka tiya na a txi gondisa disinagogani. 60Vavangi vagondiswa vakwe, kutingako va di engisile timhaka tiya, va to khona: “Dipswi diya da nemela. I mani a no di engisa kani?” 61Ngako Jesu a di ti woni ti to vagondiswa vakwe va ngurangura, a to vaxamula a txi khene: “Xana mhaka yiya ya mi thela dikhodho? 62Se mi na txani, mbimo yi mi no wona Mwanana wa Mthu a txi kwela a txi tsula muwa a nga ti kona kukhatani, kani? 63Moya ngu wona wu hanyisako, kasi mmidi kha wu vhuni txilo. Mapswi awa ni nga mi gela i moya ni wutomi. 64Kambe hagari kwanu va ho va, va si kholwiko.” Kha ditshuri, Jesu a txi ti ziva kukhukhela makhatoni ti to mbamani ava va si kholwiko, ni ti to i mani wu a no mu ningela. 65Se e va gela kambe a txi khene: “Ngu kota yeto, ni mi gete ni txi khani: A walo wu a si kotako kuta kwangu, ngako a sa ningwa ngu Tate.” 66Kukhukhela konaho, vagondiswa vavangi va to khata kutshumelela msana, ve thindeka ku mu londetela. 67Se Jesu a to womba ka va Digumi ni Vambidi a txi khene: “Nananu mi lava kutsula, kani?” 68Simoni Pedro a to angula a txi khene: “Hi na ya ka mani, Mkoma? Awe ngawe u ku ni mapswi a wutomi wo mbi guma. 69Ngu toneto athu ha tumela ni ku ti ziva ti to awe u Msawuleki wa Txizimu.” 70Jesu a to xamula a txi khene: “Hi ngani ni nga mi sawula anu va Digumi ni Vambidi, kani? Hambi keto mmweyo wanu i Sathane.” 71A wombile tiya, a txi konama Judhasi, mwana Simoni Iskariyoti; nguko eneyo i ti ene a no mu ningela, ene mmweyo wa va Digumi ni Vambidi.

will be added

X\